Metrere Biblia tä niere Jehová ie dre rabai bare ja känenkäre ye gare kwin (Is. 45:21) Akwa metrere Jehová tä dre nuainne, ñongwane tä nuainne aune dre mika tö gare kwe jai ye ñan nieta jire kwe. Aisete kukwe ñaka nüke gare jökrä nie, yebätä kukwe ñan tärä niekäre nie, akwa kukwe ruäre abokän gare nie.

Jehová tö dre nuaindi ye erere raba nuainne akwa ruäre ngwane ñan tä ja töi mike nuainne. Niara töbätä kri ye medenbätä dre rabai bare ja känenkäre ye raba mike gare (Rom. 11:33) Akwa ja töi gobrain gare kwin ie ye medenbätä dre rabai bare ja känenkäre ye ñan tö mikai gare jai ngwane, ñan tä nuainne (Isaías 42:14 mikadre ñärärä).

Jehová tä ja töi mike nemen bare. Jehová ie dre rabai bare ja känenkäre gare kwin, ¿yebätä dre nemen gare nie? Isaías 46:10 tä mike gare: “Kukwe jämi nakainkä ye känenkri tita mike gare aune jondron jämi nemen bare ye tita mike gare kä kwati krubäte te. Tita niere: ‘Kukwe nieta tikwe ye täi kärekäre aune ti tö dre nuain ye erere tikwe nuaindi’”.

Aisete kukwe keteitibätä, Jehová ie kukwe ja känenkäre rabai bare ye gare ñöbätä ñan aune niara die tärä kukwe ye nuainkäre. Akwa Jehová käkwe kukwe rabai bare ye tuadre käne, ne kwe dre rabai ye rabadrera gare ie ye ñan ai ribeta kwe jai. Ñakare aune ñongwane kukwe ye mikai nemen bare kwe ye tä gare ie aune köbö ye tä nüke ngwane, niara tä mike nemen bare (Éx. 9:​5, 6; Mat. 24:36; Hech. 17:31).

Ye medenbätä Jehová tä kukwe ne erere niere “tikwe ükaninante”, “tikwe nuainbare,” aune “tikwe kukwe ne niebare” kukwe ne erere tä niere kukwe rabai bare jä känenkäre ye mikakäre gare (2 Rey. 19:25; nota; Is. 46:11). Kukwe hebreo yebiti bersikulo ne ketata ni “alfarero” o ni jondron sribekä dobrobiti yebätä (Jer. 18:4). Ñodre ni iti ie siä sribe gare kwin dobrobiti abokän raba siä sribere bä nuäre krubäte, ye erere arato Jehová raba kukwe ükete bängrabe, aune tö nuaindi ño ye erere tä nuainne, ne kwe niara töi ye rabadre bare (Efes. 1:11).

Jehová tä ni tuenmetre kukwe den akwle jai. Dre rabai bare ja känenkäre ni itire itire bätä ye niara ñan tä mike nemen bare, ne madakäre ñan tä nitre töi kwin mike ja dibiti kukwe käme nuainne abokän köböite kukwe tare raba nemen bare bätä, ñakare aune ño nünandre bäri kwin ye tä driere nie biti tä ni tuenmetre kukwe den akwle jai.

Kukwe namani bare kirabe, ketebubätä ani blite. Kena ye abokän nitre nünanka Nínive yebätä, juta yete nitre nämäne ja ngwen käme krubäte ye medenbätä Jehovakwe gaite niebare kwe, akwa nitre yete ye käkwe ja töi kwitani ye medenbätä Jehovakwe gaite käbämikani kwe ye ñaka nuainbare kwe (Jon. 3:​1-10) Nitre gaite käbämikani Jehovakwe akwa ¿ñobätä jä töi kwitaninta kwe? ñobätä ñan aune nitre Nínive ye gaite Jehovakwe namani gare ietre ye ngwane, ja töi kwitani kwetre.

Kukwe ketebu ye abokän Ciro käkwe nitre judío mikadi kwäre aune ju Jehovakwe ye ükate manain kwe (Is. 44:​26–45:4). Metrere rei Ciro käi Persia yekwe Profecía ne mikani bare (Esd. 1:​1-4). Akwa Ciro ye ñaka nämäne Ngöbö metre ye mike täte, aune Ciro yebiti Jehovakwe ja kukwei mikani nemen bare, akwa Jehovakwe ñaka mikani ja dibiti ja mikakäre täte (Prov. 21:1).

Erametre kukwe tärä keta kabre akwa metrere Jehová tä töbike ño aune ñobätä tä kukwe nuainne aune ñobätä kukwe rabai bare ja känenkäre gare ie yebätä, ye ñaka raba nüke gare jire ni kä nebätä ie (Is. 55:​8, 9). Akwa yebiti ta ni niara mikaka täte ye tä tö ngwen Jehová tä kukwe metre nuainne käre yei aune kukwe käbämikata ja känenkäre yei arato.