Bible enen̄ede anam idiọn̄ọ ke Jehovah ekeme nditịn̄ se iditịbede ke ini iso. (Isa. 45:21) Edi inemeke nte enye asan̄ade ọdiọn̄ọ, ini enye ọdiọn̄ọde, m̀mê adan̄a se enye emekde ndidiọn̄ọ. Ntre nnyịn iditịn̄ke nte imenen̄ede idiọn̄ọ. Edi se n̄kpọ ifan̄ emi idiọn̄ọde mi.

Jehovah ekeme ndinam se ededi emi enye oyomde ndinam, ibọhọke edi n̄kpọ emi enye ebierede ke imọ idinamke. Se ededi emi editịbede ke ini iso emi enye emekde nditịn̄, enye ekeme nditịn̄ sia ọniọn̄ esie inyeneke adan̄a. (Rome 11:33) Jehovah ekeme n̄ko ndibiere nditre ndidiọn̄ọ se iditịbede ke ini iso sia enye ekeme ndimụm idem n̄kama etieti. Idụhe eke akande enye ke enye oro.​—Men Isaiah 42:14 domo.

Jehovah esinam se enye aduakde etịbe. Enye oro asan̄a nso ye enye ndikeme nditịn̄ se iditịbede ke ini iso? Isaiah 46:10 anam ikụt. Do ọdọhọ ete: “Enye emi etịn̄de akpatre ke ntọn̄ọ, ndien ke eset enye etịn̄ mme n̄kpọ oro owo mînamke; Enye emi ọdọhọde ete, ‘Uduak mi ọyọsọn̄ọ ada, ndien nyanam kpukpru se mmade.’”

Ntre, ntak kiet emi Jehovah ekemede nditịn̄ se iditịbede ke ini iso edi ke enye enyene odudu ndinam n̄kpọ etịbe. Jehovah isinamke se nnyịn isinamde ndusụk ini emi isede fim m̀mê ikotde n̄wed. Man idiọn̄ọ utịt fim m̀mê n̄wed oro, imesinam fim oro ọsọp ekesịm utịt mîdịghe ikụbọde ika akpatre ibuot n̄wed oro. Ekpetịbe ntre, editie nte kpukpru se ididide ke iso ẹma ẹtetịbe, ke Jehovah onyụn̄ etetie onyụn̄ọ ese se ima ikanana nte etịbe ndien emen etịn̄ idahaemi. Utu ke oro, Jehovah ekeme ndibiere ke ini ntem ntem, ke n̄kpọ ntem ntem eyetịbe. Ini oro ama onyụn̄ ekem, enye anam n̄kpọ oro etịbe.​—Ex. 9:5, 6; Matt. 24:36; Utom 17:31.

Enye oro anam ẹma ẹyom nditịn̄ mban̄a ndusụk se Jehovah oyomde ndinam ke ini iso, Bible esidọhọ ke Jehovah ọdọhọ ke se imọ iyomde ndinam m̀mê ke se imọ iduakde ndinam edi oro. (2 Ndi. 19:25; Isa. 46:11) Ke usem emi ẹkedade ẹwet Bible, mme ikọ oro ẹsan̄a n̄kpọ ye ikọ emi ẹkabarede nte “oboteso.” (Jer. 18:4) Ukem nte oboteso emi ọdiọn̄ọde utom ekemede ndida mbat nnam ediye otu, Jehovah ekeme ndinam mîdịghe okpụhọde n̄kpọ man se enye aduakde etịbe.​—Eph. 1:11.

Jehovah ayak kpukpru owo ẹbiere se mmọ ẹyomde ndinam. Idụhe owo ndomokiet emi Abasi ama ekebebiere nte uwem esie editiede tọn̄ọ ke emana tutu enye akpa. Abasi isinyụn̄ inamke eti owo akanam n̄kpọ emi editode ke oro uwem esie atahade, mîdịghe n̄kpọ oro ada enye ibuot. Enye ayak kpukpru owo ẹbiere nte mmọ ẹdidude uwem. Edi enye ekpep kpukpru owo nnennen usụn̄ emi mmọ ẹkpedude uwem.

Se uwụtn̄kpọ iba mi. Akpa aban̄a mbon Nineveh. Jehovah ama ọdọhọ ke ẹyesobo obio oro ke ntak ibak mmọ. Edi ini mmọ ẹkabarede esịt, Jehovah ama “okpụhọ ekikere ke nsobo oro enye ọkọdọhọde ete ke iyosobo mmọ; inyụn̄ isoboke mmọ aba.” (Jonah 3:1-10) Jehovah eketre ndinam se enye ọkọdọhọde ke iyanam mbon Nineveh sia mmọ ẹma ẹmek ndikabade esịt ke ẹma ẹkekop etop emi Abasi akadade odụri mmọ utọn̄.

Ọyọhọ uwụtn̄kpọ iba edi prọfesi emi aban̄ade Cyrus emi edin̄wanade ekọn̄ ikan, emi edifakde mme Jew osio ke ubọk mbon emi ẹketan̄de mmọ ẹka idụt en̄wen, onyụn̄ ọnọ ewụhọ ete mmọ ẹfiak ẹkebọp temple Jehovah. (Isa. 44:26–45:4) Edidem Cyrus eyen Persia okosu prọfesi oro. (Ezra 1:1-4) Edi Cyrus ikatuakke ibuot inọ ata Abasi. Jehovah akada Cyrus osu prọfesi oro, edi enye ikenyịkke Cyrus ete atuak ibuot ọnọ imọ.​—N̄ke 21:1.

Ke n̄kpọ aban̄ade nte Jehovah esikemede nditịn̄ se iditịbede ke ini iso, idịghe kpukpru ke ineme emi. Se idude edi ke idụhe eke ekemede ndidiọn̄ọ kpukpru usụn̄ ye ekikere Jehovah. (Isa. 55:8, 9) Edi se Jehovah ayararede owụt nnyịn anam inen̄ede inịm ke enye esinam nnennen n̄kpọ kpukpru ini, idem ke ini enye etịn̄de se iditịbede ke ini iso.