Phau Vajlugkub yeej qhia tseeb tias Yehauvas paub txog tej uas yuav tshwm sim rau yav tom hauv ntej. (Yaxayas 45:21) Phau Vajlugkub tsis qhia kiag tias vim li cas Yehauvas ho qhia tej qho uas yuav tshwm sim yav tom hauv ntej hos tej qho ho tsis qhia. Yog li ntawd, peb tsis paub txhua yam txog Yehauvas lub peev xwm uas paub txog yav tom hauv ntej. Tiam sis kuj muaj qho yam uas peb paub txog.

Yehauvas yeej ua tau txhua yam uas nws xav ua tiam sis tej thaud muaj tej yam nws kuj txiav txim siab tsis ua. Yehauvas muaj laj lim tswv yim kawg nkaus. Yog li ntawd, nws xav qhia tias yam twg yuav tshwm sim tom hauv ntej los yeej tau. (Loos 11:33) Tiam sis vim Vajtswv tswj tau nws tus kheej, nws thiaj tswj kom txhob paub txog qho yam uas yuav tshwm sim tom hauv ntej.​—Muab piv rau Yaxayas 42:14.

Yehauvas ua kom muaj raws li nws siab nyiam. Qhov no pab tau peb to taub li cas txog qhov uas Yehauvas muaj peev xwm paub txog yav tom ntej? Yaxayas 46:10 hais tias: “Thaum chivkeeb kuv twb yeej qhia zaj uas yuav tshwmsim los thaum ntiajteb yuav kawg lawm. Kuv hais tias, ‘Tej uas kuv twb npaj lawm yuav nyob khov kho; kuv yuav ua txhua yam kom tiav raws li kuv tau npaj tseg lawm.’”

Yehauvas muaj hwj chim nws thiaj ua tau raws li tej uas nws tau hais tias yuav tshwm sim yav tom hauv ntej. Yehauvas tsis muab lub caij lub nyoog kiv mus rau yav tom ntej ib yam li peb kiv ib zaj yeeb yaj kiab mus rau tom kawg kom nws paub tias tau muaj dab tsi tshwm sim yav tom hauv ntej. Tiam sis Yehauvas txiav txim siab tias dab tsi yuav tshwm sim rau lub sij hawm twg ces thaum txog lub sij hawm ntawd, nws ua kom tshwm sim xwb.​—Khiav Dim 9:5, 6; Mathais 24:36; Tes Haujlwm 17:31.

Phau Vajlugkub siv lo lus “npaj” los piav txog qho yam uas Yehauvas yuav ua rau yav tom hauv ntej. (2 Vajntxwv 19:25; Yaxayas 46:11) Lo lus npaj yog txhais los ntawm ib lo lus Henplais uas txhais tias tus puab lauj kaub av. (Yelemis 18:4) Yehauvas zoo li ib tug txawj puab lauj kaub av vim nws muaj peev xwm kho thiab hloov tau txhua yam kom raws li nws pom zoo.​—Efexus 1:11.

Yehauvas pub kom muaj kev ywj pheej. Nws tsis txiav txim siab ua ntej tias ib tug lub neej yuav xaus li cas thiab nws tsis tau teem ib lub sij hawm cia tias cov neeg zoo yuav raug xwm txheej kom poob lawv txoj sia li cas. Nws tsuas qhia kom peb paub coj peb lub neej raws li tsim nyog xwb, thiab nws cia txhua tus muaj rab peev xwm txiav txim siab seb lawv yuav coj los tsis coj.

Cia peb xav txog ob qho piv txwv no. Thawj qho piv txwv yog hais txog cov pej xeem hauv lub nroog Nineves. Yehauvas qhia tias lub nroog ntawd yuav raug puas tsuaj vim lawm ua phem ua qias. Tiam sis thaum cov pej xeem hauv lub nroog ntawd lees txim thiab hloov dua siab tshiab, Yehauvas “thiaj hloov siab thiab tsis rau txim rau lawv raws li uas nws tau hais tseg.” (Yaunas 3:1-10) Yehauvas hloov siab tsis ua li nws tau hais vim cov Nineves txiav txim siab mloog Yehauvas cov lus ceeb toom lawm.

Qhov piv txwv ob yog hais txog tus vaj ntxwv Xailas uas yuav tso cov Yudais dim ntawm kev ua cev qhev thiab txhim kho Yehauvas lub tuam tsev. (Yaxayas 44:26–45:4) Vaj ntxwv Xailas ua tiav raws li tej lus faj lem hais tseg. (Exalas 1:1-4) Xailas tsis pe hawm tus tseem Vajtswv. Txawm li ntawd los Yehauvas siv Xailas kom muaj tiav raws li cov lus faj lem xwb thiab tsis yuam Xailas pe hawm nws.​—Pajlug 21:1.

Qhov no tsuas piav me ntsis txog Yehauvas lub peev xwm paub txog yav tom hauv ntej xwb. Yeej tsis muaj ib tug neeg twg yuav paub Yehauvas txoj kev xav thiab tej uas nws ua txhij txhua. (Yaxayas 55:8, 9) Txawm li ntawd los, tej uas peb paub txog Yehauvas yeej pab peb ntseeg ruaj khov tias txhua yam Yehauvas ua, yeej yog qhov zoo thiab qhov yog tas li.