Kagian na Biblia nga mawayya ni Jehova nga ammuan i mappange. (Isa. 45:21) Ngem ari na nga detalyadu nga kagian nu kunnasi onu sonu anni na kuan yatun onu kunnasi karu i ammuan na meyannung ta mappange. Yari tu ari tam gafu malippawa tu mapia yatun. Ngem egga ira i karuan tu gannug nga ammu tam meyannung tatun.

Makua ni Jehova i maski anni ngem pilian na i kuan na. Awan tu pagaddetan na pakannammu na yari tu mekagi na i mesimmu ta mappange basta kayà na nga kuan yatun. (Roma 11:33) Ngem perfekto i pangifugag na ta baggi na yari tu puede na pilian nga ari ammuan i mesimmu ta mappange.—Ikumpara i Isaias 42:14.

Kuan ni Jehova i maski anni tapenu metuppal i urena. Anni i koneksion natun ta abilidad na nga ammuan i mappange? Kunnaw i pakanawag na Isaias 46:10: “Ta gafa-gafu paga, niprofesiyà ngana i mesimmu, anna gari paga nga kinagì i ari paga ira nga nesimmu. Kagiakku, ‘Matuppal noka i desisiokku, anna kuakku i maski anni nga ikaya ku.’”

Mawayya gafu ni Jehova nga ammuan i mappange gafu ta egga i pakapangngua na tapenu mesimmu i tadday tu gannug. Nu karuan, i-fast forward tam i pelikula tapenu mammuattam i tumunug ira nga mesimmu. Ngem ari nga mawag ni Jehova nga maf-fast forward ta mappange nga gitta na dati ngana nga natunno i kesimmu na ngamin nga gannug. Awayya na laman i maddesision nga mesimmu i tadday nga gannug ta espesipiko nga tiempo. Tapus sonu duttal yatun nga tiempo, usan na i pakapangngua na tapenu metuppal yatun.—Ex. 9:​5, 6; Mat. 24:36; King. 17:31.

Megafu tatun, usu-usan na Biblia i termino ira nga kagitta na ‘niprepara,’ “binuu,” anna “ginakkag” tapenu deskriban i kukukuan ni Jehova meyannung ta karuan ira nga mesimmu ta mappange. (2 Pat. 19:25; ftn.; Isa. 46:11) I uvovug ta orihinal nga lengguahe nga naggafuan natun ira nga termino nga ne-translate ay konektadu ta uvovug nga i kebalinan na ay “minaddueng.” (Jer. 18:4) Mamolde na malalaki nga minaddueng i fuyo tapenu mabbalin yatun tu makakkasta nga masetera. Kunnatun gapa si Jehova. Mamolde onu memaniobra na i ganna-gannug tapenu matuppal i urena.—Efe. 1:11.

Irespeto ni Jehova i lallaguray tam nga mappili. Ari na nga niddan i kada tolay tu destiny onu tadhana na. Ari na gapa nga kontrolan i ganna-gannug tapenu magangngua i mapia nga totolay tu gannug ira nga makadaral balaman saw ta nira. Ipamavulun na i ngamin nga pilian i kayà da nga kuan, ngem kayà na nga fustu nakuan i piliadda.

Egga i dua nga istoria ta Biblia nga makoffun nittam tatun. I ollu ay meyannung ta taga-Nineve ira. Dati ngana nga kinagi ni Jehova nga madaral yatun nga siudad megafu ta marakay ira. Ngem turi ta nabbabawi ira, ‘ninono uli ni Jehova i kalamidad nga kinagi na nga iparattal na nira, anna arian na nga kingngua yatun.’ (Jon. 3:​1-10) Nanguli i nono ni Jehova. Ngatta? Turi ta naginna gare na Ninevita ira i mensahe na pamappalan ni Jehova para ta nira, inusa da i lallaguray da nga mappili. Nabbabawi ira.

I mekadua nga angngarigan ay i profesiya meyannung ta manakup nga mangngagan tu Ciro. Yayya saw i mamalawan ta naaripan ira nga Judio anna mangidog ta kepataddag uli na templo ni Jehova. (Isa. 44:26–45:4) Sinuppal ni Patul Ciro na Persia yatun nga profesiya. (Ezra 1:​1-4) Ngem ari yayya nga naddayaw ta kurug nga Dios. Inusa ni Jehova si Ciro tapenu matuppal i profesiya ngem ari yayya nakialam ta lallaguray ni Ciro nga mappili nu sinni i paddayawan na.—Prov. 21:1.

Ngem siempre, piga laman yatun ta ikonsidera ni Jehova nu ammuan na i mappange. I kurug gare, awan tu tolay nga makalippawa ta ngamin nga nononopan anna kukukuan ni Jehova. (Isa. 55:​8, 9) Ngem makalanno ngana i nipakannammu ni Jehova tapenu mas mattalo ittam nga kanayun na nga kuan i fustu—maski ta pangammu na ta mappange.