Kpá Káí tẹ́lẹ bàlà kẽ kọọ̀ Jìhóvà é láá kọ́ nú ea é nááá dì deèsĩ́. (Àìz. 45:21) Náa baatẽ́ dénè nú ea kil ló nú ea náa vaá à gbĩ́ gè nyimá nú ea é nááá dì deèsĩ́, tṍó ea gbĩ́ gè nyimá nú ea nááá, àbèè gã́bug nú ea gbĩ́ gè nyimá kilma ló dì deèsĩ́. Vóà naa, née é láá dõogẽ kọ́ nú e Kpá Káí gáà kọ̀. Náa kal ló béè vó, nee sìgà gá ea dú bíi kọ é bugi togó booí.

Jìhóvà é láá naa kọ̀láá kà nú ea gbĩ́ gè naa, sõò sìgà tṍó, à ólò beeláfùl ge aa ló gè naa sìgà nu. Jìhóvà é láá kọ́ kọ̀láá kà nú ea é nááá dì deèsĩ́ be à bééláfùl ge naa vó, boo béè kọọ̀ kùbmà á gé ló a nyìmànù. (Róm̀ 11:33) Sõò boo béè kọ à ólò láá palàge lẹ̀ẹ̀là bel ló a bá, àé láá sà kọ náa é nyímàè nú ea é nááá.​—Doolé ló Àìzáíà 42:14.

Jìhóvà ólò naa kọ à bùlà á naaá. Mósĩ́ deè ní e níí é nveè bá nèi kọ é dã́ ból ló a nyìmànù ge kọọmá nú ea é nááá dì deèsĩ́ ẽ́? Kpá Àìzáíà 46:10 baatẽ́ kọọ̀: “M̀ ólò kọ́ nú ea é nááá lọl dààmà togó, vaá m̀ ólò gbẹẹ́ sĩ́ kọ́ nú ea gáà zẹẹ naaa. Nda kọ́ọ̀, ‘Nà béèlàfùl é nááá, vaá nda é náa kọ̀láá kà nú ea taním gè naa.’”

Ene kà nú ea náa vaá Jìhóvà é láá kọ́ nú ea é nááá dì deèsĩ́ dú boo béè kọọ̀ à íe kpóó gè naamá kọ̀láá kà nu. Náa ólò pẹẹ kil deèsĩ́ gé nyimá nú ea é nááá, belí kọọ̀ dénè nú ea é nááá dì deèsĩ́ beè zẹ́ẹ́ naaá vaá à gbóó kọ́ gbò nuá tṍó ea ni ẹb lọ̀l. Tãa vó, Jìhóvà é láá kọ́ kà lèlà tṍó e nu é nááá, vaá gbóó naa kọ á naaá kà lèlà tṍóá.​—Ẹ́xọ. 9:​5, 6; Máát. 24:36; Tóm 17:31.

Boo béè vó, Kpá Káí ólò tú gbò moǹ bel ea kọlà “m kpóògè dee ló,” “m náa,” nè “níà nà tóm̀ bùlà” loomá bel tṍó ea gé kọ́ nú e Jìhóvà ólò naa kilma ló dì deèsĩ́. (2 Kíǹ. 19:25; ekk.; Àìz. 46:11) Bà tab gbò tã́á belí lọl ló moǹ bel e bà ólò loomá bel kilma ló “neǹ dèm bã́.” (Jèr. 18:4) Dì belí bé e neǹ dèm bã́ ólò láá tú loo bã́ dèmà bã́ ea palàge dú lé naaá, níà bé e Jìhóvà ólò láá dèm àbèè ge nyaaná bá ló nu kọbé a bùlà ḿḿ-má naa ẽ́.​—Ẹ́fẹ. 1:11.

Jìhóvà ólò nvèè ka ló dì pọ́ì ea beè nèi. Náa ólò noo nú ea é nááá ló buù nen. Vaá náa ólò naa kọọ̀ gbò lé lab dògò á naa nú ea é nveè va tã̀àgã̀ ló. À ólò sọ̀tọ́ deè kọọ̀ buù nen á sà nú ea é náa, vaá à ólò siè va kpóó ló kọ bàá naa nú ea dú lé.

Bugi togó boo nakà bàà kà nu dòòmà báí. Túá kà dú ní ea kil ló pá Nínevà. Jìhóvà beè gbẹẹ́ sĩ́ kọọ̀ kyọ̀àsĩ́ é dọ boo boní boo béè ba pọ́lọ́ lab dògò. Sõò tṍó e gbò e bà di boní ọ́gá, Jìhóvà beè “òòma kẽè kyọ̀àsĩ́ ea beè kọ àé tẹ́lẹ̀ẹ̀ vá booá, vaá náa beè kyọ̀ nà va sĩ́.” (Jónà 3:​1-10) Jìhóvà beè nyaaná a bùlà boo béè kọọ̀ pá Nínevà beè tú ba dì pọ́ì siimá lé tóm vaá ọgá tṍó e bà dã́ ã̀àne ea né va.

Ní ea égè bàà kà nu dòòmà bá dú ní ea kil ló Sáírọ̀s, ea beè naa kọọ̀ pá Júù á aa ól síí-sii vaá tenmá kọ bàá gé tìb tọọ̀ káí Jìhóvà. (Àìz. 44:26–45:4) Méné Sáírọ̀s ea géè bẹ̀l Pésìà beè mm-mè kọ́ọ̀ bùlà Bàrìá. (Ẹ́zrà 1:​1-4) Sõò, Sáírọ̀s náa géè fã̀ kà-kà Bàrì. Jìhóvà beè tú Sáírọ̀s siimá tóm mm̀ ge mm-mè a bùlà, vaá náa beè tú bá kpóó siimáe kọ á fãèe.​—Pró. 21:1.

Mm̀ kà-kà, níì dénè nú e ni ló bel booí ní e Jìhóvà ólò zẹ́ẹ́ bugi togó boo besĩ́ à kálá kọ́ nu ea é nááá dì deèsĩ́é nì. Gbò nen náa é láá dã́ ból ló dénè bé e Jìhóvà ólò naa nu naa. (Àìz. 55:​8, 9) Sõò, gbò nú e Jìhóvà ni náa kọ é dã́ ból ló náa kọ é dẹlẹ nyíé boo kọọ̀ à ólò naa nú ea lelà​—bã̀àna tṍó ea kọ́ nú ea é nááá dì deèsĩ́.