Jiñi Biblia wen tsiquil miʼ pʌs chaʼan mucʼʌch (Is. 45:21). Pero maʼañic miʼ yʌl baqui ora miʼ mel, bajcheʼ miʼ mel o miʼ muqʼuix i luʼ ñaʼtan muʼ bʌ caj i yujtel o miʼ tsʼitaʼ jach. Jin chaʼan, maʼañic chuqui miʼ mejlel lac wen al, come maʼañic mi lac luʼ chʼʌmben i sujm. Pero an tacʌch chuqui la cujil bʌ.

Jehová maʼañic i pʼisol chuqui miʼ mejlel i ñaʼtan. Pero iliyi mach yomic i yʌl chaʼan luʼ yujilix chuqui mi caj i yujtel, anquese mucʼʌch i mejlel i wʌn ñaʼtan come maʼañic i pʼisol i ñaʼtʌbal (Rom. 11:33). Pero mach cheʼic miʼ mel bajcheʼ jiñi come wen yujil i ticʼol i bʌ (laja yicʼot Isaías 42:14).

Jehová miʼ yʌcʼ ti tsʼʌctiyel chuqui ñaʼtʌbil i chaʼan. ¿Bajcheʼ miʼ coltañonla iliyi? Isaías 46:10 miʼ yʌl: «Joñon mic wʌn sub i yujtibal jini woli bʌ (choncol bʌ) ti tejchel. Ti oñiyi tsac wʌn tsictesa jini maxto bʌ anic woli ti ujtel. Pejtel chuqui wʌn ñaʼtʌbil c chaʼan mi caj i yujtel. Mic mel pejtel chuqui tac jach com».

Jin chaʼan Jehová miʼ mejlel i yʌl muʼ bʌ caj i yujtel ti talto bʌ qʼuin come añʌch i pʼʌtʌlel chaʼan miʼ yʌcʼ ti tsʼʌctiyel. Pero mach cʼʌñʌlic miʼ ñaxan pam qʼuel chuqui mi caj i yujtel chaʼan miʼ mejlel i ñaʼtan, mach lajalic bajcheʼ mi laj qʼuel jumpʼejl película i mi lac chaʼlen ti adelantar chaʼan mi lac ñaʼtan muʼ bʌ caj i yujtel, maʼañic. Jehová cojach miʼ yʌl muʼ bʌ caj i yujtel yicʼot jala, i cheʼ bʌ miʼ cʼotel i yorajlel miʼ yʌc chaʼan cheʼʌch miʼ tsʼʌctiyel (Éx. 9:5, 6; Mat. 24:36; Hech. 17:31).

Jin chaʼan jaʼel Jehová miʼ cʼʌn tʼan tac bajcheʼ «tsac chajpa», «tsac ñaʼta» o «ñaʼtʌbil c chaʼan» chaʼan miʼ yʌcʼ ti ñaʼtʌntel muʼ bʌ i mel cheʼ bʌ miʼ yʌl chuqui mi caj i yujtel ti talto bʌ qʼuin (2 R. 19:25; Is. 46:11). I ti hebreo, ili tʼan tac miʼ taj i bʌ yicʼot jiñi yambʌ tʼan muʼ bʌ i yʌjlel bajcheʼ «xmel pʼejt» (Jer. 18:4). Come lajal bajcheʼ jiñi xmel pʼejt miʼ yʌsin miʼ chaʼlen jiñi ocʼol chaʼan miʼ mel utsʼatax bʌ pʼejt, Jehová miʼ mejlel i mel chuqui yom jaʼel chaʼan miʼ tsʼʌctesan jiñi ñaʼtʌbil i bʌ i chaʼan (Efes. 1:11).

Jehová miʼ yʌc chaʼan jujuntiquil mi lac yajcan la com bʌ lac mel. Maʼañic miʼ wʌn al chuqui mi caj i yujtel tiʼ tojlel jujuntiquil lac piʼʌl. I maʼañic chuqui miʼ mel chaʼan juntiquil wem bʌ lac piʼʌl miʼ wersa mel mach bʌ weñic. Mucʼ jach i cʌntesañonla bajcheʼ yom mi lac chumtʌl i miʼ yʌcʼ chaʼan jujuntiquil mi lac ñaʼtan la com bʌ lac mel.

Laʼ laj qʼuel chaʼpʼejl ejemplo. Jiñi ñaxam bʌ jiñʌch cheʼ tsiʼ yʌlʌ chaʼan mi caj i jisan jiñi chumuloʼ bʌ ti Nínive come wen jontolob (mañajob) jax. Pero cheʼ bʌ tsiʼ qʼuele chaʼan tsiʼ chaʼ ñaʼtayob i bʌ, jiñi Biblia miʼ yʌl: «Cheʼ bʌ tsiʼ qʼuele Dios woliʼ cʌyob i jontolil, tsiʼ qʼuexta i pusicʼal. Maʼanic tsiʼ choco tilel wocol cheʼ bajcheʼ tsiʼ subeyob» (Jon. 3:1-10). ¿Chucoch tsiʼ qʼuexta Jehová jiñi ñaʼtʌbil i bʌ chaʼan? Come jiñi wiñicob xʼixicob ti Nínive tsiʼ ñʌchʼtʌbeyob i tʼan i tsiʼ chaʼ ñaʼtayob i bʌ.

Jiñi yambʌ profecía jiñʌch tsaʼ bʌ ajli tiʼ tojlel Ciro, juntiquil rey tsaʼ bʌ i colta jiñi judíojob i tsiʼ yʌcʼʌ ti chaʼ mejlel i templo Jehová ti Jerusalén (Is. 44:26–45:4). Jehová tsiʼ cʼʌñʌ jiñi rey Ciro am bʌ ti Persia chaʼan miʼ tsʼʌctesan jiñi profecía anquese maʼañic miʼ chʼujutesan Dios, i Jehová maʼañic tsiʼ xiqʼui chaʼan miʼ chʼujutesan (Esd. 1:1-4; Pr. 21:1).

Anto cabʌl chuqui yom mi lac ñaʼtan, mach cojach tsaʼ bʌ ujti la cʌl. Tiʼ sujm maʼañic majqui miʼ mejlel i laj chʼʌmben i sujm chuqui miʼ ñaʼtan Jehová o muʼ bʌ i mel, mi jiñic muʼ bʌ i yʌl chaʼan jiñi talto bʌ qʼuin (Is. 55:8, 9). Jiñi la cujil bʌ tiʼ tojlel miʼ pʌsbeñonla chaʼan tiʼ pejtelel ora wen chuqui miʼ mel, jinto jaʼel cheʼ miʼ yʌl muʼ bʌ caj i yujtel ti talto bʌ qʼuin.