Li Santil Hu chi chʼolchʼo ru naxye naq li Jehobʼa naru xnawbʼal li tkʼulmanq saʼ li kutan chalk re (Is. 45:21). Yaal, moko naxchʼolobʼ ta chi tzʼaqal re ru chanru, joqʼe naxbʼaanu chi moko joʼkʼihal naru naxnaw, joʼkan naq inkʼaʼ naqataw ru chixjunil li naru xbʼaanunkil li Jehobʼa re xnawbʼal li tkʼulmanq saʼ li kutan chalk re. Abʼan, naqanaw wiibʼ oxibʼ li kʼaʼaq re ru.

Maakʼaʼ naramok chiru li Jehobʼa xbʼaanunkil wiibʼ oxibʼ li naʼlebʼ abʼan wank sut naxsikʼ inkʼaʼ xbʼaanunkil. Saʼ xkʼabʼaʼ naq li xchoxahil naʼlebʼ maajunwa naraqeʼk naru xyeebʼal yalaq kʼaru li naʼlebʼ li naraj (Rom. 11:33). Abʼan, saʼ xkʼabʼaʼ naq li Jehobʼa naxnaw xkuybʼal ribʼ naru ajwiʼ naq inkʼaʼ tixnaw li kʼaru tkʼulmanq (juntaqʼeeta rikʼin Isaías 42:14).

Li Jehobʼa naxbʼaanu naq ttzʼaqloq ru li rajom. Ut aʼin chanru naxchap ribʼ rikʼin xnawbʼal li tkʼulmanq saʼ li kutan chalq re? Saʼ Isaías 46:10 naxye: «Laaʼin ninye chi rubʼelaj li taakʼulmanq moqon, ut ninye resil xbʼenwa li toj majiʼ nakʼulmank. Laaʼin ninye: Li kʼuubʼanbʼil inbʼaan taaʼuxmanq; ut chixjunil li nawaj xbʼaanunkil, tinbʼaanu».

Jun li xyaalal kʼaʼut li Jehobʼa naru xnawbʼal li tkʼulmanq saʼ li kutan chalk re, aʼan naq wank xwankil re naq tixbʼaanu li naxye. Li Jehobʼa moko naʼajmank ta chiru xtzʼilbʼal li tkʼulmanq saʼ li kutan chalk re joʼ naq nabʼaanumank rikʼin rilbʼal chanru naraqeʼk jun li pelikula. Li Jehobʼa bʼan, naru xkʼubʼankil naq tkʼulmanq junaq li kʼaʼaq re ru saʼ jun li hoonal ut moqon naq twulaq xhoonalil, tixbʼaanu naq ttzʼaqloq ru (Éx. 9:​5, 6; Mat. 24:36; Hech. 17:31).

Joʼkan naq li Jehobʼa kiroksi ebʼ li aatin joʼ «inkawresihom chaq» ut «kamaʼan xinkʼuubʼ» re xyeebʼal li kixbʼaanu rikʼin wiibʼ oxibʼ li kʼaʼaq re ru li tkʼulmanq saʼ li kutan chalk re (2 Rey. 19:25; Is. 46:11). Saʼ hebreo ebʼ li raqal aʼin naroksi jun li aatin li naxchap ribʼ rikʼin li aatin pakʼonel (Jer. 18:4). Joʼ jun chaabʼil aj pakʼonel naru roksinkil li seebʼ ut xyiibʼankil jun chʼinaʼusil sekʼ, li Jehobʼa naru xbʼaanunkil naq ebʼ li kʼaʼaq re ru ttzʼaqloq ru joʼ naraj (Efes. 1:11).

Li Jehobʼa naxkanabʼ naq tqasikʼ li kʼaru naqaj. Aʼan moko naxtzʼiibʼa ta li kʼaru tixkʼul junaq li kristiʼaan, chi moko naxmin ruhebʼ li kristiʼaan li chaabʼilebʼ re naq teʼxbʼaanu junaq li naʼlebʼ li tixbʼaanu naq teʼkamq. Naxkʼut bʼan chiqu chanru naru toowanq ut naxkanabʼ naq tqasikʼ kʼaru naqaj.

Qilaq wiibʼ li eetalil. Li xbʼeen naʼaatinak chirixebʼ li kristiʼaan li wankebʼ Nínive. Saʼ li tenamit aʼan kʼajoʼ li maaʼusilal, joʼkan naq li Jehobʼa kixye naq tsacheʼq. Abʼan saʼ xkʼabʼaʼ naq xeʼxyotʼ xchʼool, li Yos «kixjal li xkʼaʼuxl ut inkʼaʼ chik kixkʼehebʼ saʼ tojbʼamaak, joʼ chanru kixye rehebʼ xbʼenwa» (Jon. 3:​1-10). Li Jehobʼa kixjal li kixkʼoxla xbʼaanunkil. Kʼaʼut? Xbʼaan naq ebʼ li kristiʼaan re Nínive keʼrabʼi li tixbʼaanu li Jehobʼa ut xeʼxyotʼ xchʼool.

Li xkabʼ eetalil aʼan li propesiiy chirix laj Ciro, jun li awabʼej li tixkolebʼ laj judiiy ut tixtaqla xkabʼlankil wiʼ chik li rochoch li Jehobʼa (Is. 44:​26–45:4). Laj Ciro, li awabʼej re Persia kixbʼaanu naq ttzʼaqloq ru li propesiiy aʼin (Esd. 1:​1-4). Abʼanan, laj Ciro moko naxloqʼoni ta ru li tzʼaqal Yos. Yaal naq li Jehobʼa kiroksi re naq ttzʼaqloq ru li propesiiy, abʼan inkʼaʼ kixmin ru re naq tkʼanjelaq chiru (Prov. 21:1).

Wank naabʼal li naʼlebʼ li naʼokenk chisaʼ. Jun winq moko naru ta xtawbʼal ru chi tzʼaqal re ru chanru nakʼoxlak ut nanaʼlebʼak li Jehobʼa, chi moko li xwankilal re xnawbʼal li tkʼulmanq saʼ li kutan chalk re (Is. 55:​8, 9). Usta joʼkan, xbʼaan li naqanaw chirix li Jehobʼa chʼolchʼo chiqu naq chixjunil li naxbʼaanu chaabʼil ut saʼ xyanq aʼin, li tkʼulmanq saʼ li kutan chalk re.