Bibilia onologa wi Yehova onowodha ologa dhinapadduwe musogorho. (Iza. 45:21) Mbwenyi iyene kantapulelamo dhetene dhinapadduwe, motagiha, kanloga mwahaya, nsakana ninapadduwani vina mudhidhi oganiliye. Nona kaninwodha oziwa dhotedhene sabwa ya ewodhelo eji ena Yehova ya ologa dhinapadduwe musogorho. Mbwenyi ndowe nitanalele mwaha dhing’onovi.

Yehova onowodha okosa dhetene dhinfuniye, mbwenyi masaka mena iyene onosakula ohikosa dhilobo dhina. Sabwa ya okana eziwelo ehingoma, Yehova onottaga ologa elobo-elobovi enfuniye. (Rom. 11:33) Mbwenyi Yehova onosakula vina ohiziwa enapadduwe, sabwani iyene onowodha ovyang’anela.—Kaladdaniha na Izaiya 42:14.

Yehova ononikuluveliha wi efunelo yaye enele wakwanihedheya. Eji eniwanana dhavi na ewodhelo yaye ya ologa dhinapadduwe musogorho? Izaiya 46:10 onotapulelamo: “Ovenyana omaromelo, ddanloga dháfuna opadduwa; dhihinathi wene opadduwa, ddanbaza ologa. ‘Dhintadela miyo okosa, ddinoziwiha, kaddinvonya; enubuwela miyo wira, ddinowira.’”

Mwaha mmodha onimuttukulela Yehova ologa dha musogorho jawi iyene ohikana ewodhelo ya okosa dhilobodha opadduwa. Iyene kanzuzumela wona dhinapadduwe musogorho—wi awodhe wona dhilobodha ninga dhimalile wakwanihedheya. Ottiya ejo, Yehova onogana elobo nanda eloboya bipadduwa nsaka ninfuniye. Iyene onokosa muli-mwetemwene wi eloboya epadduwe nsaka nofwanyelela.—Obud. 9:​5, 6; Mt. 24:36; Mer. 17:31.

Nona Bibilia alogaga mazu ninga “ddisasanyedha,” “ddihita,” vina “ddihimetxa” wila atapulele enakose Yehova mwaha wa dhinapadduwe musogorho. (2 Amwe. 19:25; Iza. 46:11) Mazu aba: “Ddisasanyedha,” “ddihita,” vina “ddihimetxa” atapuleliwe mwari mwa nzu nilebiwena Bibilia omaromo, niniwanana na nzu nina nintapulela “namoba.” (Jer. 18:4) Dhahene ninga munwodhela namoba wa ttotto wuba ddongo ofiyedha okala yobo yokoddela vaddiddi, enowodheya Yehova wuba obe osasanyedha dhotedhene wila efunelo yaye yakwanihedheye.—Ef. 1:11.

Yehova ohavaha ofuru attu otene vina onoriha ofuru obo. Iyene kanttoma mudhidhi onakwe muttu mmodha-mmodha, nne vina kanattukulela attu apama okosa dhilobo dhabure wila aputtuleye vina yattukulele otolotxiwa. Iyene onomuttiya muttu-muttu osakula dila yaye vina onowakokomeza attu ofwara dila yapama.

Katanalela dhotagiha bili. Yotagiha yoroma enaloga akadda Nínive. Yehova wahiloga n’ottaga wila sidadi ejile egahitolotxiwa sabwa ya obure woneyamo. Mbwenyi mulagihile attuyamo wila ahitxinuwa Yehova “othiya goyi yapimeleliye wagwihedha.” (Jon. 3:​1-10) Yehova wahitxinja yogana yaye sabwani akadda Nínive ahilabihedha ofuru wawa pama vina ahakulela pama muselu wafiyedhilena Jona. Awene ahitxinuwa nona katolotxiwe.

Yotagiha yina enimuloga musogorheli dhahi onkuweliwa Siru, odduwene agàfurulile Ayuda mutxedhiwani vina agalamulile ovenyihedhiwa wa mparha wa Yehova. (Iza. 44:26–45:4) Mwene Siru w’o Persia owakwanihedha nivuhulo ntti. (Ezd. 1:​1-4) Yehova ohimulabihedha Siru wila akwanihedhe nipikirhelo naye se ommagelela omwebedha. Kuloga, Siru wahikana ofuru wa osakula dhogana dhaye vina omusakula wafuniye omwebedha.—Gano 21:1.

Ebaribari wi dhikalawo mwaha dhinji dhinimuttukulela Yehova oziwa dha musogorho. Mwebaribari kawo muttu onwodha ononelamo mowakwana-mwene dila dha Yehova, kuloga dhubuwelo dhaye vina dhokosa dhaye. (Iza. 55:​8, 9) Mbwenyi dhotedhene dhiniziwihile Yehova dhinolibiha nroromelo nehu nawi dhotene dhinkosiye sapamavi—masiki dhinvuhulela iyene mwaha wa dha musogorho.