Ebiblia eyerekene bwinja oku Yehova aherhe obuhashe b’okumenya ebinji byaba mango mayinjire. (Isa. 45:21) Erharhubwirire buli choshi oku bilolere nka gurhe na mangochi anajira ntyo changwa kangana gurhe anachishoga kubimenya. Bobola rhurhakashiba rhwachibaza binene oku bilolere ebibazo bili nk’ebyola. Aliko, rhuganire ku mawazo malebe.

Yehova arhajira mipaka olekere ey’achihebereho yenyine. Eju y’obwengehe bwage burhaherhe mupaka, akaleba choshi choshi alonzeze. (Ro. 11:33) Bulala ajira engeso y’okuchigala eshinganene, akachishoga okurhamenya bichi byarhengerera. Ohuzanye na Isaya 42:14.

Yehova anajira obulonza bwage buyenere. Ngahe ebyola bibuganene n’obuhashe bwage b’okuleba eby’amango mayinjire? Isaya 46:10 haderhere ntya: “Kurhenga oku murhondero inandeba obuzinda, na kurhangira mira, inamba naderha ebintu birhaza kujirika. Inderhere: ’Omuhigo gwani nji gwayenera, n’echinsimisize, nji nachijira.’”

Bobola, mpanvu nguma omu zakarhuma Yehova agala kuleba amango mayinjire, eli oku, aherhe obuhashe b’okurhuma ebintu byaba. Birhamuhemere okw’amenye ebinji byaba omu mango mayinjire, kuguma n’oku mango maguma rhunalola efilme oku murhondero kuhika oku buzinda. Aliko, Yehova akachishoga amango chintu chilebe nji chayenera oku kasanzi kakwanene, n’okuj’achileka chiyenere amango byamahema ntyo.—Kut. 9:5, 6; Mt. 24:36; Mdo. 17:31.

Eju y’eyola mpanvu, Ebiblia ekoleseze ebinwa nka “kurheganya,” “kubijira,” n’oku “biderha” omu kuderhera oku bi Yehova ajira eju y’amango mayinjire. (2 Fa. 19:25; mahugulo m’eshishi; Isa. 46:11) Ebyola binwa bifasiribwe kurhenga omu lulimi lwamira omu kukolesa echinwa “mubumbi.” (Yer. 18:4) Kuguma n’ok’omubumbi akakolesa ebumba omu kukola chintu chilebe chinja, Yehova akabumba changwa kujira echintu ch’okuyeneza obulonza bwage.—Efe. 1:11.

Yehova anakenga oluhembo arhuhere l’okuchishoga ebi rhwajira. Arhapangaga ebyahikira buli muntu omu kalamo, changwa arhalekaga abantu b’emirhima minja, bajire echintu chibi chakarhuma balimbulwa. Ayemerere buli muntu achishoge okuntu alama, anabayigiriza gurhe bakalama akalamo kenja.

Rhuganire ku mifano 2. Omufano g’oburhanzi guli gw’abantu bali lamire omu Ninawi. Yehova alilebere okw’eyola vile y’akalimbwirwe eju y’obubi bwabo. Aliko amango abantu bamw’eyola vile bahungama, Yehova “ashuba kuwaza oku buhane aliderhere oku abalerhera, arhanachibulerhaga.” (Yon. 3:1-10) Yehova alihindamwire amawazo mage oku bilolere aby’abaga aderhere eju y’abantu be Ninawi, bulala balihungamire enyuma y’okuyunva omukonge Yehova abahaga.

Omufano gwa kabiri buli bulebi buderhere ku Koreshi w’omuhimanyi wakakulire Abayahudi omu buja n’okurhondera kushuba kuyumbaka ehekalu lya Yehova. (Isa. 44:26–45:4) Mwami Koreshi we Perse aliyeneze obola bulebi. (Ezr. 1:1-4) Aliko, Koreshi arhaliri aharamya Mungu w’okuli. Yehova alikoleseze Koreshi y’ayeneza obola bulebi bwage, aliko amuleka achishoge yenyine inde aharamya.—Mez. 21:1.

Okuderha okuli, ebyola bili bintu bigeke Yehova analola amango ali aleba oku bilolere amango mayinjire. Obukweri, nta muntu wakamenya bwinja bwinja enjira za Yehova. (Isa. 55:8, 9) Aliko, ebirhumenyere oku bilolere Yehova, bikomeze obwemere bwerhu okw’amango moshi ajira ebintu binja, biheberwemo n’amango anaba ey’ali aleba eju y’amango mayinjire.