ỊBayịbụụ ya gede-gede nyori iJihova jẹ́-ẹ ya ẹla ọlẹ kọ ka họ ijuju neeji. (Ayị. 45:21) Ọ́ tị wụlẹ jaabwọ ká iJihova kaa bwu họ ịnyị kpangga lee ụka ọlẹ kọ kaa họ ịnyị lee abwọlẹ kọ ka chụ nyọka jẹ́ ẹla ọọwa kaka ba ka. Lẹ áhị ka jé-ẹ ya kpangga nyori ị-ịlẹ iJihova à kaa bwu jẹ́ ẹla ọla ijuju lẹ ka ịnyịnyị. Ọ tị lịnyị odu lẹ, ahị kụ ẹhị ẹla ịmanyị-ịmanyị ịlẹ kahị jẹ́ wẹẹ.

IJihova ká jẹ́-ẹ họ ang myị́ ang ọlẹ kọ họ́ọ, ma ọ kaa chụ nyọka họ ang ịhyẹ ka ụka ọhẹ. IJihova ka jẹ́-ẹ kpa ẹla ọjẹ́jẹ ọ-la ọbaba-ka nyamwụ ya ẹlẹlẹhẹ ọlẹ kọ chụ neeji myị́. (Rom. 11:33) Ma nyọlẹ kọ jẹ́-ẹ wu ịlọmwụ kpa yẹẹyẹẹ weẹ, ọ ka chụ nyọka ba la ọ-jẹ́ ẹla ọlẹ kọ ka họ myị́.—Kụ ẹhị yẹ Ayịsaya 42:14.

IJihova kaa họ ká irya nyamwụ ka họ jịra. Ányị ọọwa à tị́ ka dahị ụbwọ nyọka jẹ́ nyori iJihova la ọngirị nyọka ya ẹla ọla ijuju neeji? Ayịsaya 46:10 yẹkẹẹ: “Bwu ọmwụ-ọmwụ ọdada, m̀ ya dodehe ang ịlẹ kị ka họ lụka ohyẹẹkpẹ. M̀ ya dodehe nyori obyi omeme nyam ka godayị giri-giri, m̀ ka họ ang myị ang ọlẹ kam la i-irya nyọka họhọ.”

Lẹ ịngịhyẹ ọlẹ kọ du ká iJihova jẹ́-ẹ ya ẹla ọla ijuju neeji ri, ọ la ọngịrị nyọka họ ká ẹla ọọwa ka họ jịra. Ọ́ baba nyọka gbile ijuju warị nyọka jẹ́ ẹla ọlẹ kọ ka họ, lala o-ri nyị da ẹla myị́ ẹla ọlẹ kọ ka họ neeji ene lẹ, kpụ ọ ka wụla ẹla ọọwa yẹ ka. Ọkọkọ nya ọọwa, iJihova ka jẹ́-ẹ chụ nyori ẹla ọlẹ ị-ịlẹ ka họ lụka ọlẹ kọ hu nọ kpangga, ọ tị ka họ ká ẹla ọọwa ka họ jịra ụka ká ụka ọọwa á pweeji ịlẹhị.—Ehe. 9:5, 6; Mat. 24:36; Ụkụr. 17:31.

Ọọwa dudu ká ịBayịbụụ kaa kpa omyi ẹla lala “me obyi,” “ẹla ọlẹ kam ya” chabwọ nya ẹla ịhyẹ ịlẹ ká iJihova ja ka họ ị-ịlahị. (2 Ịdị. 19:25; Ayị. 46:11) Ị yẹ omyi ẹla ịwẹ da bwu omyi ẹla ọlẹ ká etu nyamwụ me “ọngọ me ang.” (Jer. 18:2-4) Jaabwọ ká ọngọ jẹ́-ẹ me ang yẹẹyẹẹ ka jẹ́-ẹ yẹ ọkpa nya ume la ang ọlẹ kọ há ụhị yẹẹyẹẹ, ịnyịnyị iJihova à ka jẹ́-ẹ yẹ iwe-ahụrụ da chajị ká irya nyamwụ ka họ jịra lẹ.—Efe. 1:11.

IJihova kaa ya iwe da ká angịnyị ka chụ ẹla ha ịlaa. Ọ́ da ẹla ọlẹ kọ ka họ ta ọngọngọọng ẹ-ẹpwụ nya ọhịhị neeji ka; ọ́ tị kaa họ ká angịnyị ịnyịịla ka họ ang ọlẹ kọ ka kpa ayịreji waa ka ịnyịnyị. Ọ kaa ya iwe da ha ọng myị́ ọng nyọka chụ ang ọlẹ kọ háa, ma ọ tị kaa mẹjáa kị ka chụ ọnyịịla.

Kụ ẹhị yẹ ọ-chụ pwokwita imiiye ịlẹ wẹẹ. Ọhọhẹ ri ẹla u-uhye nya ala iNinive. IJihova ya nyori epweji ọwẹ nyị ka ta ayịreji ọọlajị nya ang onyobyi nyaa. Ma ụka ká alụwa yẹ irya da, iJihova “yaa ahyẹẹrwẹrwa. Ọ tụtụm taa ayịreji jaabwọ kọ byaa ene kaka.” (Jon. 3:1-10) IJihova yẹ ẹla ọla irya nyamwụ ọlẹ kọ ya neeji da ọọlajị nyọlẹ ká ala iNinive chụ nyọka yẹ irya da ụka ká iJihova du ọngịnyị ẹrụ kaka daa ọna.

Ọ-chụ pwokwita oheeye ri ọmwụ ọyẹyẹ u-uhye nya ịSayịrọsị ọlẹ kọ ka gba ala iJuu kpehe bwu ọ-yẹ dada bala ọ-ka da ehile nyị ma ube ịgọgọ nya iJihova nwụ. (Ayị. 44:26–45:4) Adịrahụ ịSayịrọsị ọla iPechiya họ ọmwụ ọyẹyẹ ọwẹ jịra. (Ẹsịr. 1:1-4) Ma, ịSayịrọsị á tị kaa gbịgba ha Ohe nya ịlẹhị ka. IJihova kpa ịSayịrọsị họ ọmwụ ọyẹyẹ Nyamwụ jịra, ma ọ́ tị gbịle ịSayịrọsị kaka gbịgba ha ịlọmwụ la agbụrụ ka.—Etu 21:1.

Ẹla ịmanyị-manyị kem ahị kụ ẹhị yẹ wẹ u-uhye nya abwọlẹ ká iJihova kaa chụ nyọka jẹ́ ẹla ọla ijuju lẹ. Ẹlịlẹhị ri, ọngịnyị ehe ọhẹ-lọhẹ á ka jẹ́-ẹ jẹ́ agbẹyị nya iJihova kpá kaka. (Ayị. 55:8, 9) Ma, ẹla ịlẹ ká iJihova chị ehe kaa ju ọmyịmyị nyahị ọngịrị nyori ọ kaa họ ang ọ-la kpakpa ụka wuu—tụ ụka kọ ya ẹla ọla ijuju neeji.