Ewe Paipel a affata pwe Jiowa a tongeni osuni ussun minne epwe fis lón mwachkkan. (Ais. 45:21) Ese affata tichikin ifa ussun are ineet epwe féri ena are pwal mwo nge úkúúkún met a filaatá le silei. Ina popun, sise silei meinisin ussun án Jiowa tufichin osuni ussun fansoun mwach. Nge a wor ekkóch mettóch sia silei.

Jiowa a tongeni féri mettóch meinisin a mochen, nge fán ekkóch a filaatá an esap féri och mettóch. Jiowa a tongeni áeá an tipáchem ese wor aúkúkún le osuni met chék a filaatá. (Rom 11:33) Nge pokiten a unuséch lón an nemenifichi pwisin i, iwe, a tongeni pwal filaatá an esap silei met epwe fis.—Apépé ngeni Aisea 42:14.

Jiowa a efisi pwe letipan epwe pwénútá. Ifa ussun ena a álisikich le weweiti an tufichin osuni ussun fansoun mwach? Iei met Aisea 46:10 a áweweei: “Üa osuni me lepopun mine epwe fis le sopolan, üa pwal pwärätä seni ekewe fansoun lom mettoch resamwo fis. Iwe, üa apasa pwe epwe fis mine üa ekiekietä, üpwe pwal apwönüetä letipei.”

Iwe, eú popun Jiowa a tongeni osuni met epwe fis lón fansoun mwach, ina pokiten a wor an manaman le efisi mettóch. Ese lamot án Jiowa epwe silei met epwe fis lón fansoun mwach, esap ussun kich fán ekkóch sia kan mwet ngeni lesópwólóón eché kachito sia katol pwe sia mochen silei met epwele fis. Nge, Jiowa a tongeni filaatá an epwe fis eú mettóch lón eú fansoun a fen filaatá, iwe atun epwe war ena fansoun, epwe efisi ena mettóch.—Eks. 9:​5, 6; Mat. 24:36; Féf. 17:31.

Ina ewe popun, Paipel a néúnéú ekkeei esin kapas choweán “ammólnatá” me “ekiekietä” pwe epwe áweweei met Jiowa a féri mi weneiti met epwe fis lón mwachkkan. (2 King 19:​25, NW; Ais. 46:11) Ekkena kapas ra afféú seni ewe popun kapas mi riri ngeni eú kapas mi wewe ngeni “chon föri sepi.” (Jer. 18:4) Jiowa a tongeni anapanapa, are amwékútú och mettóch le apwénúetá letipan, ussun chék emén chón ffér sepi pwúl mi sipeéch mi tongeni féri are anapanapa och pwúl pwe epwe wiliiti eú leenien fóten irá mi ling.—Efi. 1:11.

Jiowa a mut ngeni aramas ar repwe pwisin féri ar kefil. Ese kan akkótaaló met epwe fis lón manawen emén me emén aramas, me ese pwal efisi án emén aramas mi pwúng epwe féri och mettóch mi tongeni emmweni ngeni kitetter. A mut ngeni aramas meinisin ar repwe pwisin filaatá ifa ussun repwe manaweni manawer, nge a pwal áiti ngeniir ifa ussun repwe eáni manaw mi pwúng.

Ekieki ekkeei ruu pwóróus. Ewe eú pwóróus a weneiti chón Ninifa. Jiowa a osuni pwe ena telinimw epwe taló pokiten ar féfféringaw. Nge atun ekkewe chón Ninifa ra áier, Jiowa “a siwili an ekiek. Esap chüen ngeniir liwinin ar tipis usun a apasa epwe föri.” (Sona 3:​1-10) Jiowa a siwili an ekiek seni met a fen osuni pokiten chón Ninifa ra áeá ar tufichin pwisin filaatá le ekkesiwili manawer mwirin ar rong án Jiowa kapasen éúréúr.

Ewe oruuen pwóróus, ina ewe oesini ussun emén chón maun itan Sirus, ewe epwe angasaaló ekkewe chón Jus seni ar ooló me akkóta fférsefálin án Jiowa we imwenfel. (Ais. 44:26–45:4) Sirus, ewe kingen Persia, a apwénúetá ena oesini. (Esr. 1:​1-4) Iwe nge, Sirus ese fel ngeni ewe Kot mi enlet. Jiowa a néúnéú Sirus le apwénúetá ena oesini, nge ese eriáni an epwe fel ngeni.—SalF. 21:1.

Ewer, ikkena chék ekkóch me lein ekkewe mettóch Jiowa a ekieki atun a osuni ussun met epwe fis lón fansoun mwach. Ren enletin, ese wor emén aramas a unusen weweiti met Jiowa a ekieki me féri. (Ais. 55:​8, 9) Nge minne Jiowa a pwáraaló a apéchékkúla ach lúkú pwe fansoun meinisin a féri minne mi pwúng, kapachelong atun a osuni minne epwe fis lón mwachkkan.