Jehovaka uruma nui wari nankaamasminiait nuna nekaamniaiti (Isa. 45:21). Tumaitkiusha Yuus papiinmanka itiura nunasha turiniait, urutmana neka, urutain neka nunasha aujmattsui. Mash timiatrusar nekatsji tuma asar Jehová junis najanui tichamniaitji. Antsu wari nekaj nuna aujmattsatai.

Jehovaka mash nekaamniaiti tumaitiat mashikia nekaatniun enentaimchaiti. Ti neka asa warinkisha ukunmatai nankaamasminia nuna mash nekaamniaiti (Rum. 11:33). Katsuntratniun jea asa warinia nekaatniun nakitia nunasha ninki enentaimniuiti (Isaías 42:14 TNM nui tana nujai apatkam iista).

Jehová ni wakerana nuna uminiaiti. Jehovaka ni wakerana nuna turunat tusa ukunam atatna nunasha nekaamniaiti. Isayas 46:10 tawai: “Tura ukunam túrunattana nunasha tí yaunchuya̱ṉ yama naṉkammanumia̱ṉ juárkin etserkin winiajai. Wi iwiaramua núnaka Wi itiurkatniuna wakeraj tímiatrusnak umiktatjai” tu tawai.

Jehová ni wari turunat tusa wakera nunaka turatniun jea asa ukunmatai wari turunamniait nuna nekatin jeawai. Jehovaka ukunmatai wari turunatta nuna mash nekaatniun jeaksha nunaka turichuiti. Antsu Jehovaka warinkish urutai turunatta nuna timiniaiti (Jiin. 9:​5, 6; Mat. 24:36; Tur. 17:31).

Tuma asamtai uruma nui turunatniun taku nu turunatniun wi yaunchuk iwiaraitjiai Jehová ainis tu wemiayi (2 Ak. 19:25; Isa. 46:11). Yuusa chichamen hebreo chichamjainkia nuwejai takakmaun nuna aujmatui (Jrm. 18:4). Nuwejai takakmau ainiana nuka pininkian najanattsar ni uwejejai nuwen warinkisha turawarminiaiti, Jehovasha aintsan ni wakeramun umiktasa warinkisha turatin jeawai (Ipi. 1:11).

Jehovaka ninki enentaimsar warinkisha turawarat tusa ankan iniaitiamsaitji. Ninkia ju aentska junis nankaamastatui tu tichaiti. Antsu itiura penker pujusminiaitiaj nuna jintintramji nuyasha chikichkimias ninki warinia turattsar wakeruinia nuna turawarat tusa ankan iniaitiamsaitji.

Jimiarna aujmattsatai. Emka Nínive nunkanam matsarmiarmiania nuna nekaatai. Nu nunkanmanka yajauchia nu piaku asamtai Jehová amuktatjai tu timiayi. Ene enentaimia ajasaru asarmatai Jehová Nínive nunkanam matsatainianka amuktatjai timiania nunaka turachmiayi (Jns. 3:​1-10). Antukaru asarmatai Jehová amukcharmiayi.

Yamaikia Persianmaya uuntri Ciro naartinnia aujmattsatai. Ninkia judío aentsun uwemtikrar tura Yuus enentaimtutai jeancha jeamiarat tusa yaimkiattawai tu aarma amiayi (Isa. 44:​26-28; 45:​1-4 TNM). Tura Ciro Yuus timiania imiatrusan turamiayi (Ists. 1:​1-4). Tumaitkiusha Ciro naartinkia Jehovan enentaimtichuyayi. Jehovaka ni wakeramun umiktasa Ciron yainmiayi tumaitkiusha winia enentaimtursat tusa utsukchamiayi (Neka. 21:1).

Aentstikia Jehová urukamtai ainis enentaimia tura urukamtai ainis najanea nusha mashikia nekaatin jeatsji. Uruma nui turunatniun nekana nunasha imiatrusar paant nekaatin jeatsji (Isa. 55:​8, 9). Jehovaka penker asa uruma nui turunatniun takusha penker turunatniun tiniuiti tu timiniaitji.