Daizeze Bedʼeaba jarabʉ Jeowabara kʼawua jaraseabʉta ʉ̃ra zeide kʼãrẽ berabarira (Is. 45:21). Mamina jara ẽ Jeowaba sõbede akʉza sãwũã obʉta maʉ̃ra, adewara iya kʼãrẽaba kʼawuakĩrãbʉta ʉ̃ra zeide kʼãrẽ sãwũã berabarita. Mamina bʉ nekʼãrẽ dayirãba kʼawuaseabʉta.

Jeowabara jõma oseabʉ mamina edaʉde jidabʉ ʉ̃kʉrʉta oẽ baita. Iyira jipa buru bia baera, kʼawuaseabʉ nekʼãrẽ jõma sãwũã berabarira (Rom. 11:33). Mamina iyara iyi kakuara biʼia zokʼa kʼawuabʉ baera jidaseabʉ kʼãrẽta kʼawua ẽ baita (naʉ̃ testoʉ̃me akʉra Isaías 42:14).

Jeowabara iya kãgabʉta aripe berabaribibʉ. ¿Naʉ̃ba sãwũã kʼarebaseabʉ dayirãba biʼia kʼawuaita Jeowaba sãwũã kʼawuabʉta ʉ̃ra zeide kʼãrẽ berabarita? Isaías 46:10​ba jara ũrĩbibʉ: «Mʉ̃a naena jarabʉ, tẽãne kʼãrẽ zeita, naena jarabʉ wabida kʼãrẽ berabarida ẽãta. Mʉ̃a jarabʉ: ‹Mʉ̃a jidadara oyi akʉza mʉ̃a kãgabʉra jõma oyi›».

Jeowaba nekʼãrẽ ʉ̃ra zeide kʼãrẽ berabarira kʼawuabʉ iyira zarea barabʉ baera maʉ̃ aripe berabaribita. Edaʉde daya pelikula akʉbʉrʉdera, maʉ̃ne kʼãrẽ berabari kʼawuaita akʉbʉ yi jõbodoarebʉta, mamina Jeowaba nekʼãrẽ ʉ̃ra zeide kʼãrẽ berabari kʼawuaira mawũã oẽ, iya maʉ̃ oira nesida ẽ. Awuarabʉrʉ Jeowabara krĩchabʉ kʼãrẽ ewaride berabaribita nekʼãrẽ iya kãgabʉta, mõbe maʉ̃ ewari zebʉrʉde aripe berabaribibʉ (Éx. 9:​5, 6; Mat. 24:36; Hech. 17:31).

Maʉ̃ kʼarea, Daizeze Bedʼeaba zokʼabʉ naʉ̃ra bedʼeata «kʼawuabʉ», «yi oma» akʉza «oita krĩchabʉ». Mawũã ũdubita Jeowaba kʼãrẽta obʉta nekʼãrẽ ʉ̃ra zei ʉ̃rʉ (2 Rey. 19:25; Is. 46:11). Naʉ̃ra bedʼea zokʼabʉba ũdubikĩrãbʉ yumakẽrã kʉgʉrʉ parãbarita (Jer. 18:4). Abarika yumakẽrã kʉgʉrʉ parãbariba egorobata kʉgʉrʉ babibʉ kĩrãkʼa, Jeowaba nekʼãrẽ obʉ mawũã iya oita krĩchabʉ aripe berabarimarẽã (Efes. 1:11).

Jeowaba iduaribibʉ ẽbẽra aba abakaʉba jidamarẽã kʼãrẽta oita. Jeowabara jara ẽ ẽbẽra aba abakaʉʼa kʼãrẽ sãwũã berabarira akʉza oẽ ẽbẽra biaraba nekʼãrẽ omarẽã ãyi zʉbʉriabiseabʉta. Iyara ẽbẽra aba abakaʉʼa jara ẽ sãwũã bʼaibarata, mamina jaradiabʉ kʼãrẽta oibarata mawũã bia bʼaita.

Yiza ũme akʉdaya. Nããra akʉdayi Nínivedebadara ẽbẽrarã ʉ̃rʉ, ãyira ẽbẽra kayiruarabasi baera Jeowabara jarasi makenaita. Mamina naʉ̃ra ẽbẽrarã jẽda krĩchasidera Jeowabara krĩchasi makena ẽ baita (Jon. 3:​1-10). Jeowabara krĩchasi naʉ̃ra ẽbẽrarã bea ẽ baita ãya Jeowaba jarabʉta ũrĩsida baera akʉza ãya kʼãrẽ aña obadata ara osida baera.

Yi ũmera propesia Ciro ʉ̃rʉ bedʼeabʉta iyi. Iyara judiorãra ẽdrʉbisi Babilonianeba akʉza jarasi Jeowa templosida ara odamarẽã (Is. 44:26–45:4). Nokʼo Ciro Persiadebemabara aripe berabaribisi maʉ̃ propesiara (Esd. 1:​1-4). Mamina, Cirora Daizeze ode ba ẽ basi. Mawũãsidu Jeowaba iyita zokʼasi mawũã maʉ̃ propesia aripe berabaribita. Mamina Jeowabara Cirora ajuerzade iyaʼa yiwidʼibi ẽ basi (Prov. 21:1).

Dayirãba atia ũdudaba kʼarebabʉ kʼawuaita Jeowaba kʼãrẽta obʉta kʼawuaita ʉ̃ra zeide kʼãrẽ berabarita. Mamina dayi ẽbẽrabara jõma kʼawua ze ẽ Jeowaba kʼãrẽ sãwũã obʉra (Is. 55:​8, 9). Mamina dayirãba Jeowa ʉ̃rʉ kʼawuabʉba kʼarebabʉ ĩjãita iyara ewari jõmaʉ̃nẽ nekʼãrẽ aripe obʉta akʉza ĩjãita iya nekʼãrẽ ʉ̃ra zei ʉ̃rʉ jarabʉsida aripe berabarita.