Mbivilia nĩyonanĩtye nesa kana Yeova no athane maũndũ ma ĩvinda yũkĩte. (Isa. 45:21) Ĩndĩ ndĩeleasya maũndũ onthe ĩũlũ wa ũndũ wĩkaa ũu, yĩla wĩkaa ũu, kana nĩ maũndũ meana ũkũmanya. Kwoou tũyĩsa kũelewa vyũ ũtonyi wa Yeova wa kwathana maũndũ ma ĩvinda yũkĩte. O na vailye ũu, ve maũndũ amwe tũeleetwe.

Yeova no eke kyonthe kĩla ũkwenda, ĩndĩ mavinda amwe nũnyuvaa kũlea kwĩka maũndũ amwe. No atũmie ũĩ wake ũte kĩthimo kwathana kyonthe kĩla ũkwenda. (Alo. 11:33) Ĩndĩ nũndũ nĩwĩsĩ kwĩsiĩĩa vyũ, no atwʼe kũema kũmanya kĩla kĩkekĩka.—Sianĩsya na Isaia 42:14.

Yeova nũtumaa kwenda kwake kwĩkwa. Kĩu kĩkonanĩtye ata na ũtonyi wake wa kwathana maũndũ ma ĩvinda yũkĩte? Ĩandĩko ya Isaia 46:10 yaĩtye: ‘Ngĩtavanʼya mũminũkĩlyo kuma mwambĩlĩĩlyonĩ, na kuma tene tene maũndũ ala matanamba kwĩkwa; ngyasya, Ũtao wakwa ũkaũngama, na ngeeka kwenda kwakwa kwʼonthe.ʼ

Kwoou ũndũ ũmwe ũtonya kũtuma Yeova athana maũndũ ma ĩvinda yũkĩte nĩ kana e na vinya wa kũtuma mekĩka. Nde na vata wa kũsisya ũndũ maũndũ makethĩwa mailye ĩvinda yũkĩte ta maminĩte kwĩkĩka, o tondũ mũndũ ũkũsisya sinema wĩthĩawa atonya kũmĩsongya mbee amanye ũndũ ĩkũthela. Vandũ va ũu, no atwʼe ĩvinda yĩla ũndũ mũna ũkekĩka na ĩndĩ ĩvinda yĩu yavika, aituma wĩkĩka.—Kuma 9:​5, 6; Mt. 24:36; Meko 17:31.

Nĩkyo kĩtumi Mbivilia ĩtũmĩĩte ndeto ta “naseũvya” na “nĩnĩsũanĩĩte,” kwonanyʼa kĩla Yeova ũnyuvaa kwĩka kĩkonetye maũndũ amwe ma ĩvinda yũkĩte. (2 Asu. 19:25; Isa. 46:11) Ndeto isu syumanĩte na ndeto ya tene ĩthengeanĩe na ndeto “mũmbi.” (Yel. 18:4) O ũndũ mũmbi wĩ na ũtũĩka ũtonya kũseũvya mbisũ mbanake atũmĩĩte yũmba, Yeova no alũnge maũndũ nĩ kana eanĩsye kĩeleelo kyake.—Aev. 1:11.

Yeova nũekaa andũ meyĩkĩe motwi. Ndatusaa kĩla kĩkekĩka thayũnĩ wa kĩla ũmwe witũ, o na ndatwʼĩaa andũ aseo kĩla mekwĩka nĩ kana maikalike naĩnĩ. Nũekaa onthe matwʼe kĩla mekwenda, na nũmathuthasya manyuve kĩla kyaĩle.

Kwoona ngelekanyʼo ilĩ. Ya mbee ĩkonetye andũ ma Nineva. Yeova athanĩte kana nũndũ wa ũthũku wa ekali ma ndũa ĩsu, akamyananga. Ĩndĩ yĩla meelilile, Yeova “[nĩweetũngie] aeka ũthũku ũla waĩtye akameka; na ndaawĩka.” (Yona 3:​1-10) Avĩndũie woni ũla waĩ nawʼo nũndũ andũ ma Nineva nĩmatwie kũvĩndũka ĩtina wa kwĩwʼa ũkanyʼo wake.

Ngelekanyʼo ya kelĩ nĩ ya wathani ũla wawetete ĩũlũ wa mũndũ wĩtawa Kulusi, ũla waĩ athasye Ayuti kuma Mbaviloni na ayumya mwĩao ĩkalũ ya Yeova yakwe ĩngĩ. (Isa. 44:26–45:4) Mũsumbĩ Kulusi wa Velisia nĩweanĩisye wathani ũsu. (Esa. 1:​1-4) O na ũu wĩ o vo, Kulusi ndamũthaithaa Ngai wa wʼo. Ĩndĩ Yeova nĩwamũtũmĩie kwĩanĩsya wathani wake ateũlikĩlĩĩla ũthasyo wake wa kwĩnyuvĩa eenda kũthaitha ũũ.—Nth. 21:1.

Asu no maũndũ amwe Yeova ũsũanĩaa yĩla ũkwathana maũndũ ma ĩvinda yũkĩte. Kwa wʼo, vai mũndũ wĩsa kũelewa nesa vyũ nzĩa sya Yeova sya kwĩka maũndũ. (Isa. 55:​8, 9) Ĩndĩ kĩla ũvuanĩtye nĩkĩlũlũmĩĩlasya mũĩkĩĩo witũ kana kĩla ĩvinda ekaa kĩla kyaĩle, o na yĩla ũkwathana ĩũlũ wa ĩvinda yũkĩte.