An Biblia tu ólchal abal a Jehová in éjtowal kin exlaʼ jawaʼ neʼets ka watʼey axi taʼtal a kʼicháj (Is. 45:21). Pero yab tu ólchal jaykʼiʼ tin tʼajál ani jantʼiniʼ tin tʼajál. Jaxtám, waʼats yan jantʼoj axi yab i exlál tin kwéntaj a Jehová. Pero ki tsuʼuw jantʼoj i exlál tin kwéntaj a Jehová.

A Jehová in éjtowal kin tʼajaʼ jantʼojákits. Pero junchikíl in takuyal yab kin tʼajaʼ. A Jehová lej tsalpadh, jaxtám in éjtowal kin exlaʼ jawaʼ kin léʼnaʼ (Rom. 11:33). Pero jayej in éjtowal kin takuy yab kin exlaʼ jawaʼ neʼets ka watʼey (ka jumbiy kʼal Isaías 42:14).

A Jehová in éjtowal kin tʼajaʼ ka putun in tsalápil. ¿Jantʼoj in éjtowal kin tʼajaʼ a Jehová tam kin uluw abal neʼets kin tʼajaʼ jantʼoj? Isaías 46:10 in ulal: «Ma ti biyál Nanáʼ u uluwits jawaʼ neʼets ka watʼey, neʼets ku putuw jawaʼ u tsalpayámal ku tʼajaʼ. U tsalápil neʼets ka putun antsanáʼ jantʼiniʼ Nanáʼ u ulúmal».

Axéʼ tu tólmiyal ki exbay jaleʼ ti a Jehová in éjtowal kin exlaʼ jawaʼ neʼets ka watʼey, kom jajáʼ in kwaʼal an tsapláb abal kin tʼajaʼ. Abal wawáʼ ki ejtow ki exlaʼ jantʼiniʼ tu talél jun i libro o jun i película, in yéjenchal ki okʼxinchij, pero a Jehová yab in yéjenchal kin tʼajaʼ nixéʼ abal kin exlaʼ jantʼoj neʼets ka watʼey axi taʼtal a kʼicháj. Jawaʼ in tʼajál a Jehová játs kin takuy jaykʼiʼ tin léʼ ka watʼey jantʼoj, ani tam kin bajuw nixéʼ a kʼicháj in tʼajál abal ka putun (Éx. 9:​5, 6; Mat. 24:36; Hech. 17:31).

Jaxtám a Jehová in eyendhál i kaw ejtíl axéʼ, «u tʼojojoy», «u tʼajámal» ani «u tsalpayámal ku tʼajaʼ». Kʼal axéʼ xi kaw in tejwamedhál jawaʼ neʼets kin tʼajaʼ talbél (2 Rey. 19:25; nota; Is. 46:11). Ti hebreo, axéʼchik xi kaw u eyendhábak abal jun i atikláb axi in tsʼejkálak i eyextaláb kʼal i anam (Jer. 18:4). Antsanáʼ jantʼiniʼ an atikláb in éjtowal kin tʼojojoy an anam abal kin tsʼejkaʼ jun i eyextaláb axi lej alabél, a Jehová in éjtowal kin tʼojojoy jawaʼ in tsalpayal kin tʼajaʼ abal ka putun in kulbétal (Efes. 1:11).

A Jehová tu jilchal ki takuy ti kwetemtal jawaʼ i léʼ ki tʼajaʼ. A Jehová yab in kwaʼal dhuchadh jawaʼ neʼets kin watʼaʼ jun i atikláb tin ejatal ani yab in nixoknál nibal jitaʼ abal kin tʼajaʼ jantʼoj kʼal axi neʼets ka odhnáj. Jawaʼ in tʼajál játs tu ku exóbchij jantʼiniʼ ku kʼwajiy ani talbél tu jilchal ki takuy jantʼoj neʼets ki tʼajaʼ.

Ki tsuʼuw tsab i tʼiplab tin kwéntaj axéʼ. Okʼox ki tsuʼuw tin kwéntaj an atiklábchik axi u kʼwajilak ti Nínive. An atiklábchik axi tanáʼ u kʼwajilak lej pojkaxak, jaxtám a Jehová in uluw abal neʼetsak kin talabedhaʼ an bichow. Pero, kom axéʼchik xi atikláb tʼeʼpin kʼal in wálab ani in jilaʼ kin tʼajaʼ jawaʼ kidháb, a Jehová in jalkʼuy jawaʼ in tsálpayalak kin tʼajaʼ ani yabáts in talabedhaʼ an bichow (Jon. 3:​1-10). ¿Jaleʼ tin jalkʼuy in tsalápil a Jehová? Kom an ninivitas in atsʼaʼchik jawaʼ a Jehová in tsálpayalak kin tʼajaʼ ani jajáʼchik in takuy kin jalkʼuy in ejatal.

An tsabchíl tʼiplab pel a Ciro, jajáʼ neʼetsak ka tólmixin abal ka walkáj an judíos ani neʼetsak kin uluw abal ka tsab tsʼejkaʼ an templo in kʼál a Jehová (Is. 44:​26–45:4). Axéʼ xi kaw in putuw an tsʼalej Ciro axi ti Persia (Esd. 1:​1-4). A Ciro yab in kʼakʼnálak a Jehová. A Jehová in eyendhaʼ a Ciro abal kin putuw jun i kʼej kaw axi ti Biblia, pero yab jaykʼiʼ tin nixoknaʼ abal ka tʼójonchat (Prov. 21:1).

Axéʼ játs talchik i tsalap axi a Jehová in tʼajál ti kwéntaj abal kin exlaʼ jawaʼ neʼets ka watʼey axi taʼtal a kʼicháj. Belits antsanáʼ, yab jaykʼiʼ neʼets ki bajuw ki exbay jantʼoj in tsalpayal a Jehová ani jantʼoj neʼets kin tʼajaʼ abal kin putuw jawaʼ in tsalpayal kin tʼajaʼ (Is. 55:​8, 9). Pero jawaʼ tsipilín i exlál tin kwéntaj a Jehová, tu tólmiyal ki belaʼ abal Jajáʼ etsʼey neʼets kin tʼajaʼ jawaʼ tekedh, ejtíl tam tu ku uchaʼ jantʼoj neʼets ka watʼey axi taʼtal a kʼicháj.