Biibilimi allassimavoq Jehova siunissaq pillugu siulittuisinnaasoq. (Es 45:21) Kisianni qanoq aamma qaqugukkut taamaalior­tarnersoq qanorlu annertutigisumik ilisimasaqarusunnera allassimanngilaq. Taamaattumik Jehovap siulittuisin­naanera pillugu paasisagut killeqarput. Ukuli nalunngilagut:

Jehova piumasamisut qanorluunniit iliorsinnaavoq, ilaannikkulli taamaalior­niarnani aalajangertarpoq. Killeqan­ngitsumik ilisimas­suseqarami sunaluunniit siulittuutigisinnaavaa. (Rom 11:33) Aamma imminut aqulluin­narsinnaagami siunissami pisussat ilisimaniarnagit aalajangersinnaavoq. – Aamma takuuk Esaja 42:14.

Jehovap piumasani naammas­sisarpaa. Tamanna siulittuisin­naaneranut qanoq attuumas­suteqarpa? Esaja 46:10-mi ima nassuiar­neqarpoq: “Pileqqaar­nerannit qanoq pisoqarnissaa nalunaarutigaara, itsaanilli suli pinngitsut oqaatigaakka. Maanna ima oqarpunga: Pilersaarutiga aalajaappoq, piumasakka tamaasa naammas­sissavakka.”

Tassa Jehova arlaannik pisoqar­titsisin­naagami siunissaq pillugu siulittuisinnaavoq. Uagut filmimi qanoq pisoqarumaarnera paaserusuk­kutsigu naanera isiginnaarsin­naavarput. Piffissamulli tunngatillugu taamaanngilaq. Jehovap siunissami pisussat paasinissaat pisariaqar­tinngilai. Aalajangersinnaavoq piffissami aalajangersimasumi arlaannik pisoqarnissaa, piffissarlu nalliuppat taamatut pisoqar­titsisin­naalluni. – Mos 2. 9:5, 6; Mat 24:36; ApS 17:31.

Taamaattumik Jehovap pisussanut tunngatillugu iliuusissai nassuiar­niarlugit Biibilimi oqaatsit uku atorneqartarput: ‘Ilusilersorpaa’ aamma ‘pilersaarutigaa’. (Kng 2. 19:25; Es 46:11) Allassimaq­qaarfinni oqaaseq atorneqartoq ‘marriortumut’ eqqaanarpoq. (Jer 18:4) Soorlu marriortup pikkorissup naasulivimmik sananiarluni marraq ilusilersortaraa, taamatuttaaq Jehovap piumasani naammas­siumallugu pisussat ilusilersorsinnaavai, imaluunniit aqussinnaavai. – Ef 1:11.

Jehovap inuit ataasiakkaat nammineq aalajangiisin­naatippai. Inuup inuunerani pisussat aalajangereerneq ajorpai. Aamma inunnik eqqortuliorusuttunik ajunaarutigisin­naasaannik iliuuseqar­titsineq ajorpoq. Kikkut tamaasa qanoq inuuneqas­sanerlutik nammineq aalajangiisin­naatippai, ajunngitsumilli iliuuseqar­nissaannut kajumis­saartarpai.

Marlunnik assersuuteqariarta. Siullermi illoqarfimmi Niinivimi innuttaasut pineqarput. Innuttaasut ajortulior­tarnerat pissutigalugu illoqarfiup piuneerun­neqarnissaa Jehovap siulittuutigisimavaa. Peqqissimimmatali Jehovap “aalajangigarigaluani allanngortippaa perluk sioorasaarutigigaluani nalliutin­ngitsoor­tillugu”. (Jon 3:1-10) Niinivimiut Jehovap mianersoq­qussutaa tusarnaarlugu namminneq aalajangiisin­naatitaanertik atorlugu allamik isumataarmata Jehovap isummani allanngortippaa.

Oqaluttuap aappaani ajugaasussaq Kyrosi pineqarpoq. Taassuma juutit aallarus­saaqqaneranni aniguisissavai guutisiorfiullu Jehovamut pigititaasup sanaqqin­neqarnissaa peqqussutigalugu. (Es 44:26–45:4) Perserit kunngiata Kyrosip siulittuut tamanna eqquutitippaa. (Ezra 1:1-4) Kyrosilli Guuti ilumoortutuaq guutisiorfiginngilaa. Tassa Jehovap siulittuutini eqquutsin­niarlugu Kyrosi atorpaa, imminulli guutisiorfigeq­qulluni pinngitsaalinngilaa. – Uss 21:1.

Jehovap siulittuisin­naaneranut tunngasut paasisin­naasagut amerlanerungaarput. Inuummi kialluunniit Jehovap eqqarsar­tariaasia iliuusiilu tamakkiisumik paasisin­naanngilai. (Es 55:8, 9) Taamaattorli Jehova siulittuisin­naaneralu pillugit paasisagut eqqortumik iliuuseqar­tuaannar­neranik upperin­ninnitsinnik nakussatsis­sutaapput.