Bup Kudus madahka, Jehovah nemu utai ti deka nyadi jemah ila. (Isa. 45:21) Tang Bup Kudus nadai madah enggau silik pasal baka ni tauka kemaya Iya nemu utai nya, tauka ni penyampau utai ke deka ditemu Iya. Nya alai, kitai enda nemu semua utai bekaul enggau penau Jehovah ke ulih nemu pasal utai ti deka nyadi jemah ila. Taja pia, peratika sekeda utai ke ditemu kitai.

Jehovah ulih ngereja nama-nama utai ti dikedekaka Iya. Tang kekadang, Iya milih enggai ngereja sekeda utai. Penemu-dalam Jehovah nadai tatak. Iya ulih ngena penemu-dalam nya madahka sebarang utai ti dikedekaka Iya. (Rom. 11:33) Tang ketegal Iya ulih nagang diri enggau sempurna, Iya milih enggai nemu sekeda utai ke deka nyadi.

Jehovah ngasuh peneka Iya nyadi. Baka ni tu bisi kaul enggau penau Jehovah ke ulih nemu pasal utai ke deka nyadi jemah ila? Isaiah 46:10 madahka: “Kenyau ari pun kelia, Aku udah madahka utai ti deka nyadi. Dulu kelia Aku udah madahka utai ti deka nyadi. Aku madahka pelan Aku endang enda nemu lebu, lalu madahka Diri deka ngereja semua utai ti deka dikereja Aku.”

Siti kebuah Jehovah ulih nemu utai ti deka nyadi jemah ila iya nya, Iya bisi kuasa ngasuh sesiti utai nyadi. Kekadang, kitai engka meda pengujung sesiti cherita wayang ngambika nemu pengujung cherita nya. Tang Jehovah enda ibuh ngereja nya kena nemu pasal utai ke deka nyadi jemah ila. Jehovah ulih nentuka jam alai sesiti utai nyadi, lalu ngasuh utai nya nyadi ba maya ti udah ditetapka Iya.​—P-sut. 9:​5, 6; Mat. 24:36; SKR. 17:31.

Ketegal nya, Bup Kudus ngena leka jaku “ngelanggur” enggau “diperambu” kena ngambarka utai ti digaga Jehovah pasal sekeda utai ti deka nyadi. (2 Raj. 19:25; Isa. 46:11) Leka jaku tu disalin ari jaku asal ke bisi kaul enggau reti “tukang periuk.” (Jer. 18:​2-4) Baka siku tukang periuk ti landik, ke ulih ngaga tanah liat nyadi pasu ti manah, Jehovah ulih ngereja sebarang utai kena ngamatka peneka Iya.​—Eps. 1:11.

Jehovah ngelakka orang ngaga pemutus ke diri empu. Iya enda nentuka utai ke deka nyadi ba pengidup siku-siku orang. Iya mega enda ngasuh orang ti manah ngereja utai ti tau ngujungka sida dirusak. Taja pan Iya ngelakka semua orang milih jalai pengidup ke diri empu, tang Iya seruran meransang sida milih jalai pengidup ti betul.

Peratika dua iti chunto. Chunto kesatu nya pasal orang ba Nineweh. Jehovah udah dulu madah, nengeri nya deka dirusak ketegal orang ba dia balat jai. Tang lebuh sida nesal ati, Jehovah “ngubah runding Diri, lalu enda nyadi ngukum sida.” (Jon. 3:​1-10) Jehovah ngubah runding Iya laban orang Nineweh ngaga ubah pengudah sida nemu pasal utai ke deka digaga Jehovah ngagai sida.

Chunto kedua nya pasal jaku benabi bekaul enggau raja ke benama Sairus. Jehovah udah madah, Raja Sairus deka ngelepaska orang Judah, lalu ngasuh sida nirika baru Rumah Sembiang Jehovah. (Isa. 44:26–45:4) Raja Sairus ari Persia ngamatka jaku benabi nya. (Esr. 1:​1-4) Taja pia, Sairus enda nyembah Petara Jehovah. Jehovah ngena Sairus ngamatka jaku benabi tu, tang Iya enda ngansak Sairus nyembah Iya.​—J-lam. 21:1.

Endang amat, tu semina sekeda utai ti diperundingka Jehovah lebuh Iya ngena penau Iya ke ulih nemu utai ti deka nyadi jemah ila. Au, nadai mensia ke ulih meretika semua utai pasal chara Jehovah berunding sereta ngereja utai. (Isa. 55:​8, 9) Tang utai ti ditemu kitai pasal Jehovah, ngasuh kitai arap agi, Jehovah deka seruran ngereja utai ti betul, nyengkaum lebuh Iya madahka utai ti deka nyadi jemah ila.