Maathag nga ginasiling sang Biblia nga may ikasarang si Jehova nga mabal-an ang matabo sa palaabuton. (Isa. 45:21) Pero wala ginapaathag sang Biblia kon paano niya ini ginahimo, kon san-o niya ini ginahimo, ukon daw ano kadamo ang ginahibalo niya parte sa palaabuton. Gani wala kita kabalo sang tanan nga detalye parte sa sini nga ikasarang ni Jehova. Pero ari ang pila nga nabal-an naton.

Mahimo ni Jehova ang tanan nga gusto niya, pero may mga tion nga ginapunggan niya ang iya kaugalingon. Wala sing limitasyon ang kaalam ni Jehova, gani may ikasarang sia nga mabal-an ang bisan ano parte sa palaabuton. (Roma 11:33) Pero puede niya punggan ang iya kaugalingon nga indi paggamiton ini nga ikasarang.​—Ipaanggid ang Isaias 42:14.

Ginapahanabo ni Jehova nga matuman ang iya katuyuan. Paano ini makabulig sa aton nga mahangpan ang parte sa ikasarang ni Jehova nga mabal-an ang matabo sa palaabuton? Ang Isaias 46:10 nagasiling: “Halin sa ginsuguran gintagna ko ang mahanabo, kag ang mga butang nga wala pa matabo. Nagasiling ako, ‘Ang akon pamat-od matuman, kag himuon ko ang luyag ko.’”

Gani ang isa ka rason kon ngaa may ikasarang si Jehova nga mabal-an ang matabo sa palaabuton amo ini: May gahom sia nga pahanabuon ang gusto niya nga matabo. Indi buot silingon sini nga nakita na ni Jehova ang mga matabo sa palaabuton nga daw pareho lang nga natabo na ini. Indi ini pareho sa pagtan-aw sa isa ka pelikula nga puede lang unahon tan-awon ang katapusan sini para mabal-an naton dayon kon ano ang matabo. Sa baylo, may ikasarang si Jehova nga magdesisyon kon ano ang gusto niya nga himuon sa iya gintalana nga tion. Dayon kon mag-abot na ina nga tion, pahanabuon gid niya ini.​—Ex. 9:​5, 6; Mat. 24:36; Binu. 17:31.

Ginagamit sa Biblia ang mga tinaga pareho sang “ginhanda,” “ginporma,” kag “gintuyo” para ilaragway ang ginahimo ni Jehova parte sa pila ka hitabo sa palaabuton. (2 Hari 19:25; footnote; Isa. 46:11) Ang tinaga sa orihinal nga lenguahe nga gin-translate “ginhanda,” “ginporma,” kag “gintuyo” may kaanggid sa tinaga nga nagakahulugan sing “maninihon.” (Jer. 18:4) Pareho sa isa ka maninihon nga makasarang maghimo sang isa ka matahom nga suludlan halin sa daga, masarangan ni Jehova nga maniobrahon ang mga butang para matuman ang iya katuyuan.​—Efe. 1:11.

Ginatugutan ni Jehova ang mga tawo nga magdesisyon kon ano ang gusto nila nga himuon. Wala sia nagadesisyon kon ano ang matabo sa kabuhi sang kada tawo. Wala man niya ginamaniobra nga makahimo sing malain ang maayo nga mga tawo nga magaresulta sa ila kalaglagan. Ginatugutan niya ang tanan nga tawo nga magdesisyon kon ano ang gusto nila nga himuon sa ila kabuhi, pero ginapalig-on niya sila nga himuon ang husto.

Binagbinaga ining duha ka halimbawa. Ang una nga halimbawa amo ang natabo sa mga taga-Ninive. Gintagna ni Jehova nga laglagon sila bangod sang ila malain nga ginahimo. Pero sang naghinulsol sila, ‘nagbag-o ang hunahuna ni Jehova kag wala na niya ginpahanabo ang kalaglagan nga ginsiling niya nga himuon niya sa ila.’ (Jon. 3:​1-10) Sang nabatian sang mga taga-Ninive ang paandam ni Jehova, nagdesisyon sila nga maghinulsol. Gani ginbag-o ni Jehova ang iya hunahuna parte sa iya gintagna nga matabo sa ila.

Ang ikaduha nga halimbawa amo ang tagna parte kay Ciro. Suno sa tagna, Ciro ang ngalan sang magahilway sa mga Judiyo sa ila pagkabihag kag manduan niya sila nga kay-uhon ang templo ni Jehova. (Isa. 44:26–45:4) Gingamit ni Jehova si Hari Ciro sang Persia para matuman ini nga tagna. (Esd. 1:​1-4) Pero, wala nagasimba kay Jehova si Ciro. Gintugutan ni Jehova si Ciro nga magdesisyon kon sin-o ang gusto niya nga simbahon.​—Hulu. 21:1.

Pila lang ini sa mga butang nga nabal-an naton parte sa ikasarang ni Jehova nga mabal-an ang matabo sa palaabuton. Siempre, indi gid naton mahangpan sing bug-os ang tanan nga ginahunahuna kag ginahimo ni Jehova. (Isa. 55:​8, 9) Pero ining nabal-an naton parte kay Jehova makapabakod na sang aton pagtuo nga ginahimo gid niya pirme kon ano ang husto. Gani makasalig kita nga ginagamit niya sa husto nga paagi ang iya ikasarang nga mabal-an ang matabo sa palaabuton.