Bíblia ta mostra klaru ma Jeová pode fla kuzê ki ta kontise na futuru. (Isa. 45:21) Má, el ka ta splika tudu kuza sobri modi ô ki ténpu ki Jeová ta faze kel-li, nen kantu kuza ki Jeová ta skodje sabe. Nton, nu ka sabe tudu kuza sobri kapasidadi ki Jeová ten di sabe kuzê ki ta kontise na futuru. Má, ten alguns kuza ki nu pode intende.

Jeová pode faze tudu kuza ki el krê, má alvês el ta skodje ka faze alguns kuza. Jeová pode uza se sabedoria ki ka ten limiti pa sabe kalker kuza ki ta kontise na futuru. (Rom. 11:33) Má, pamodi el ta konsigi kontrola se kabésa di manera perfeitu, tanbê el pode skodje ka sabe kuzê ki ta kontise na futuru. — Konpara ku Isaías 42:14.

Jeová ta poi se vontadi ta kunpri. Modi ki kel-li ta djuda-nu intende kapasidadi ki el ten di sabe kuzê ki ta kontise na futuru? Isaías 46:10, ta fla: ‘Désdi komésu N ta fla kal ki é fin, i désdi ténpu antigu kes kuza ki inda ka fazedu. N ta fla: “Nha disizon ka ta muda, i N ta faze tudu kel ki N krê.”’

Pur isu, un di kes motivu ki pode poi Jeová ta fla kuzê ki ta kontise na futuru é pamodi el ten puder di poi kes kuza ta kontise. Jeová ka meste sabe kuzê ki ta kontise na futuru sima un algen ki ta lé fin di un livru pa sabe kuzê ki ta kontise. Má, Jeová pode disidi ma algun kuza ta kontise na ténpu ki el krê. I dipôs, el ta poi kel kuza ta kontise na ténpu sértu. — Êxo. 9:5, 6; Mat. 24:36; Atus 17:31.

É pamodi kel-li ki Bíblia ta uza alguns palavra sima ‘pripara’, ‘faze’ i ‘vontadi’ pa pâpia sobri kuzê ki Jeová ta faze na futuru. (2 Reis 19:25; Isa. 46:11) Kes palavra li traduzidu di un palavra ki sta ligadu ku otu palavra ki krê fla ‘oleru’. (Jer. 18:4) Sima un oleru ki ten txeu kapasidadi pode muda un baru ti ki el fika na un vazu bunitu, Jeová tanbê pode faze algun kuza pa se vontadi fazedu. — Efé. 1:11.

Jeová ta ruspeta nos liberdadi di skodje. Jeová ka ten un distinu pa kada algen, nen el ka ta poi kes algen bon ta faze algun kuza mariadu ki ta prujudikaba es ô ki ta lebaba es pa distruison. El ta dexa tudu algen skodje modi ki es krê vive. Má, el ta inxina-s modi ki es ta vive di un manera dretu.

Odja dôs izénplu. Kel primeru izénplu é di kes algen ki ta viveba na Nínivi. Jeová dja flaba ma kel sidadi ta sérba distruídu pamodi ses maldadi. Má kantu kes algen di la rapende, Jeová ‘torna pensa na kel kalamidadi ki el flaba ma el ta trazeba sobri es, i el ka traze-l más.’ (Jonas 3:1-10) Jeová muda di ideia pamodi kes algen di Nínivi disidi di livri vontadi rapende i es obi ku kel avizu ki Jeová da-s.

Kel sugundu izénplu é kel profesia sobri Siru, ki ta libertaba judeus ki staba prézu i ta mandaba pa ténplu di Jeová konpodu. (Isa. 44:26–45:4) Rei Siru di Pérsia kunpri kel profesia li. (Esd. 1:1-4) Má, Siru ka ta adoraba kel Deus verdaderu. Jeová uza Siru pa kunpri kes profesia, má el ka obriga Siru pa adora-l. — Pro. 21:1.

É klaru ma kes-li é sô alguns kuza ki Jeová ta faze óras ki el ta disidi sabe kuzê ki ta kontise na futuru. Na verdadi, ka ten ningen ki ta konsigi intende tudu kuza ki Jeová ta pensa i ki el ta faze. (Isa. 55:8, 9) Má, kuzê ki nu sabe di Jeová ta bira nos fé más fórti ma sénpri el ta faze kel ki é dretu. I kel-li ta inklui kuzê ki el ta disidi sabe sobri futuru.