Di Baibl mek wi nuo klier klier se Jeuova kyan tel wi bout wa a-go apm iina di fyuucha. (Aiz. 45:21) It no tel wi evriting bout ou ar wen im plan fi nuo bout sopm bifuo it apm ar umoch im waahn fi nuo, so wi kyaahn se fi shuor umoch tingz Jeuova plan fi nuo bifuo it apm. Mek wi luk pan som riizn wa mek wi se so.

Notn no de we Jeuova kyaahn du, onggl we im no plan fi du. Kaa im waiz muor dan evribadi els, im kyan tel wi wa im waahn fi tel wi bout wa a-go apm iina di fyuucha. (Ruo. 11:33) An kaa im kyan kanchuol imself gud gud, im kyan chuuz fi no nuo wa a-go apm iina di fyuucha.​—Luk pan Aizaiya 42:14.

Jeuova mek eniting we im waahn fi apm apm. Bot wa dat av fi du wid se im kyan tel wi wa a-go apm iina fi fyuucha? Aizaiya 46:10 mek wi nuo ou wen it se: “A mi a di Wan we tel unu tingz iivn bifuo dem apm, an fram lang taim mi tel unu tingz we a-go apm bifuo it apm. Mi se, ‘Eniting we mi waahn fi apm, a dat a-go apm, an eniting we mi waahn fi du, a dat mi a-go du.’”

Wan riizn wa mek Jeuova kyan tel wi wa a-go apm iina di fyuucha a kaa im kyan mek wa im waahn fi apm apm. Jeuova no stie laik wi, we ef wi waahn fi nuo ou wan shuo don wi afi faas faawod it tu di en, ar ef wi waahn fi nuo ou wan buk don wi afi riid di laas paat. Nuo, a no dat im afi du. Bot Jeuova kyan mek op im main se im waahn sitn fi apm sortn an sortn taim an den mek it apm wen im waahn it fi apm.​—Ek. 9:5, 6; Mat. 24:36; Aks 17:31.

An a das wai di Baibl yuuz som wod laik “wa Jeuova waahn fi apm” wen it taak bout som tingz we Jeuova du wen it kom aan tu tingz we a-go apm iina di fyuucha. (2 Ki. 19:25; ftn; Aiz. 46:11) Wen wi a taak bout wa Jeuova waahn fi apm, di Iibruu wod we di Baibl did yuuz fi taak bout Jeuova a sumadi we mek klie pat an dem ting de. (Jer. 18:4) So jos laik ou sumadi kyan yuuz piis a klie an shiep it op an mek wan nais vaaz, a siem so Jeuova kyan mek tingz apm ar chienj op tingz so dat wa im waahn fi apm apm.​—Ifii. 1:11.

Jeuova lou piipl fi du wa dem waahn fi du. Im no plan out sumadi laif bifuo dem baan, an im no mek piipl we a du wa gud du sitn we a-go kaaz dem fi ded. Im lou evribadi fi du wa dem waahn fi du, bot im a beg aal a wi fi du di rait ting. Mek wi luk pan tuu tuori iina di Baibl we mek wi se dat.

Di fos wan av fi du wid di piipl dem we did liv iina Ninive. Jeuova did se bifuo se im a-go get rid a dem piipl ya kaaz a ou wikid dem bi. Bot Jeuova neehn get rid a dem laik we im se im did a-go du kaa dem lisn an tap du di wikid sitn dem we dem did a du.​—Juona 3:1-10.

Di sekan tuori we Jeuova did mek wi nuo bout bifuo it apm, a bout wan king we niem Sairos we wuda frii di Juu piipl dem we dem did kyapcha an mek dem go bak go mek op bak Jeuova ous. (Aiz. 44:26–45:4) So Sairos du wa Jeuova se im wuda du. (Ezra 1:1-4) Bot dat no miin tu se Sairos did worship Jeuova jos kaa Jeuova yuuz im fi du wa im waahn fi apm. Jeuova lou im fi worship uu im did waahn fi worship.​—Pr. 21:1.

Dem sitn ya we wi jos taak bout a som a di sitn dem we Jeuova luk pan wen im a tel wi bout wa a-go apm iina di fyuucha, kaa wi nuo se nobadi kyaahn nuo evriting bout ou Jeuova du tingz. (Aiz. 55:8, 9) Bot di ting dem we Jeuova mek wi nuo mek wi chos im muor kaaz wi nuo se im aalwiez a-go du wa rait, aal wen im tel wi bout wa a-go apm iina di fyuucha.