Jehovah nih hmailei kong a chimchung khawh tiah Baibal nih fiang tein a langhter. (Isa. 45:21) Zeitindah asiloah zeitik ah dah a tuah i zeitluk in dah a hngalh timi kong tu cu a dikthliar in a chim lo. Cucaah Jehovah i hmailei kong a chimchung khawhnak he aa tlaiin kan hngalthiam kho dih lo. Asinain kan hngalh khawhmi thil cheukhat a um.

Jehovah nih a duhmi paoh a tuah khawh ko nain a caan ah a tuah lomi a um. Ri a ngei lomi fimnak a ngeih caah a duhmi paoh a tuah khawh. (Rom 11:33) Asinain anih cu mahle mah i uk khawhnak a ngeih caah zeidah a cang lai timi kong he aa tlaiin hngalh lo ding in aa thim caan zong a um.—Isaiah 42:14 he tahchunh.

Jehovah nih a duhmi kha a tlinter. Hmailei kong chimchung khawhnak sining a ngei timi nih zeidah a chim duhmi a si? Isaiah 46:10 ah hitin a ti: “A hramthawk tein a phichuak zeidah a si te lai ti kha ka rak chim; thil um ding kha a um hlanpi in ka rak chim. ‘Kaa tinhmi cu ka tlolh bal lai lo ka ti; tuah kaa timhmi cu a dihlak in ka tuah lai.’”

Jehovah nih hmailei kong a chimchung khawhnak a ruang pakhat cu zei thil poah tlinter khawhnak ṭhawnnak a ngeih caah a si. Video kan zoh tikah a donghnak ah zeidah a cang lai ti theih duh ah kan ranh caan a um bantuk in Jehovah nih hmailei ah zeidah a cang lai ti theih duh ah a ranh lo. Mah canah Jehovah nih cuset khaset timi caan ah a cang dingmi thil kha bia a khiah khawh i mah caan a phanh tikah mah ning in a tlinter khawh.—Ex. 9:5, 6; Matt. 24:36; Lam. 17:31.

Cucaah Baibal nih hmailei ah a cang dingmi thil cheukhat kong he aa tlaiin Jehovah nih ‘a timhtuah,’ ‘a ruah cang’ i ‘aa tinh cang’ tiah a ti. (2 Si. 19:25; Isa. 46:11) Mah bifang cu a hrampi holh ah ‘um sertu’ ti sullam a ngeimi biafang in lehmi a si. (Jer. 18:4) Um ser a thiammi pakhat nih tlak kha aa dawh tukmi pangpar chiahnak thawl ah a ser khawh bantuk in Jehovah nih a duhnak tlinter awkah zei thil paoh a hman khawh.—Efe. 1:11.

Jehovah nih mikip kha zalonnak a pek hna. Mi pakhat cio nih an nunnak ah zeidah an ton lai ti kha bia a khiak cia lo. Lungthin ṭha a ngeimi pakhat kha ṭhatlonak tuah awkah lam a hruai lo. Mi kip kha anmah duh ning in nun awkah thimnak nawl a pek hna. Asinain a hmaanmi lam in nun awkah a cawnpiak hna.

Tahchunhnak pahnih in zohhmanh hna u sih. Tahchunhnak pakhatnak cu Nineveh khuami hna kong a si. Jehovah nih mah khuami hna cu an sual tuk caah ka hrawh hna lai tiah a chimchung. Asinain an i ngaihchih tikah Jehovah nih “an cung ah ka tlunter lai a timi ṭhatlonak kha a tlunter ṭhan lo.” (Jonah 3:1-10) Nineveh khuami hna nih Jehovah ralrin peknak an theih tikah an i ngaichih i thlennak an tuah caah Jehovah nih a biakhiahnak kha a let ṭhan.

Tahchunhnak pahnihnak cu Sairus timi pa nih sal tangmi Judah mi kha a luatter hna lai i Jehovah biakinn sak ṭhan ding in nawl a pek hna lai tiah Jehovah nih a chimchungmi kong kha a si. (Isa. 44:26–45:4) Mah chimchungbia kha Persia siangpahrang Sairus nih a tlinter. (Ezra 1:1-4) Asinain Sairus cu a hmaanmi Pathian a biami a si lo. Jehovah nih mah chimchungbia tlinter awkah Sairus kha a hman ko nain amah biak awkah cun a hnek lo.—Ptb. 21:1.

Mah cu Jehovah nih hmailei kong a chimchung tikah a ruahmi thil tlawmpal lawng a si. A taktak ti ahcun Jehovah ruahnak le thil tuahmi cu ahohmanh nih tling tein kan hngalthiam kho lo. (Isa. 55:8, 9) Asinain hmailei kong a chimchungmi i tel in Jehovah nih a tuahmi thil paoh cu a hmaanmi an si ti kha kan zumh khawh.