A Baabole vɛŋɛɛŋ aŋ pɛle ka Jehoova na baŋ wulee yɛlɛ naŋ na e nendaare kaŋa. (Aiz. 45:21) Kyɛ a Baabole ba wuli te lɛ Jehoova naŋ maŋ tu kyɛ baŋ a yɛlɛ ŋa, o ba wuli te saŋa meŋ o naŋ maŋ baŋ a nendaare kaŋa yɛlɛ, o gba ba wuli ka yɛlɛ zaa naŋ kyaare nendaare kaŋa ka Jehoova maŋ baŋ, bee ka o maŋ kaa iree mine oŋ boɔrɔ ka o baŋ kyɛ bare a kyɛlɛɛ na. Azuŋ te ba baŋ a yɛlɛ zaa te baare a kyaare lɛ Jehoova naŋ maŋ tu kyɛ baŋ nendaare kaŋa yɛlɛ na. Kyɛ yɛlɛ fẽẽ mine bebeŋ teŋ baŋ.

Jehoova na baŋ eɛ yelzaa o naŋ boɔrɔ kyɛ saŋa kaŋa o maŋ iriŋ ka o koŋ e yɛlɛ mine. Jehoova kpeɛ̃o ba taa mannoo, azuŋ o na baŋ daŋyelee yelzaa o naŋ boɔrɔ. (Uro. 11:33) Kyɛ onaŋ taa meŋɛ nyɔgebo yaga zaa na zuŋ, o na baŋ iriŋ ka o koŋ baŋ yɛlɛ mine naŋ na e nendaare kaŋa aneazaa ka o taa la a kpeɛ̃o a na baŋ e lɛ.​—De manne neŋ Aizeeya 42:14.

Jehoova maŋ vɛŋeŋ ka o boɔbo nyɛ eebo. Sobuoŋ ka a yɛlɛ ŋa soŋ te teŋ maaleŋ baŋ yɛlɛ soŋ a kyaare kpeɛ̃o na o naŋ taa ka o wuli yɛlɛ naŋ na e nendaare kaŋa na? Aizeeya 46:10 yeleeŋ ka: “A piiluu saŋa maŋ maŋ wuli a baaraa yɛlɛ, takoreŋ saŋa zaa maŋ maŋ wuli yɛlɛ aŋ naŋ ba nyɛ eebo. N yeleeŋ ka, ‘Yɛlɛ na maŋ nare biŋ na na areŋ, N na eɛ yelzaa naŋ pɛlɛ N poɔ.’”

Azuŋ ananso kaŋa Jehoova naŋ na baŋ yel yɛlɛ naŋ na e nendaare kaŋa la ka, o taa la a kpeɛ̃o ka o vɛŋ ka yelzaa e. A ba fɛre ka o kaa nyɛ yɛlɛ zaa naŋ na e nendaare kaŋa a kyɛ toɔ̃ baŋ yɛlɛ naŋ na e nendaare kaŋa. Bonso a ba waa ŋa nendaare kaŋa yɛlɛ zaa e baarɛɛŋ sori kaŋa poɔŋ, oŋ pãã maŋ zeŋ kaara yɛlɛ na zaa naŋ na e nendaare kaŋa na, a na baŋaa sɛre kyɛ ka a nyɛrɛ eebo. Kyɛ Jehoova na baŋ yeleŋ ka yelkaŋa na eŋ wagre kaŋa poɔŋ, a vɛŋ ka a yɛlɛ meŋ nyɛ eebo ka a wagreŋ wa ta.​—Yiib. 9:5, 6; Mat. 24:36; Tom. 17:31.

Aŋa mannoo poɔŋ, a Baabole maŋ de la a yelbie aŋa “maaŋ toŋaa,” ane “N maalɛɛ N teɛroŋ” wuli lɛ Jehoova naŋ maŋ e a kyaare nendaare kaŋa yɛlɛ mine. (2 Nam. 19:25; Aiz. 46:11) A yelbie ŋa, ba leɛraaŋ yi kɔkɔre kaŋa poɔŋ, a lɛ kɔkɔre na poɔŋ a yelbie ŋa tɛgɛ la ka “mɛmeɛrɛ.” (Jer. 18:4) Aŋa lɛ mɛmeɛrɛ naŋ baŋ toma nimiri soŋ naŋ na baŋ de yagi naŋ e gbuli a mɛ dugi ka o veɛlɛ yaga zaa na, lɛ meŋ la ka Jehoova na baŋ tu sori zaa o naŋ boɔrɔ a vɛŋ ka o poboɔbo nyɛ eebo.​—Efe. 1:11.

Jehoova maŋ barɛɛ neɛzaa ka o de gbɛre zaa onaŋ boɔrɔ. O ba maŋ nare yɛlɛ naŋ na e neɛzaa zemmo poɔŋ a biŋ ko o soba. O ba maŋ vɛŋ ka neŋsonne meŋ e yelzaa naŋ na vɛŋ ka ba nyɛ saammo. O maŋ barɛɛ neɛzaa ka o erɛ yɛlɛ o naŋ boɔrɔ o zemmo poɔŋ, kyɛ maŋ wuli ba yelsonne baŋ na baŋ erɛ ba zemmo poɔŋ.

Te nyɛ yelmannee ayi ŋa. A dɛndɛŋ soba kyaarɛɛ a Ninevɛ noba na. Jehoova da daŋyeleeŋ ka ba na sãã la a teŋkpɛŋ ŋa ba yelfaare zuŋ. Kyɛ saŋa na a teŋkpɛŋ noba naŋ da wa e kaŋdabaŋkalɛ a sɔre ba yelbebe sudi na, Jehoova da “tɛgi [la] o haakila a ba waaneŋ a sããkpoŋ na oŋ daaŋ yel ka o na sãã baŋ na.” (Joona 3:1-10) Jehoova da leɛrɛɛ gbɛre na oŋ da de na ka o na sãã la a Ninevɛ noba na, bonso saŋa na baŋ da wa woŋ Jehoova kpããmo na, ba da leɛrɛɛ ba eebo.

A yelmannaa ayi soba meŋ kyaarɛɛ Sairus, o na zɔɔ faa la a Gyuumine yi gbaŋgbaaloŋ poɔŋ, a leɛ vɛŋ baŋ te mɛ Jehoova ŋmenpuoredie na. (Aiz. 44:26–45:4) Peerisiya Naa Sairus da vɛŋɛɛŋ ka a daŋyelbo ŋa nyɛ eebo. (Eez. 1:1-4) Kyɛ, Sairus da ba puoro a yelmeŋɛ Naaŋmen. Jehoova da de la Sairus toŋ neŋ toma a vɛŋ ka o poboɔbo nyɛ eebo, kyɛ o da kooŋ a someŋɛ ka o iri ŋmene na oŋ na puore, o da ba feroo ka o puoroo.​—Yeng. 21:1.

A yɛlɛ ŋa mine la ka Jehoova maŋ kaa kyɛ wuli yɛlɛ naŋ na e nendaare kaŋa. A yelmeŋɛ la ka, nensaaleba koŋ baŋ baŋ yɛlɛ zaa Jehoova naŋ teɛrɛ bee a erɛ te baare. (Aiz. 55:​8, 9) Kyɛ yɛlɛ na zaa Jehoova naŋ wuli te na maŋ eŋɛɛ te sagediibu faŋa ka yelzaa onaŋ erɛ maŋ toriŋ, ka yɛlɛ na meŋ o naŋ maŋ yelkyaare nendaare kaŋa na poɔ.