Ombiibeli oya yelifa nawa kutya Jehova ota dulu okuxunganeka onakwiiwa. (Jes. 45:21) Inai yelifa ouyelele aushe u na sha nanghee te ke shi ninga, ile kutya onaini te ke shi ninga, ile nokuli kutya okwa hoolola okushiiva shi fike peni. Onghee katu shii ashishe kombinga yokudula kwaJehova okuxunganeka onakwiiwa. Ashike ope na oinima inini oyo tu shii.

Jehova ota dulu okuninga keshe osho a hala, ashike omafimbo amwe, oha hoolola okuhaninga oinima. Jehova ota dulu okulongifa ounongo waye inau ngabekwa, opo a xunganeke keshe osho a tokola. (Rom. 11:33) Ndele molwaashi oku na elipangelo filufilu, ota dulu yo okuhoolola okuhashiiva osho tashi ka ningwa. Yelekanifa Jesaja 42:14.

Jehova oha ningifa ehalo laye li longwe. Ongahelipi osho tashi tu kwafele tu ude ko okudula kwaye ku na sha nokuxunganeka onakwiiwa? Jesaja 46:​10, KB-13, okwa ti: “Ame ou nda holola kehovelo inya tai ke uya, oikulu ei yonale fimbo inai ningwa; Ame ou handi ti: ‘Omhangela yange otai ka kala po, nakeshe eshi nda hala ohandi shi wanifa.’”

Etomheno limwe molwaashi Jehova ta dulu okuxunganeka onakwiiwa ololo kutya oku na eenghono dokuningifa oinima i ningwe. Jehova ina pumbwa okushiiva kutya oshike tashi ka ningwa monakwiiwa monghedi ya faafana naamo hatu shiiva osho tashi ka ningwa po, mokulesha pexulilo lembo, opo tu shiive oshidjemo. Ponhele yaasho, Jehova ota dulu okutokola kutya oshinima shonhumba otashi ka ningwa pefimbo lokondadalunde, opo nee ote shi ningifa shi ningwe, ngeenge efimbo ola fiki. — Ex. 9:​5, 6; Mat. 24:36; Oil. 17:31.

Omolwetomheno olo, Ombiibeli oya longifa omautumbulilo ngaashi ‘okulongekida,’ ‘okuninga’ nosho yo ‘okutota,’ opo i yelife osho Jehova ta ningi shi na sha noiningwanima imwe yomonakwiiwa. (2 Eeh. 19:25; Jes. 46:​11, KB-13) Omautumbulilo oo okwa tolokwa okudja koshitya shomelaka lopehovelo osho sha pambafana neityo ‘lomuhongi woitoo.’ (Jer. 18:​4, KB-13) Ngaashi ashike omuhongi woitoo onghulungu ta dulu okuma oshiyuma shiwa medu lelova, Jehova naye ota dulu okuma, ile okulinyengifa oinima, opo a wanife po ehalo laye. — Ef. 1:11.

Jehova okwa fimaneka oshali yoye yokuninga omatokolo. Ina nuna onghalamwenyo yomunhu keshe. Iha ningifa yo ovanamitimadiwa va ninge oshinima shonhumba osho tashi va ningifa va hanaunwe po. Oha efa ovanhu aveshe va hoolole eendjila davo, nohe va ladipike va hoolole ondjila oyo ya yuka.

Natu ka taleni koihopaenenwa ivali. Oshihopaenenwa shotete osha kwatela mo ovakalimo vomuNinive. Jehova okwa li a xunganeka kutya oshilando osho otashi ka hanaunwa po omolwowii washo. Ashike ovakalimo vamo ova li ve lidilulula, na Jehova okwa li e “lialuluka komupya ou Ye e u tile e u va ningile, ndele Ye ine shi ninga.” (Jona 3:​1-10, KB-13) Jehova okwa li a lundulula omadiladilo aye e na sha naasho a li a xunganeka, molwaashi Ovaninive ova li ve lialuka konima eshi va uda etumwalaka lelondwelo laJehova olo e va tumina.

Oshihopaenenwa oshitivali oshi na sha nexunganeko li na sha nokufindana kwaKores, oo a li ta ka mangulula Ovajuda moukwatwa nokuyandja elombwelo lokutungulula otembeli yaJehova. (Jes. 44:26–45:4) Ohamba Kores yaPersia oya li ya wanifa po exunganeko olo. (Esra 1:​1-4) Ashike Kores ka li ha longele Kalunga kashili. Jehova okwa longifa Kores a wanife po exunganeko olo, ndele okwa pitika Kores a ninge etokolo kutya olyelye a hala okulongela. — Omayel. 21:1.

Oyo oi li ashike oinima inini oyo Jehova ha tale kuyo ngeenge ta xunganeke shi na sha nonakwiiwa. Kape na omunhu ta dulu okuuda ko pauyadi eendjila daJehova. (Jes. 55:​8, 9) Ashike osho tu shii kombinga yaJehova otashi pameke eitavelo letu olo kutya oha ningi alushe osho sha yuka, mwa kwatelwa nongeenge ta xunganeke onakwiiwa.