Mbimbiliya yakwamba zwalala ngwo, Yehova mahasa kusolola yuma yize muyikalingiwa kulutwe. (Iza. 45:21) Alioze, kuyishi kuhanjika ha yuma yeswe ngwe hakutwala ku chize akulinga yuma yacho ni ha shimbu lize mayilinga chipwe unji wa yize mazanga kunyingika. Kashika, kutuchi kuhasa kunyingika yuma yeswe hakutwala ku uhashi uze Yehova akwete wa kunyingika yuma ya kulutwe lia matangwa. Alioze, mutuhasa kupwa ni shindakenyo ha yuma yimwe.

Yehova mahasa kulinga yeswayo mazanga, alioze mashimbu amwe kakusakula kwecha kuyilinga. Mumu lia kupwa ni mana waze keshi musulo, nyi mazanga, Yehova mahasa kusolola yuma yize muyikalingiwa kulutwe. (Roma 11:33) Alioze, mahasa kulituna kunyingika yize muyilingiwa kulutwe, mumu kanalinyingika ni ungunu weswe.—Tesa ni Izaia 42:14.

Yehova kakusa shindakenyo hanga upale wenyi ulingiwe. Mba kuchi chino chinakwate ha uhashi wa Yehova wa kunyingika yuma ya kulutwe? Izaia 46:10 unambe ngwo: “Nakulumbununa songo chize ku uputukilo. Chize ku shakulu nakulumbununa yuma kanda ayilinga, ni kwamba ngwami, Upale wami muukakola, kumungukalinga chize nafunjikile.”

Chuma chimwe chize chinasolola ngwo, Yehova mahasa kutulweza yize muyikalingiwa kulutwe, chili ngwo, mumu iye kali ni ndundo ja kulinga yuma. Iye kafupiwile kumona yize muyikalingiwa kulutwe, ngwe yuma yacho hiyalingiwa kulu, ngwe chize mutu akutanga lifwo lia kasula lia umwe mukanda hanga anyingike kuhwa cha lusango. Shimbu achilinge, Yehova mahasa kusakula hanga yuma yimwe yilingiwe ha shimbu lize mwene mazanga. Iye nawa kasusa shindakenyo hanga yuma yilingiwe ha shimbu lialita.—Kutuhu. 9:5, 6; Mateu 24:36; Yili. 17:31.

Kashika, Mbimbiliya yakusachisa maliji ngwe “hinachilinga,” “naumbile” ni “hinachifunjika” hanga yisolole yize Yehova akulinga hakutwala ku yize muyikalingiwa kulutwe. (2 Mia. 19:25; Iza. 46:11) Maliji wano kanakatuka ha limi lize asonekene nalio Mbimbiliya, linatale ha liji likwo linalumbunuka ngwo “tengi.” (Jere. 18:4) Ngwe chizechene tengi yoze ukwete utotombo mahasa kuumba uma ni kuupwisa chuma chipema, Yehova neye mahasa kuumba hanji kwalumuna yuma hanga upale wenyi ulingiwe.—Efwe. 1:11.

Yehova hanahane kuli atu ulite wa kusakula chipi ni chipema, kakuvumbika ulite wacho. Iye keshi kutesa yize muyilingiwa ku mwono wa mutu mweswe. Chikwo nawa, keshi kutwala atu apema hanga alinge yuma yipi yize muyikatwala ku unongeso. Kakwecha hanga mutu ni mutu asakule jila yize mendela, chipwe chocho, kakukolweza atu hanga endele mu jila yipema.

Tutalenu chilweza cha Akwa-Ninive. Yehova kambile ngwenyi, mbonge yacho te mayinongesa mumu lia kwoka cha uhenge wa atu jamo. Alioze muze atu jacho alikonyekene, Yehova “yalikonyeka ha chuma chikalu chize ambile kwalinga. Kachilingile.” (Yona 3:1-10) Yehova kalumwine nyonga lienyi hakutwala ku yize ambile, mumu A-Ninive kazachishile ulite wo wa kusakula chipi ni chipema hanga atayize sango ja Yona. O yalikonyeka, chacho Yehova yecha kwanongesa.

Chilweza chikwo chili cha uprofeto uze wahanjikile hali mwanangana Siru, yoze te matusula A-Yunda mu upinji ni kwatuma hanga atungulule tembele ya Yehova. (Iza. 44:26–45:4) Mwanangana Siru wa ku Persia yamanununa uprofeto wacho. (Ezera 1:1-4) Yehova kazachishile Siru hanga amanunune uprofeto wenyi chakuhona kumushinjila hanga amuwayile, hanji ngwetu, Siru kapwile ni ulite wa kusakula Zambi yoze mawayila.—Yishi. 21:1.

Kuli sango jikwo jinji jize jinasolola ngwo, Yehova kali ni uhashi wa kunyingika yize muyikalingiwa kulutwe. Kwamba umwenemwene, niumwe mutu kechi kuhasa kunyingika majila eswe a Yehova, hanji ngwetu, chize iye akunyonga ni yize akulinga. (Iza. 55:8, 9) Alioze, yeswe yize Yehova hanatulweze yakukolesa ufulielo wetu ngwetu, iye nihindu kakulinga yuma yalita—yino yinachingi nawa yuma yize ambile ngwenyi, muyikalingiwa kulutwe.