Nalawag nga ibaga ti Biblia a kabaelan ni Jehova nga ibaga ti mapasamak iti masanguanan. (Isa. 45:21) Ngem saanna nga ibaga ti amin a detalye no kasano wenno kaano nga aramidenna dayta wenno no kasano kaadu ti kayatna nga ammuen. Isu a saantayo a naan-anay a maawatan dagita. Ngem adda sumagmamano a banag nga ammotayo.

Kabaelan ni Jehova nga aramiden ti amin ngem pilpilienna dagiti aramidenna. Awan limitasion ti siribna isu a maibagana ti mapasamak iti masanguanan no kayatna. (Roma 11:33) Ngem perpekto ti panagteppelna isu a mabalinna met a pilien a saan nga ammuen dagiti mapasamak iti masanguanan.—Idilig ti Isaias 42:14.

Itungpal ni Jehova ti pagayatanna. Ania ti koneksion dayta iti pannakabalinna a mangipakpakauna kadagiti mapasamak? Ilawlawag ti Isaias 46:10: “Manipud pay idi un-unana, ipadtok ti mapasamak, ken nabayagen nga imbagak dagiti saan pay a napasamak. Kinunak, ‘Matungpalto ti desisionko, ket aramidek ti aniaman a pakaragsakak.’”

Ti ngarud maysa a rason a maipakpakauna ni Jehova ti masanguanan ket gapu iti pannakabalinna isu a mapagbalinna a posible ti amin a banag. Dina kasapulan ti arigna ag-fast-forward tapno maammuanna ti masanguanan—a kas man la napasamaken ti amin a mapasamak iti masanguanan ken nasaksakbay a reprepasuenna laengen dagita. Imbes ketdi, mabalin nga ikeddeng ni Jehova ti mapasamak iti espesipiko a tiempo ken siguraduenna a mapasamak dayta iti tiempo nga inkeddengna.—Ex. 9:​5, 6; Mat. 24:36; Ara. 17:31.

Gapu iti dayta, maus-usar iti Biblia dagiti termino kas iti “binukelko,” ken “pinanggepko” tapno iladawan ti ar-aramiden ni Jehova maipapan iti dadduma a mapasamak iti masanguanan. (2 Ar. 19:25; ftn.; Isa. 46:11) Naipatarus dagita a termino manipud iti sao iti orihinal a lengguahe a konektado iti sao a ti kayatna a sawen ket “agdamdamili.” (Jer. 18:​3, 4) No kasano a kabaelan ti nalaing nga agdamdamili a sukogen ti pila tapno agbalin a napintas a plorera wenno vase, kabaelan met ni Jehova a sukogen wenno imaniobra dagiti bambanag tapno matungpal ti pagayatanna.—Efe. 1:11.

Raraemen ni Jehova ti insagutna kadagiti tattao a wayawayada nga agpili. Saan a nasaksakbay nga ikeddeng ti Dios ti mapasamak iti tunggal tao; wenno saanna met a piliten dagiti nasingpet a tattao nga agaramid iti pakadadaelanda. Palpalubosanna ti amin nga agpili iti kayatda nga aramiden iti biagda. Ngem isursurona met a pilienda nga aramiden ti umiso.

Usigentayo ti dua a pagarigan. Ti umuna ket dagiti taga-Nineve. Impakpakauna ni Jehova a madadael ti siudad gapu iti kinadakesna. Ngem nakita ni Jehova a nagbabawi dagiti umili isu a “pinanunotna manen ti didigra nga imbagana nga ipagtengna kadakuada, ket saannan nga intuloy dayta.” (Jon. 3:​1-10) Saan nga intuloy ni Jehova ti impakpakaunana a mapasamak ta inusar dagiti taga-Nineve ti wayawayada nga agpili, ket nagbabawida idi nangngegda ti impakdaar ni Jehova.

Ti maikadua a pagarigan ket ti padto maipapan iti manangsakup nga agnagan iti Ciro. Isu ti nangwayawaya kadagiti naadipen a Judio ken nangibilin a maibangon manen ti templo ni Jehova. (Isa. 44:26–45:4) Tinungpal ti ari ti Persia a ni Ciro dayta a padto. (Esd. 1:​1-4) Ngem saan a nagdaydayaw ni Ciro iti pudno a Dios. Inusar ni Jehova ni Ciro a mangtungpal iti padto. Ngem saanna a pinilit ni Ciro nga agdaydayaw kenkuana.—Prov. 21:1.

Siempre, sumagmamano laeng dagita kadagiti ikonsiderar ni Jehova no ammuenna dagiti mapasamak iti masanguanan. Kas tattao, ditay naan-anay a maawatan ti amin a pampanunoten ken ar-aramiden ni Jehova. (Isa. 55:​8, 9) Ngem umdasen ti ammotayo tapno bumileg ti pammatitayo a kanayon nga umiso dagiti ar-aramidenna ken dagiti imbagana a mapasamak iti masanguanan.