Beibel e soi taki Yehofa poi taki saw pasa aini a ten di e kon (Yes. 45:21). Ma Beibel nai taki finifini fa ai du a sani ya anga on ten ai du en. A nai taki a fesi omen sani a wani sabi tu. Wa sabi finifini fa Yehofa e taki saw pasa aini a ten di e kon, ma wantu sani de di u sabi.

Yehofa man du ala san a wani, ma son yuu ai bosoloiti taki a naw du son sani. Yehofa koni, neen meke a poi taki saw pasa aini a ten di e kon (Rom. 11:33). Ma fu di a poi dwengi enseefi, meke son leisi ai dwengi enseefi fu aa poti pakisei a son sani di o pasa aini a ten di e kon.

Yehofa e meke sani waka enke fa a wani. San a sani ya abi fu du anga a koni di a abi fu taki saw pasa aini a ten di e kon? Yesaya 46:10 taki: ‘Fanafu a bigin mi e taki saw pasa. A omen ten a fesi mi e taki san mio du aini a ten di e kon. Mi taki: “Sani mu pasa enke fa mi taki. Mio du ala san mi wani.’”

Yehofa poi taki saw pasa aini a ten di e kon, bika a abi a makiti fu du ala san a wani. Te libisama wani sabi fa wan felon o kaba da den mu hali en go te na a kaba. Ma Yehofa naabi fu du a sani ya fu sabi fa sani o waka aini a ten di e kon. Yehofa abi a makiti fu poti a ten di a wani sani pasa. Te a yuu doo, da ai meke a sani di a wani pasa.​—Ek. 9:5, 6; Mat. 24:36; Toli 17:31.

Neen meke Beibel e koboloiki wowtu enke ‘mi poti en a mi ede kaba’ anga ‘mio meke a pasa’ fu soi san Yehofa e du te a wani wan sani pasa (2 Kow. 19:25; Yes. 46:11). Aini Hebrewtongo den wowtu de e meke u pakisei wan ‘sama di e meke doti patu’ (Yel. 18:4). Leti enke fa wan sama di e meke doti patu sa meke wan doti patu kon enke fa a wani, a so Yehofa sa meke sani pasa enke fa a wani.​—Efe. 1:11.

Yehofa e gi sama a okasi fu du sani enke fa den wani. Yehofa nai taki a fesi fa wan sama libi o waka. A nai dwengi sama di wani libi a wan letifasi fu du sani di o meke ogii miti den. Ai leli ala sama fu libi a wan letifasi. A so ai gi den taanga-sikin fu libi a wan fasi di o tyai wini gi den.

Meke u luku tu toli. A fosiwan a du fu den Ninifeisama. Yehofa be taki aw poli a foto, bika ná pikin ogii den sama ya be ogii. Ma di den soi taki den ogii di den be du be e hati den, Yehofa ‘á meke ogii miti den moo. Aa du san a be abi a pakisei fu du anga den moo’ (Yona 3:1-10). Yehofa á du san a be abi pakisei moo, bika den Ninifeisama aliki di a be wasikoi den. Den á be e du ogii moo.

A taa toli na a polofeititoli di be e taki fu Sirus. A man ya be o fii den Dyu di be de a katibo. A be o taigi den fu meke a tempel baka (Yes. 44:26–45:4). Kownu Sirus fu Persiya meke a polofeititoli ya kon tuu (Esra 1:1-4). Sirus á be e dini Yehofa, ma Yehofa meke a meke a polofeititoli kon tuu. Tokuso aa dwengi Sirus fu dini en.​—Odo 21:1.

Den sani di u luku aini a artikel ya, a wantu fu den sani di Yehofa e holi a pakisei te ai taki saw pasa aini a ten di e kon. Wa poi fusutan ala den sani di Yehofa e denki. Wa poi fusutan ala den sani di ai du tu (Yes. 55:8, 9). Toku den sani di a meke u kon sabi fu a koni di a abi fu taki saw pasa aini e ten di e kon, e yeepi u fu biibi taki ala yuu ai du sani a wan letifasi.