Baibel ese ia hahedinaraia Iehova be vaira negai idia vara gaudia ia perovetalaia diba. (Isa. 45:21) Ia ese unai ia karaia dalana, edena nega ai, eiava ia dibaia gaudia ia herevalaia lasi. Unai dainai Iehova ese vaira negana ia perovetalaia daladia ibounai ita lalopararalaia diba lasi. To inai gau haida ita lalopararalaia diba.

Iehova be ia ura karaia gaudia ibounai ia karaia diba, to nega haida gau haida ia karaia lasi. Iehova ena aonega be bada herea dainai, ia abia hidi gaudia ia perovetalaia diba. (Roma 11:33) Bona Iehova be sibona ia biagua goevagoeva dainai, abia hidi ia karaia diba, do ia vara gauna ia laloa lasi totona.—Isaia 42:14 hahegeregerea.

Iehova be ena ura ia hagugurua totona kara ta ia karaia. Edena dala ai unai ese ita ia durua vaira negana ia perovetalaia dalana ita lalopararalaia totona? Isaia 46:10 ia gwau: “Dokona ai do idia vara gaudia be matamana ai lau gwauraia, bona idia do vara lasi gaudia be gunaguna lau gwauraia vadaeni. Lau gwau, ‘Lau karaia abia hidi do lau haidaua lasi, bona egu ura gauna do lau karaia.’”

Unai dainai Iehova ese vaira negai do idia vara gaudia ia perovetalaia ena badina ta be, ia be mai ena siahu gau ibounai ia karaia totona. Iehova be vaira negai do idia vara gaudia dibaia karana ia laloa lasi, hegeregere nega haida ita ura muvi ta ena dokona ita itaia badina do ia vara gauna ita ura diba. To Iehova be ia abia hidi negana ai, gau ta ia karaia diba bona unai nega ia ginidae neganai, kara ta ia karaia.—Eso. 9:​5, 6; Mat. 24:36; Kara 17:31.

Unai dainai, Baibel ese inai hereva, “hegaegaelaia” bona “palanilaia” ia gaukaralaia, Iehova ese vaira nega ai ia karaia gaudia haida ia herevalaia totona. (2 Ki. 19:25; Isa. 46:11) Unai hereva be inai hereva, “uro karaia tauna” ida idia hahegeregerea. (Ier. 18:4) Uro karaia tauna ese raro amo uro namona ta ia karaia hegeregerena, Iehova ese gau haida ia karaia diba ena ura ia hagugurua totona.—Efe. 1:11.

Iehova ese taunimanima dekenai maoro ia henia, sibona edia abia hidi idia karaia totona. Ia ese ta ena mauri ai do idia vara gaudia ia gwauraia lasi. Danu, taunimanima namodia ia doria lasi gau ta do idia karaia, unai amo dika do idia davaria. Bona ita ibounai ia koua lasi sibona iseda abia hidi ita karaia totona, to ita dekenai dala maorona ia hadibaia.

Mani inai haheitalai rua ita laloa. Ginigunana be, Nineva taudia. Unai siti ai kara dika be bada herea dainai Iehova ia peroveta do ia hadikaia. To unai siti taudia idia helalo-kerehai dainai, Iehova ese “ena lalona ia haidaua bona idia ia hadikaia lasi.” (Iona 3:​1-10) Nineva taudia be Iehova ena hahemaoro herevana idia kamonai neganai, abia hidi idia karaia idia helalo-kerehai totona. Unai dainai Iehova ese idia totona ia perovetalaia gauna ia karaia lasi.

Iharuana be, Iehova ese Kurese totona ia perovetalaia gauna. Kurese ese igui hesiai amo Iuda taudia ia ruhaia bona oda ia henia Iehova ena dubu helaga idia haginia lou totona. (Isa. 44:26–45:4) Parasa ena King Kurese ese unai peroveta herevana ia hagugurua. (Esr. 1:​1-4) To, Kurese be Dirava momokani ia tomadiho henia lasi. Iehova ese Kurese ia gaukaralaia unai peroveta herevana ia hagugurua totona, to Kurese ia doria lasi ia do ia tomadiho henia.—Aon. 21:1.

Oibe, Iehova ese vaira negai do idia vara gaudia ia perovetalaia neganai, unai gaudia haida ia laloa. Momokani, taunimanima ta ese Iehova ena lalohadai bona ia karaia gaudia do ia lalopararalaia diba lasi. (Isa. 55:​8, 9) To, Iehova ese ia hahedinaraia gaudia ese iseda abidadama ia hagoadaia, badina ita diba nega ibounai ia karaia gaudia be maoro, bona vaira negai ia perovetalaia gaudia danu.