Bible a tugha lere naa Jehôva a ne dzô é mam ma ye boban melu ma zu (Esaïe 45:21). Aa mane ki dzô é mam mesese ma tsinan aval a bo de, nge ki ôden, nge ki faa abim mam a top naa a yem. Éde, bii se ki mane yem é mam mesese Jehôva a ne dzô naa ma ye bo melu ma zu. Ve, bi nga yemang mam mézing.

Jehôva éé bele ki beniè, ve, a ne top naa aa kômô ki yem mam mézing. Y’é môra fakh dèñ, a ne kulan é dzam sese émièn a top naa a kulan (Bero. 11:33). Amu naa a bele môra ndjiène n’nem, a ne top naa aa yem ki é dzam da ye boban (A vaghane ya Esaïe 42:14).

Jehôva a ve naa nkômane wèñ ô dzalban. Aval avé dzam té da vole bia a yem é ngu’u a bele naa a kulan é mam ma ye boban melu ma zu ? Esaïe 46:10 a lere naa : « Atéé y’atarga, ma kulan amanegha, ye naa atéé ye metam ô mvus, ma dzô é mam méé be ki boban. Ma dzô naa : “Nkighane wom wa ye dzalban, ye naa, é mam mesese ma dzing, ma ye me bo.” »

Éde, akalgha évoo y’amu dzé Jehôva a ne kulan é mam ma ye boban melu ma zu, é ne naa, a bele ngu’u ya ve naa mam me boban. Jehôva éé se ki éban naa, a tare ke yem amanegha dzam ézing, aval ane biyong bizing bi wôla ke lang amanegha ye abakh naa bi yem aval da ye man. Ndaane de, Jehôva a ne kikh naa dzam ézing da ye boban ngura tam ézing, éyong té, a ve naa dzam té é boban é tam a va kikh de (Akô. 9:5, 6 ; Mat. 24:36 ; Bisè mintôl 17:31).

Akal dzam té, éde Bible a belane bifiè ane « a kôman », « a kulan », ye « a bo » naa a dzô é mam mézing Jehôva a bo akal melu ma zu (2 Bed. 19:25 ; atoan ; Esaïe 46:11). Bifiè bité be va konghlane bio atéé ye nkobe bifiè té da so nkobe, bi ne élat ye ayilgha ye bifiè « mbo mendak » (Jér. 18:4). Aval ane mbo mendak a ne akeng a ne bo mbemba ndak y’ékuan, éde Jehôva a ne bo nge ki a wule mam naa a dzale nkômane wèñ (Beéph. 1:11).

Jehôva a likh naa môt asese a belan é fili ya top dèñ. Jehôva éé dzi ki tare mane tsili aval kada môt y’ébe bia a ye ning. Ye naa, aa vaghle ki tsini besôsôe bebôt naa be bo é dzam da ye ve naa be tobe ntsaman. A likh naa kada môt a top aval émièn a kômô wule éning dèñ, ve, a yeghle be a ning aval da yiène.

N’yeneghane bifônane bibèñ. Éfônan ôsua da daghe é bôt be mbe béé ning a Nínive. Jehôva a nga kikh naa, kisoan té da ye tobe ntsaman étom mbia abo dulu deba. Ve, niène be ninivitas nge ki Beninivite be nga dzôban, Jehôva « a nga tsen nkighane wèñ, éde éé dzi ki be bo abé a nga dzô naa a ye be bo » (Jonas 3:1-10). Jehôva a nga tsen ôsimane wèñ nfa é dzam a nga dzô naa da ye bo Beninivite amu be nga belan é fili ya top deba naa be dzôban akal mbamane Jehôva a nga lôm be.

Éfônan bèè da daghe nkulan adzô wa tsinane Ciro nge ki Cyrus, é môt a nga yiène kôre Bejuif be mbe minkôm ye dzô naa be bera long é templo Jehôva (Esaïe 44:26–45:4). Kéza Cyrus ya Persia éñ’a nga dzale nkulan adzô té (Esdras 1:1-4). Ve, Cyrus éé nga kang ki ña Nzame. Jehôva a nga belane Cyrus nfa a dzale nkulan adzô té, ve, a nga likh naa, Cyrus émièn a ñong minkighane mièñ, kaa ñe yemle naa a kang ñe (Mink. 21:1).

Bebela a ne naa, a ne fave ayôm mam mézing bi va yen naa, Jehôva a ne belane me nfa a dzô é dzam da ye boban melu ma zu. Édi é ne bebela é ne naa, moan môt a binan éé se ki mane yem é dzam sese Jehôva a siman ye bo (Esaïe 55:8, 9). Ve, é mam Jehôva a nga kulan, ma yemle mebun mèè naa, é mam mesese a bo me ne sôsôe, amben éyong a kulan é mam ma ye bo melu ma zu.