Ebaibol ọ ta vevẹ nọ Jihova ọ rẹ sae ta oware nọ o te via evaọ obaro. (Aiz. 45:21) Rekọ ọ vuẹ omai oghẹrẹ nọ Ọghẹnẹ ọ rẹ rọ riẹ oware nọ o te via ha. Ọ vuẹ omai epanọ ọ rẹ rọ riẹ oke nọ ọ rẹ rọ tae via gbe he. Yọ o ta epanọ ọ rẹ gwọlọ riẹ kpahe obaro te he. Fikiere ma nwane riẹ epanọ Jihova ọ rẹ rọ ẹgba riẹ yena ru iruo ho. Rekọ emeware jọ e riẹ nọ ma riẹ. Joma ta kpahe ejọ rai.

Jihova o wo ẹgba nọ ọ sai ro ru oware kpobi, rekọ ẹsejọ ọ rẹ fake siọ ejọ ba eru. Areghẹ Jihova o wo umuo ho, ọ sae ta oware kpobi nọ ọ gwọlọ ta kpahe obaro gbagba. (Rom 11:33) Yọ ọ gbẹ gwọlọ riẹ oware nọ o te via evaọ obaro ho, ọ rẹ riẹe he. Ẹsejọ ọ rẹ nyẹ omariẹ re ọ siọ eware jọ ba ẹriẹ.—Je rri Aizaya 42:14.

Jihova o re ru oware kpobi nọ o were riẹ. Rekọ hẹrẹ tao, ẹvẹ oyena u ro wobọ kugbe ẹgba nọ Jihova ọ sae rọ riẹ obaro? Obe Aizaya 46:10 o ta nọ: “Evaọ obọ emuhọ mẹ rẹ jọ ta oware nọ u ti no oware ze, yọ anwọ oke krẹkri nọ u kpemu mẹ rọ ta eware nọ a ri ti ru hu. Mẹ ta nọ, ‘Iroro nọ mẹ jẹ no i re dikihẹ, yọ me re ru oware kpobi nọ o were omẹ.’”

Jihova ọ sae ginẹ ta oware nọ o te via evaọ obaro, keme o wo ẹgba nọ ọ sai ro ru oware kpobi nọ ọ gwọlọ ru. U du gwọlọ nọ Jihova ọ rẹ keria roro oware nọ o te via evaọ obaro tao ho. Yọ ọ rẹ daoma riẹ omoware kpobi nọ o te via evaọ obaro re o kere ei fihotọ họ. Jihova ọ riẹ oware nọ ọ gwọlọ ru gbe oke nọ o ti ro ru ei. Yọ, nọ oke nọ o fihọ na u te te, o re ru oware na.—Ọny. 9:5, 6; Mat. 24:36; Iruẹru 17:31.

Oyejabọ oke nọ Jihova ọ jẹ ta kpahe eware jọ nọ o ti ru, ọ ta nọ, “No anwọ oke krẹkri nọ u kpemu ze me ro ru oware nana, no anwọ edẹ nọ i kpemu ze mẹ rọ ruẹrẹ iẹe kpahe.” Ọ tẹ jẹ ta nọ, “Mẹ jiroro riẹ no, yọ me ti ru ei gba re.” (2 Iv. 19:25, ẹme-obotọ; Aiz. 46:11) Muẹrohọ eme na, jiroro, ru ei, ruẹrẹ iẹe kpahe. Evaọ ẹvẹrẹ ọsosuọ nọ a ro kere eria Ebaibol yena, ẹme nọ a fa eme yena no ze o wobọ kugbe ẹme jọ nọ otofa riẹ o rrọ “ọmebẹ.” (Jeri. 18:4) Wọhọ epanọ ọmebẹ ọ rẹ rọ ọviẹ ma oware jẹ ruẹrẹ oware họ wowoma na, ere Jihova ọ rẹ sai ru oware hayo nwene oware jọ nọ o be via re ẹjiroro riẹ o rugba.—Ẹf. 1:11.

Jihova ọ kẹ omai uvẹ nọ ma re ro ru oware nọ o were omai. Ọ ta oware nọ o te via kẹ omomọvo evaọ uzuazọ kpahotọ no anwẹdẹ hẹ. Yọ orọnọ ọye o ru nọ ahwo owoma a be rọ ruẹ uye he. Rekọ ọ kẹ ohwo kpobi uvẹ nọ o re ro ru oware nọ o were riẹ. O make rrọ ere na, ọ vuẹ omai oghẹrẹ nọ ma re yeri uzuazọ mai nọ eware i je woma kẹ omai.

Obọnana joma kẹ iriruo ivẹ jọ. Oriruo ọsosuọ họ ahwo Nanivi. Jihova ọ ta nọ a te raha ae no fiki umuemu nọ a jẹ rọ họ. Rekọ fikinọ a kurẹriẹ, Jihova “ọ tẹ wariẹ roro kpahe ọraha nọ ọ ta nọ ọ te raha ai na, ọ gbẹ raha ae he.” (Jona 3:1-10) Jihova o nwene iroro nọ ọ jẹ na fikinọ a rọ iroro obọrai kurẹriẹ, nọ a yo oware nọ ọ ta nọ o ti ru ai.

Oriruo avọ ivẹ họ eruẹaruẹ nọ a ruẹ inọ Sairọs o ti fi Babilọn kparobọ. Yọ o ti je si ahwo Ju no igbo, je ru nọ a te rọ wariẹ bọ etẹmpol Jihova. (Aiz. 44:26–45:4) Sairọs ovie na họ ohwo nọ o ru eruẹaruẹ yena gba. (Ẹzra 1:1-4) Sairọs ọ jẹ gọ Jihova ha. Dede nọ ọye Jihova o ro ru eruẹaruẹ na gba, ọ gba riẹ họ nọ ọ rẹ gọe he.—Itẹ 21:1

Eware buobu e riẹ nọ Ọghẹnẹ ọ rẹ gba oma riẹ re ọ seba eru nọ ọ tẹ be ma omaa oghẹrẹ nọ eware e te jọ evaọ obaro. Ejọ ọvo ma ta ẹme te no na. Ohwo ọvo ọ riẹ nọ ọ rẹ sae riẹ oware kpobi nọ o lẹliẹ Ọghẹnẹ ru oware jọ họ. (Aiz. 55:8, 9) O make rrọ ere na, eware nọ ma wuhrẹ na o lẹliẹ omai riẹ nọ Jihova o re ru oware nọ u kiehọ ẹsikpobi. Nọ Jihova ọ tẹ be ta oware nọ o te via evaọ obaro ọ rẹ gba oma riẹ re o gbe ru oware nọ u fo ho ho.