Biblu ɖe xlɛ́ nyi wɛn ɖɔ Jexóva hɛn ɔ, é ná ɖɔ nǔ e ná jɛ ɖo sɔgúdo é. (Eza. 45:21) É tínmɛ gǒflɛ́mɛ e kunkplá lěe é ná wa mɔ̌ gbɔn é, alǒ hwenu e é ná wa mɔ̌ é ǎ, mɔ̌ jɛ́n é ma ɖɔ azɔn nabí e é wá gbeta ɔ kɔn bá tuun nǔ dó sɔgúdo wú é ǎ é nɛ́. Énɛ́ wú ɔ, mǐ tuun nǔ bǐ dó nǔwúkpíkpé e Jexóva ɖó bá ɖɔ nǔ e ná jɛ ɖo sɔgúdo é wú ǎ. Amɔ̌, nǔ kléwún ɖé lɛ́ tíin bɔ mǐ tuun.

Jexóva sɔ́ ɖó dogbó ɖě zɛ dogbó e éɖésúnɔ ɖó nú éɖée lɛ́ é wú ǎ. Jexóva sixú zán nǔnywɛ́ tɔn e ma ɖó dogbó ǎ é dó ɖɔ nǔ ɖěbǔ e sín gbeta kɔn é wá é ɖ’ayǐ. (Hlɔ̌. 11:33) Ðó é nɔ ɖu ɖo éɖée jí bɔ nǔ bǐ nɔ vɔ ɖ’é wú wútu ɔ, é sixú wá gbeta ɔ kɔn bo ná gɔn nǔ e ná wá jɛ lɛ́ é tuun.—Sɔ́ jlɛ́ dó Ezayíi 42:14 wú.

Jexóva nɔ bló bɔ linlin tɔn nɔ jɛnu. Nɛ̌ nǔgbó énɛ́ ka d’alɔ mǐ bɔ mǐ mɔ nǔ jɛ nǔwúkpíkpé e é ɖó bo ná ɖɔ nǔ e ná jɛ ɖo sɔgúdo é ɖ’ayǐ é mɛ gbɔn? Ezayíi 46:10 tínmɛ ɖɔ: “Un ko ɖɔ nǔ e ná wa wɛ un ɖe ɔ sín do. Nǔ e ma ko jɛ ǎ, bo ka ná wá jɛ ɔ, un ko ɖɔ ɖ’ayǐ sín tɛgbɛ. Un ɖɔ: nǔ e ná bló wɛ un ɖe ɔ ɖíe, bɔ é ka ná jɛ. Nǔ e jló mì lɛ́ ɔ, un nɔ bló bǐ.”

Énɛ́ wú ɔ, hwɛjijɔ e wú Jexóva sixú ɖɔ nǔ e ná wá jɛ ɖo sɔgúdo é ɖ’ayǐ é ɖokpó wɛ nyí ɖɔ é ɖó hlɔ̌nhlɔ́n bo ná bló bɔ nǔ lɛ́ ná jɛ. É byɔ́ ɖɔ Jexóva ní yi kpɔ́n nǔ e ná wá jɛ ɖo sɔgúdo lɛ́ é, lěe mǐ nɔ yi kpɔ́n vivɔnu fímu ɖé tɔn hweɖélɛ́nu bo ná dó tuun lěe nǔ lɛ́ ná fó gbɔn é ɖɔhun ǎ. É nyɔ́ wa ɔ, Jexóva sixú wá gbeta ɔ kɔn ɖɔ nǔɖé ná jɛ ɖo hweɖénu lě tawun, bɔ ényí hwe ɔ nu su ɔ, é ná bló bɔ nǔ ɔ ná jɛ.—Tín. 9:5, 6; Mat. 24:36; Mɛ. 17:31.

Ðó hwɛjijɔ énɛ́ wú ɔ, Biblu zán xógbe kpó xókwín kpó lěhun lɛ́ dó tínmɛ nǔ e Jexóva nɔ wa dó nǔ e ná wá jɛ ɖo sɔgúdo é ɖé lɛ́ wú: ‘ko to ɖ’ayǐ,’ “lɛ́n.” (2 Axɔ́. 19:25; Eza. 46:11) Xókwín dodó e è tínmɛ bɔ é ná xógbe kpó xókwín kpó énɛ́ lɛ́ é ɔ, xókwín e tínmɛ tɔn nyí “zɛ̌nmɛtɔ́” é kpó é kpó wɛ ɖibla xo nǔ dó akpa ɖokpó ɔ mɛ. (Jel. 18:2-4) Lěe zɛ̌nmɛtɔ́ alɔsekpɛ́nnánɔ ɖé sixú zán ko ɖé dó bló nǔ ɖagbe ɖé gbɔn é ɔ, Jexóva sixú bló, alǒ húzú alǒgwe kpó nǔ lɛ́ kpó bɔ linlin tɔn ná jɛnu.—Efɛ́. 1:11.

