E kamatataaki n te Baibara bwa e kona Iehova n taekini kanoan taai aika a na roko. (Ita. 45:21) E aki raoi kabwarabwaraaki bwa e kangaa ke n ningai ae e karaoa iai anne ke mwaitira bwaai aika e baireia bwa e na atai. Ngaia are ti aki riai ni matoatoa i aoni baikanne. Ma iai bwaai tabeua aika ti riai n atai.

Akea tian ana konabwai Iehova, ma tii ngkana e bon rineia bwa e na aki karaoia. Ibukini wanawanana ae akea tiana, e kona ni kaman taekina taekan te bwai teuana are e bon taku. (IRom 11:33) Ibukina bwa e kaotiota te taubaang n te aro ae kororaoi, e kona n rineia bwa e na aki atai baika a na riki.—Kabotaua Itaia 42:14.

E kona Iehova ni kakororaoa nanona. E kangaa n irekereke anne ma ana konabwai n taekini kanoan taai aika a na roko? E kabwarabwaraaki ae kangai n Itaia 46:10: “I a kamani kaotii tokini bwaai man te moantai, ao bwaai aika tuai n riki mangkoangkoa. I kangai, ‘E na teimatoa au babaire, ao N na karaoa are I bon taku.’”

Ngaia are bukina teuana ngkai e kona Iehova n taekini kanoan taai aika a na roko, bon iai mwaakana ni kakoroi bukini bwaai. E kaokoro Iehova ma ngaira, bwa e aki tangiria bwa e na mataku moa ni kabanean te taamnei bwa e aonga n ataa motina. Ni kaitaraan anne, e kona Iehova ni baireia bwa tera ae e na riki n te tai teuana ao n taraia raoi bwa e na riki n taina.—TeOti. 9:5, 6; Mat. 24:36; Mwa. 17:31.

Ibukin aei, a kabonganaaki n te Baibara taeka aika “katauraoia,” “karaoia,” ao “baireia” ni kabwarabwaraa iai te bae karaoia Iehova ni kaineti ma baika a na riki n taai aika a na roko. (2Uea 19:25; kbn.; Ita. 46:11) A rairaki taeka aikai man te taeka n te moan taetae ae irekereke ma nanon te taeka ae “te tia karaomwangko.” (Ier. 18:4) N aron te tia karaomwangko ae mwaatai ae kona ni karaoa te bokaboka ae buabuataki bwa nnen te uee ae tamaroa, e kona naba Iehova ni karaoa ke ni kaangaraoi bwaai ibukini kakororaoan nanona.—IEbe. 1:11.

E karinea Iehova te bwaintangira ae inaomatara n rinea ae ti na karaoia. E aki kamani bairea maiun te aomata, ao e aki naba kariaia aomata aika raoiroi nanoia bwa a na karaoa te bwai teuana ae e na kairiia nakon te kamaunanakoaki. E kariaia aomata nako bwa a na kairi oini maiuia, ao e kaumakiia bwa a na rinea ae eti.

Iangoi katoto aika uoua. Te moani katoto e irekereke ma kaain te aba are Ninewe. E a kaman taekinna Iehova ae e na kamaunaaki te kaawa anne ibukini buakakaia kaaina. Ma ngke a rairi nanoia ao Iehova “e a manga iangoa te kabuanibwai are e taku bwa e na karokoa i aoia, ao e a aki karokoa.” (Iona 3:1-10) E bita ana iango Iehova ibukina bwa a kabongana inaomataia kaain Ninewe n rineia bwa a na raira nanoia ni kaineti ma ana kauring Iehova.

Te katoto ae te kauoua bon te taetae ni burabeti ibukin te tia kataenikai ae Tairati, are e na kainaomataia I-Iutaia man te taenikai ao n tua manga katean ana tembora Iehova. (Ita. 44:26–45:4) E kakororaoa te taetae ni burabeti anne Ueani Botia are Tairati. (Etira 1:1-4) Ma e aki taromauria te Atua ae koaua Tairati. E kabongana Tairati Iehova ni kakororaoa te taetae ni burabeti anne, ma e aki taumatoaia bwa e na taromauria.—TaeRab. 21:1.

Ni koauana, aikai boni bwaai tabeua aika e iaiangoi Iehova ngke e taekini kanoan taai aika a na roko. Akea te aomata ae kona n ota raoi n aron nako Iehova. (Ita. 55:8, 9) Ma baika ti atai ibukin Iehova, a kakorakoraaki iai ara onimaki bwa e boni kakaraoa ae eti n taai nako, ngkana e taekini naba kanoan taai aika a na roko.