Labib i montre klerman ki Zeova i kapab predir lavenir. (Iza. 45:21) Labib pa donn nou tou detay konsernan ki mannyer Zeova i predir lavenir, kan ki i fer sa oubyen ki kantite i swazir pour konnen konsernan lavenir. Alor nou pa konn tou keksoz konsernan abilite Zeova pour predir lavenir. Me i annan detrwa keksoz ki nou konnen.

Zeova i kapab fer tou sa ki i anvi me parfwa i swazir pour pa fer serten keksoz. Zeova i kapab servi son gran lasazes pour predir nenport keksoz ki i anvi. (Rom. 11:33) Me vi ki i annan kontrol lo son lekor, i kapab osi swazir pour pa konnen ki pou arive dan lavenir.—Konpar Izai 42:14.

Zeova i fer son lavolonte ganny akonplir. Ki mannyer sa i ed nou konpran sa abilite ki Zeova i annan pour predir lavenir? Izai 46:10 i eksplik nou. Sa verse i dir: “Depi o konmansman mon predir sa ki pou arive, depi letan lontan mon ti anons bann keksoz ki pa ti ankor ganny fer. Mon dir, ‘Sa ki mon’n deside pou ganny akonplir, e mon pou fer sa ki fer mwan plezir.’”

Alor, en rezon akoz Zeova i kapab predir lavenir i parski i annan sa pouvwar pour fer keksoz arive. Zeova pa parey nou. I pa bezwen rode ki pou arive dan lavenir. Parfwa nou nou fast forward en film pour nou konnen ki mannyer sa film pou fini. Me Zeova li i kapab deside ki en keksoz pou arive dan en ler spesifik e apre i fer sa keksoz arive ler sa moman i arive.—Egz. 9:5, 6; Mat. 24:36; Akt 17:31.

I pour sa rezon ki Labib i servi bann mo parey “prepar,” “desid” ek “fer plan,” pour dekri sa ki Zeova i fer konsernan serten levennman ki pou arive dan lavenir. (2 Rwa. 19:25; Iza. 46:11) Sa bann mo in ganny tradwir apartir en mo dan langaz orizinal ki relye avek en mo ki vedir “potye.” (Zer. 18:4) Zis parey en potye i kapab fer en bout larzil vin en zoli po, Zeova i kapab fer oubyen aranz keksoz pour akonpli son lavolonte.—Efe. 1:11.

Zeova i les dimoun fer zot prop desizyon. Zeova pa deside davans ki pou arive dan lavi sak dimoun e i pa fer bann bon dimoun fer en keksoz ki pou anmenn bann move konsekans. Zeova i les nou swazir ki mannyer nou anvi viv nou lavi me i ansenny nou ki mannyer pour viv dan sa fason ki fer li plezir.

Annou vwar de legzanp. Sa premye legzanp i konsernan bann dimoun ki ti reste Niniv. Zeova ti predir ki sa lavil ti pou ganny detrir parski bann dimoun ti pe fer en kantite keksoz mal. Me ler sa bann dimoun ti repantir, Zeova “ti sanz son desizyon e i pa ti anmenn sa maler lo zot parey i ti’n dir.” (Zon. 3:1-10) Zeova ti sanz son nide lo sa ki i ti’n predir parski bann zabitan Niniv ti swazir pour sanz zot fason fer apre ki zot ti’n tann sa lavertisman ki Zeova ti’n donn zot.

Sa dezyenm legzanp i sa profesi konsernan Siris, ki ti pou liber bann Zwif ki ti’n an egzil Babilonn e ki ti pou donn lord pour rekonstri tanp Zeova. (Iza. 44:26–45:4) Lerwa Siris, ki ti lerwa Pers ti akonpli sa profesi. (Ezra 1:1-4) Me Siris pa ti ador sa vre Bondye. Zeova ti servi Siris pour akonpli sa profesi me i pa ti fors Siris pour ador li.—Prov. 21:1.

Byensir, sa i zis detrwa keksoz ki Zeova i pran kont ler i predir lavenir. An realite, personn pa kapab konpran konpletman fason panse ek aksyon Zeova. (Iza. 55:8, 9) Me sa ki Zeova in revele lo son lekor i fer nou annan plis lafwa ki i pou toultan fer sa ki byen, enkli ler i pe predir lavenir.