Jexóva nɔ yí gbe bɔ mɛ lɛ́ nɔ wá gbeta yěɖésúnɔ tɔn lɛ́ kɔn. É dó nǔɖé mɛɖé jí ǎ, mɔ̌ jɛ́n é ma ka nɔ lɛ́ sísɛ́ ayijlɔ́jlɔ́nɔ lɛ́ bónú yě ná wa nǔ e ná wa nǔ dó gbɛ yětɔn wú é ɖé ǎ é nɛ́. É yí gbe bɔ mɛ ɖokpó ɖokpó ná wá gbeta gbɛ e é ná zán é tɔn kɔn, amɔ̌, é kplɔ́n yě lěe yě ná zán gbɛ ɖagbe gbɔn é.

Mǐ ní gbéjé kpɔ́ndéwú we kpɔ́n. Kpɔ́ndéwú nukɔntɔn ɔ ɖɔ xó dó Ninívunu lɛ́ wú. Jexóva ɖɔ ɖ’ayǐ ɖɔ è ná gba toxo ɔ ɖó nǔ nyanya e yě nɔ wa lɛ́ é wú. Amɔ̌, ée hwɛ mɛ e ɖo toxo ɔ mɛ lɛ́ é tɔn vɛ́ nú yě é ɔ, é “lɛ́ lɛ́ kɔ wá gbeta e é ko ɖe tɔ́n ɔ jí, bɔ nǔ nyanya e dán é gblɔ́n nú yě ɔ, é sɔ́ bló ǎ.” (Jona. 3:1-10) Jexóva ɖyɔ́ linlin tɔn dó gbeta e kɔn é ko wá ɖ’ayǐ é wú, ɖó Ninívunu lɛ́ zán mɛɖésúsíninɔ yětɔn dó yí gbe nú wɛn akpágbanúmɛ tɔn e Jexóva sɛ́dó yě lɛ́ é kpó hwɛvɛ́númɛ kpó.

Kpɔ́ndéwú wegɔ́ ɔ wɛ nyí nǔɖɔɖayǐ e ɖɔ xó dó Silúsi e ná ɖe Jwifu lɛ́ sín kannumɔgbénu bo ná ɖe gbe nú yě ɖɔ yě ní vɔ́ tɛ́npli Jexóva tɔn gbá é wú é. (Eza. 44:26–45:4) Axɔ́sú Pɛ́si tɔn Silúsi bló bɔ nǔɖɔɖayǐ énɛ́ jɛnu. (Ɛsd. 1:1-4) É ɖo mɔ̌ có, Silúsi ka nɔ sɛn Mawu nǔgbó ɔ ǎ. Jexóva zán Silúsi dó bló bɔ nǔɖɔɖayǐ ɔ jɛnu; é ka hwlɛ́n acɛ e é ɖó bo ná wá gbeta mɛ e é ná sɛn é tɔn kɔn xá ɛ ǎ.—Nǔx. 21:1.

É ɖo wɛn ɖɔ, nǔ e Jexóva nɔ da kpɔ́n hwenu e é ɖo nǔ e ná wá jɛ ɖo sɔgúdo lɛ́ é ɖɔ ɖ’ayǐ wɛ é kpɛɖé kpowun nɛ́. È ma ná wa yɛ ǎ ɔ, gbɛtɔ́ ɖěbǔ sixú mɔ nǔ jɛ ali Jexóva tɔn lɛ́ mɛ bǐ mlɛ́mlɛ́ gbeɖé ǎ. (Eza. 55:8, 9) Amɔ̌, nǔ e mǐ tuun dó Jexóva wú é nɔ ná hlɔ̌nhlɔ́n nǔ e mǐ ɖi ɖɔ é nɔ wa nǔ lɛ́ ɖo ali e sɔgbe é nu hwebǐnu é; hwenu e é nɔ ɖɔ nǔ e ná wá jɛ ɖo sɔgúdo lɛ́ é lɔ ɖo nǔ énɛ́ lɛ́ mɛ.