Labib ka byen montré ki Jéova pouvé di sa ki ké rivé dimen (Is. 45:21). Mé i pa ka èspliké nou kouman é kitan i ka fè l’, ni menm ki kantité bagaj i ka désidé konnèt alavans. Donk, nou pa savé gran kichoz asou sa, mé nou gen plizyèr enfòrmasyon kanmenm. Annou wè déztrwa annan yé.

Jéova pouvé fè tousa i lé, mé détan, i gen sèrten bagaj i ka désidé pa fè. Gras a so sajès ki pa gen limit, i pouvé savé alavans tousa i lé (Rom. 11:33). Mé i pouvé désidé osi pa savé sa ki ké rivé dimen (gadé Isaïe 42:14).

Jéova ka fè so volonté fèt. Kouman sa ka idé nou konprann ki i pouvé savé sa dimen ké poté ? Isaïe 46:10 ka èspliké : « Dipi koumansman-an, mo ka di sa ki ké rivé a lafen, é dipi nanninannan, mo ka di bagaj-ya ki pòkò fèt. Men sa mo ka di : “Sa mo di, a sa ki ké fèt, é tousa ki ka fè mo plézi, mo ké fè l’.” »

Donk, roun bagaj ki ka fè ki Jéova pouvé savé sa dimen ké poté, a ki i pouvé fè bagaj-ya fèt, i gen sa pouvwar-a. I pa bézwen fè kou roun moun ki ka gadé roun fim é ki ka alé a lafen fim-an pou savé sa ki ké pasé. Parkont, Jéova pouvé désidé ki roun bagaj gen pou fèt roun moman byen prési, épi lò moman-an rivé, i ka fè sa ki fo pou sa bagaj-a fèt (Ex. 9:5, 6 ; Mat. 24:36 ; Actes 17:31).

A pou sa, lò Labib ka palé di fason Jéova ka désidé aji asou sa ki ké rivé dimen, i ka di parèkzanp : « préparé » ké « désidé fè l’ » (2 Rois 19:25 ; Is. 46:11). Sa ka vini di roun mo ébré ki fanmi ké rounòt mo ébré ki lé di ‘mouché-a ki ka travay latè gra’ (Jér. 18:4). Menm fason roun moun ki ka travay latè gra pouvé fè sa i lé ké l’ pou i divini roun bèl vaz, Jéova pouvé fè sa ki fo pou so volonté fèt (Éph. 1:11).

Jéova ka rèspèkté libèrté nou gen di chwazi. I pa ka désidé alavans kisa ki ké rivé annan lavi chak moun. I pa ka fòrsé pyès moun fè bon bagaj ouben bagaj ki ké fè yé mouri non plis. I ka lésé nou tout désidé kisa nou ké fè annan nou lavi toupannan i ka ankourajé nou pran bon désizyon-an.

Annou pran dé èkzanp. Pou koumansé, annou palé di moun Niniv-ya. Jéova té di ki kou i té gen patché méchansté annan vil-a, i té ké krazé l’. Mé kou moun-yan répanti, Jéova « chanjé lidé é i pa fè malò-a tonbé asou yé kou i té di yé » (Jon. 3:1-10). I rouvini asou sa i té di i té ké fè paské Ninivit-ya byen réyaji lò i avèrti yé. Yé répanti.

Annou wè dézyèm èkzanp-a : profési-a asou roun mouché yé té ka aplé Siris, ki té ké libéré Jwif-ya ki té prizonyé é ki té ké bay lòrd roukonstrwi tanp Jéova-a (Is. 44:26 – 45:4). A Siris, rwa pèrs-a, ki réyalizé sa profési-a (Esd. 1:1-4). Mé sa mouché-a pa té ka adoré vré Bondjé-a. Jéova itilizé l’ pou réyalizé roun profési mé i pa anpéché l’ chwazi kimoun i té lé adoré (Prov. 21:1).

Tousa nou wè la pa asé pou èspliké kouman Jéova ka rivé savé sa dimen ké poté. Anfèt, pyès moun pa pouvé rivé konprann annan tout ti détay kouman Jéova ka aji (Is. 55:8, 9). Mé, nou konnèt asé bagaj asou Jéova pou nou sir ki i toujou ka fè sa ki bon menm lò i ka di sa ki ké rivé dimen.