Baabule la basɛ ti la niɛ peelumi ti Yehowa mi sɛla n wan eŋɛ beere sa’am mɛ. (Isa. 45:21) La ka tɔɣɛ pa’alɛ sore sɛka la sansɛka ti a ita bala bii yelese’a ti a bɔta ti a baŋɛ. Bala la, to ka mi Yehowa n wan eŋɛ yelese’a beere sa’am la yɛla za’a. Ge to mi yɛla fii mɛ.

Yehowa ta’an eŋɛ sɛla woo mɛ ge saŋa ase’a a ta’an loe ti a kan eŋɛ sɛla. A tari la yɛm ti la ka tara makerɛ, ti la pa’alɛ ti a ta’an baŋɛ yelese’a woo ti a bɔta ti a baŋɛ. (Arom 11:33) Ge eŋa n ani kasi ge ta’an nyɔkera amea la zuo, a ta’an loe ti a kan baŋɛ yelese’a n wan eŋɛ beere sa’am.—Dekɛ makɛ Isaiah 42:14.

Yehowa basɛ ti a puti’irɛ n de se’em la tuna la tuuma. Bala soŋɛ to la wani ti to bɔkɛ eŋa n ta’an baŋɛ sɛla n wan eŋɛ beere sa’am la? Isaiah 46:10 pa’alɛ ti: ‘Kɔ’ɔn ze’ele pi’ileŋo poan ti mam ni te’ele tɔɣɛ sɛla n wan ta eŋɛ pooren. Yuuma yuuma sa ti mam ni te’ele tɔɣɛ yelese’a n nan ka eŋɛ kurum. Mam yeti, mam puti’irɛ n de se’em n wan tum, mam wan eŋɛ sɛla ti n bɔta.’

Bala la, sɛla n basɛ ti to baŋɛ ti Yehowa wan ta’an baŋɛ sɛla n wan eŋɛ beere sa’am dela eŋa n tari paŋa ti a basɛ ti sɛla woo tum la. La yele ka pakɛ ti a baŋɛ sɛla n wan eŋɛ beere sa’am wuu tomam n ni bisɛ sinii baŋɛ lan wan ta ba’asɛ se’em la, ti la ana wuu yɛla la za’a puɣum eŋɛ mɛ ge ti Yehowa nyaa zi’a bisera. Ge Yehowa ta’an loe ti a baŋɛ sɛla n wan eŋɛ saŋa wana mɔpi poan ge nyaa basɛ ti la tum, sankaŋa san paɛ.—Yɛh. 9:​5, 6; Mt. 24:36; Tm. 17:31.

Bala zuo, Baabule la dekɛ la yelebɛa n de ‘maasum’ la ‘kɔ’ɛ puti’irɛ’ pa’alɛ Yehowa n iti se’em la beere sa’am yɛla ase’a. (2 Na. 19:25; Isa. 46:11) Ban lerege yelebɛa wa se’em la vuurɛ ta’an dɛna ‘ho yaɣum sɛla.’ (Yer. 18:4) Wuu yaɣumbasa n wan ta’an dekɛ yɔɣerɔ maalɛ dukɔ ti la ana soŋa se’em la, bala mea ti Yehowa wan ta’an ŋmɛresɛ yɛla ti la makɛ la a puti’irɛ n boti sɛla.—Ep. 1:11.

Yehowa bo nɛra woo la yɔ’ɔ ti a kɔ’ɛ a puti’irɛ. Yehowa ni ka te’ele pa’alɛ sɛla n wan eŋɛ nɛra vom poan bii a basɛ ti nɛresondoma eŋɛ sɛla n wan tari daaŋɔ paɛ ba. A bo nɛra woo la yɔ’ɔ ti a pa’alɛ eŋa n wan vɔna se’em. Ge a pa’alɛ la ton wan vɔna se’em ti la ana soŋa bɔ’ɔra tɔ.

Geele maɣesa wa bisɛ. Yia dela Ninevedoma la. Yehowa yuun tɔɣɛ biŋe ti ba putotuuma la zuo a wan sa’am tiŋa la. Ge nɛreba la n yuun tee ba puti’irɛ la, Yehowa yuun ‘zɔ ba nimbɔ̃’ɔ mɛ ge gu sa’aŋɔ la ti a maasum ti a dekɛ sa’am ba la.’ (Yna 3:​1-10) Yehowa yuun tee a puti’irɛ mɛ la eŋa n yuun yeti a sa’am Ninevedoma la, se’ere n sɔi la ba yuun tee ba puti’irɛ mɛ ban yuun wum Yehowa kaka la.

N yi’i la dela yetɔɣebiŋ’a n pa’alɛ Saarus n wan basɛ ti Yudadoma la lebe ta mɛ Yehowa pu’usegɔ yire la. (Isa. 44:26–45:4) Persia Naba Saarus yuun basɛ ti yetɔɣebiŋere wa tum tuuma mɛ. (Ezr. 1:​1-4) La boi bim ti Saarus yuun ka pu’useri yelemɛŋɛrɛ Naayinɛ la ge Yehowa yuun doose la a poan basɛ ti a yetɔɣebiŋ’a la tum tuuma ge me ka pɛregɛ Saarus ti a pu’usa en.—Mag. 21:1.

Ton geele sɛla wa dela yɛla fii ti Yehowa ni bisɛ, a san loe ti a mina sɛla n wan eŋɛ beere sa’am. Yelemɛŋɛrɛ, nɛra ka boi n wan ta’an bɔkɛ Yehowa n ti’iseri se’em ge ita a yɛla za’a se’em. (Isa. 55:​8, 9) Ge ton mi Yehowa yele se’em la basɛ ti to sakerɛ kpe’em mɛ ti, a iti la sɛla n de tontɔɔ saŋa woo hali a san loe ti a mina sɛla n wan eŋɛ beere sa’am.