Bibilia nĩ yonanagia wega atĩ Jehova nĩ arĩ ũhoti wa kũmenya maũndũ marĩa mageekĩka ihinda rĩũkĩte. (Isa. 45:21) No ndĩheanaga ũhoro wothe wĩgiĩ ũrĩa ekaga ũguo kana rĩrĩa ekaga ũguo, o na kana mũigana wa maũndũ marĩa athuuraga kũmenya kabere. Kwoguo tũtiũĩ maũndũ mothe megiĩ ũhoti wa Jehova wa kũmenya maũndũ marĩa mageekĩka. O na kũrĩ ũguo, rekei twarĩrĩrie maũndũ maigana ũna tũĩ.

Jehova arĩ na ũhoti wa gwĩka ũndũ o wothe, no rĩmwe nĩ athuuraga kwaga gwĩka maũndũ mamwe. No ahũthĩre ũũgĩ wake mũrikĩru kũmenya ũndũ o wothe wĩgiĩ mahinda mokĩte. (Rom. 11:33) No tondũ nĩ ahotaga kwĩgirĩrĩria na njĩra nginyanĩru, rĩmwe nĩ athuuraga kwaga kũmenya maũndũ mamwe mageekĩka ihinda rĩũkĩte.—Ringithania Isaia 42:14.

Jehova nĩ atũmaga wendi wake ũhinge. Ũndũ ũcio ũhutanĩtie atĩa na ũhoti wake wa kũmenya maũndũ marĩa mageekĩka ihinda rĩũkĩte? Isaia 46:10 yugaga ũũ: “Kuuma kĩambĩrĩria nĩ menyithanagia maũndũ marĩa mageekĩka, na ngamenyithania kuuma o tene maũndũ marĩa matarĩ marekĩka. Ngoiga atĩrĩ, ‘Itua rĩakwa nĩ rĩgaatũũra, na nĩ ngeeka ũrĩa wothe ndĩrenda.’”

Kwoguo ũndũ ũmwe ũtũmaga Jehova ahote kũmenyithania maũndũ marĩa mageekĩka ihinda rĩũkĩte nĩ tondũ arĩ na ũhoti wa gũtũma maũndũ mekĩke. Ndabataraga kuona kabere ũrĩa maũndũ mageekĩka ihinda rĩũkĩte ta ũrĩa mũndũ angĩrũgia thenema nĩguo one ũrĩa ĩkũrĩkĩrĩra. Handũ ha ũguo, Jehova no abange ũndũ mũna ũgeekĩka ihinda rĩna, acoke atũme ũndũ ũcio wĩkĩke ihinda rĩu rĩakinya.—Tham. 9:​5, 6; Mat. 24:36; Atũm. 17:31.

Nĩkĩo Bibilia ĩhũthagĩra ciugo ta “nĩ ndaũhaarĩrĩirie,” “nĩ ndaũthondekete,” na “[nĩ] nduĩte gwĩka” ĩgĩtaarĩria itemi rĩa Jehova ũhoro-inĩ wĩgiĩ maũndũ mamwe mageekĩka ihinda rĩũkĩte. (2 Ath. 19:25; kohoro ka magũrũ-inĩ; Isa. 46:11) Ciugo icio itaũrĩtwo kuumana na kiugo gĩkonainie na kiugo kĩngĩtaũrũo “mũũmbi wa nyũngũ.” (Jer. 18:​3, 4) O ta ũrĩa mũũmbi wa nyũngũ angĩkũmbakũmba rĩũmba nginya rĩtuĩke nyũngũ thaka, no taguo Jehova angĩerekeria kana atongorie maũndũ nĩguo ahingie wendi wake.—Ef. 1:11.

Jehova nĩ atũheete wĩyathi wa gwĩthuurĩra. Ndakoragwo abangĩte ũrĩa ũtũũro wa mũndũ ũgaaikara, kana agatũma mũndũ mwega eke ũndũ ũngĩtũma akaaniinwo. Akoragwo aheete andũ othe wĩyathi wa gwĩthuurĩra njĩra ĩrĩa mekũrũmĩrĩra, no nĩ amekagĩra ngoro mathuure njĩra ĩrĩa yagĩrĩire.

Ta wĩcirie ngerekano ici igĩrĩ. Ya mbere ĩgiĩ aikari a itũũra rĩa Nineve. Jehova nĩ aamenyithanĩtie kabere atĩ itũũra rĩu nĩ rĩngĩaniinirũo nĩ ũndũ wa waganu warĩo. No rĩrĩa andũ acio a Nineve meeririre, Jehova “akĩĩricũkwo ũũru ũrĩa ooigĩte atĩ nĩ ekũmarehera, na ndaigana kũmarehera.” (Jona 3:​1-10) Jehova nĩ aagarũrĩire ũndũ ũrĩa aaugĩte nĩ ũgwĩkĩka tondũ andũ a Nineve nĩ maahũthĩrire wega wĩyathi wao wa gwĩthuurĩra na njĩra ya kwĩrira, magĩathĩkĩra mũkaana ũrĩa Jehova aamaheete.

Ngerekano ya kerĩ nĩ ya ũrathi wĩgiĩ Kurusu, ũrĩa ũngĩarekereirie Ayahudi kuuma ithamĩrio na athane hekarũ ya Jehova yakwo rĩngĩ. (Isa. 44:26–45:4) Mũthamaki Kurusu wa Perisia nĩwe wahingirie ũrathi ũcio. (Ezar. 1:​1-4) No Kurusu ndaathathayagia Ngai ũrĩa wa ma. Jehova aahũthĩrire Kurusu kũhingia ũrathi ũcio atekũingĩrĩra wĩyathi wa Kurusu wa gũthuura nũũ egũthathaiya.—Thim. 21:1.

Twarĩrĩria o maũndũ manini makonainie na ũhoti wa Jehova wa kũmenya maũndũ kabere. Ma nĩ atĩ, gũtirĩ mũndũ ũngĩtaũkĩrũo biũ nĩ njĩra cia Jehova. (Isa. 55:​8, 9) No maũndũ marĩa Jehova aguũrĩtie nĩ matũmaga twĩtĩkie biũ atĩ hingo ciothe ekaga ũndũ ũrĩa wagĩrĩire, nginya rĩrĩa aramenyithania maũndũ marĩa mageekĩka ihinda rĩũkĩte.