Bible no ka no pen dɛ Jehovah botum akyerɛ dza obesi daakye. (Isa. 45:21) Naaso kwan a Jehovah fa do yɛ dɛm, anaa ber a ɔyɛ dɛm anaa mpo daakye ho nsɛm dodow ɔbɛpɛ dɛ ohu no dze, Bible no nnka ho nsɛm pii. Dɛm ntsi, tum a Jehovah dze yɛ dɛm no, yennyim ho nsɛm nyina. Naaso kakra a yenyim no, hom mma yensusu ho.

Jehovah yɛ dza ɔpɛ dɛ ɔyɛ biara, gyedɛ nankasa mmpɛ dɛ ɔyɛ. Jehovah ne nyansaa mu dɔ paa, ntsi biribiara a obesi daakye no, sɛ ɔpɛ a, obotum aka ho asɛm. (Rom. 11:33) Naaso osiandɛ otum hyɛ noho do paa ntsi, sɛ ɔmmpɛ dɛ ohu dza obesi daakye a, obotum ayɛ dɛm.—Fa toto Isaiah 42:14 ho.

Jehovah ma dza ɔpɛ ba mu. Ebɛn kwan do na dɛm nokwasɛm yi boa hɛn ma yɛtse Jehovah no tum a ɔdze kyerɛ dza obesi daakye no ase? Isaiah 46:10 ka dɛ: ‘Mifi ahyɛse meka ewiei no mekyerɛ, na mifi tsetseberdo meka dza wonnyae nnyɛe no mekyerɛ. Meka dɛ, M’apam begyina, na mebɛyɛ dza ɔsɔ m’enyi nyinara.’

Siantsir a Jehovah botum akyerɛ dza obesi daakye no, no mu kor nye dɛ ɔwɔ tum a obotum ama nsɛm bi esisi. Ntsi onnhia dɛ ɔkɔhwɛ dza obesi daakye no ho asɛm ansaana oetum ehu dza obesi. Ɔba no dɛm a, nna ɔakɛyɛ tse dɛ gyama oedzi kan ahyehyɛ dza obesi daakye no nyinara ato hɔ wɔ kwan bi do. Ntsi ɔwɔ mu ara a nna ɔaka dɛ, ‘Morokɔhwɛ dɛ ebɛn asɛm na mekaa dɛ obesi no.’ Mbom no, Jehovah botum esi gyinae dɛ ɔbɛma asɛm bi esi wɔ ber pɔtsee bi mu. Na sɛ dɛm ber no so a, obotum ama dɛm asɛm no aba mu.—Ex. 9:​5, 6; Matt. 24:36; Andw. 17:31.

Iyi ntsi, sɛ Bible no reka dza Jehovah yɛ wɔ nsɛm bi a ɔfa daakye ho a, ɔtaa dze nkasafua bi tse dɛ “mehyehyɛe” anaa ‘mabɔ me tsirmu’ dzi dwuma. (2 Ahe. 19:25; Isa. 46:11) Kasa ankasa a wɔkyerɛɛ dɛm nkasafua yi ase fii mu no, ne nkyerɛasee nye kasafua “ɔwemfo” nam. (Jer. 18:4) Dɛ mbrɛ ɔwemfo a onyim edwuma yie botum adandan dɛtse dze ayɛ kutu fɛfɛɛfɛw bi no, Jehovah so botum adandan ndzɛmba anaa nsɛm mu ama dza ɔpɛ no aaba mu.—Eph. 1:11.

Jehovah dze obiara ne pɛ ama no. Jehovah nnhyehyɛɛ obiara ne nkrabea anaa dza ɔbɔto no daakye no nntoo hɔ. Dɛmara so na ɔmma apapafo nnyɛ biribi a ɔdze hɔn bɔkɔ ɔsɛɛ mu. Mbom no, ɔdze obiara ne pɛ ama no, na otu hɛn fo dɛ yɛnyɛ dza ɔtsen.

Yensusu nsɛm ebien bi ho nhwɛ. Dza odzi kan no fa Ninevehfo no ho. Osian ndzɛmba bɔn a nna woebu do wɔ kurow no mu ntsi, Jehovah kaa dɛ ɔbɛsɛɛ kurow no pasaa. Naaso aber a Ninevehfo no nuu hɔnho no, Jehovah ‘sesaa n’adwen wɔ mbusu a ɔkaa dɛ ɔdze bɛba hɔn do no ho, na ɔannyɛ.’ (Jonah 3:​1-10) Ebɛnadze ntsi na Jehovah sesaa n’adwen? Ɔyɛɛ dɛm osiandɛ aber a ɔsomae ma wɔkɔbɔɔ hɔn kɔkɔ wɔ ndzɛmba bɔn a nna wɔreyɛ ho no, wofii hɔn akoma mu tsiei na wonuu hɔnho.

Dza a otsia ebien no yɛ nkɔnhyɛ a ɔfa ɔbarimba bi a nna wɔfrɛ no Cyrus ho. Wɔhyɛɛ nkɔm dɛ dɛm ɔbarimba yi bɛgye Jewfo efi nkowaasom mu, na ɔahyɛ mbra dɛ wɔnsan nkesi Jehovah n’asɔrfi no. (Isa. 44:26–45:4) Persiahen Cyrus maa dɛm nkɔnhyɛ yi baa mu. (Ezra 1:​1-4) Naaso, nna Cyrus nnsom nokwar Nyankopɔn no. Ɔwɔ mu dɛ Jehovah nam Cyrus do maa nkɔm a ɔhyɛe no baa mu dze, naaso ɔannhyɛ Cyrus dɛ ɔnsom no. Mbom no ɔmaa Cyrus nankasa sii gyinae wɔ nyia ɔbɔsom no no ho.—Mbɛ. 21:1.

Nnyɛ dza yɛaka ho asɛm yi nkotsee nye ndzɛmba a Jehovah hwɛ ansaana ɔakyerɛ dza obesi daakye. Dza ɔwɔ mu ankasa nye dɛ, hɛn mu biara nnyi hɔ a obotum atse Jehovah n’akwan nyinara ase ewie. (Isa. 55:​8, 9) Naaso, dza Jehovah ama yeehu afa no ho no ma yɛgye dzi paa dɛ ɔyɛ dza ɔtsen da biara, na ber a ɔdze ka daakye ho asɛm so ka ho.