O Bibidya ilondekesa ni kidi kyoso kwila Jihova utena kumona o ima yanda bhita ku pholo. (Iza. 45:21) Maji yene ki ijimbulula o ima yoso yalungu ni kyebhi Jihova kyene mubhanga kiki, mba mu ithangana yebhi, mba-phe ima ikuxi isola mwene o kwijiya. Mu kiki, etu kitwejiya o ima yoso yalungu ni kutena kwa Nzambi kwa kumona o ima yanda bhita ku pholo. Maji sayi ima itwejiya.

Jihova utena kubhanga kabasa kima kyamesena, maji sayi ithangana mwene usola kwila sayi ima kanda ku ibhanga. Bhukaxi ka unjimu we wakambe o disukilu, mwene utena kusola kumona kima kyoso-kyoso kyamesena, kyanda bhita ku hadya. (Lom. 11:33) Kuma Jihova wala ni kutena kwa kuditumina mba kudilanga ni kuyuka kwoso, mwene utena kusola se ima yebhi yanda bhita ku pholo yanda kwijiya ni yebhi kanda ijiya.—Sokesa ni Izaya 42:14.

Jihova ubhangesa kwila o vondadi ye idikumbidila. Kyebhi o kwijiya o kidi kiki, ki tukwatekesa kutendela o kutena kwe kwa kumona o ima yanda bhita ku pholo? O divulu dya Izaya 46:10 dijimbulula: “Ngi mukwa kutanga o dizubhilu tundé kyá bhu dimatekenu, tundé mu xahulu muná ngi tanga ima kiluwa iza-ku; ngixi: Phangu yami inangenena, ngenda ni kubhanga vondadi yami yoso.”

Kyenyiki, Jihova utena kutanga mba kumona o ima yanda bhita ku hadya, mukonda mwene wala ni kutena kwa kubhangesa kwila o ima idikumbidila. Jihova kabhingi kusota kwijiya o ima yanda bhita ku pholo, mu ukexilu umoxi utwene mubhanga etu kyoso ki twamutanga divulu anga tuya mutalala mba kutanga ku disukilu phala kwijiya se ima yebhi itwanda sanga-ku. Muveji dya kiki, Jihova utena kuxinda o kithangana kyanda bhita o kima kyamesena kwila kibhita, ni kubhangesa kwila kyene kibhita ngo mwene, kyoso kyanda bhixila o kithangana mba o kizuwa kyenyokyo.—Mak. 9:​5, 6; Mat. 24:36; Ika. 17:31.

Mukonda dya kiki, o Bibidya itumbula izwelu kala, “nga isokelesa,” ni “nga ixindi,” phala kujimbulula ihi ibhanga Jihova yalungu ni ima yanda bhita ku hadya. (2 Jis. 19:25; Iza. 46:11) O izwelu yiyi mu dimi mu yatundu, yalungu ni kizwelu kilombolola “ngumbi.” (Jel. 18:4) Kala o ngumbi utena kubhangesa o utuma kubhiluka kitutu kyafwama, Jihova we utena kubhangesa, mba kulungulula o ima phala kukumbidila o vondadi ye.—Efe. 1:11.

Jihova uxila o ufolo wa kusola wabhana ku athu. Jihova kaxindi o ima yanda bhita ku mwenyu wa muthu ni muthu. Mwene we kene mubhangesa kwila o athu ambote abhanga kima kya abhangesa kufwa. Mwene utwehela etwenyoso kusola o ukexilu utwamesena kwambata o mwenyu wetu, maji utulonga we yebhi o njila yambote.

Tumone phangu jiyadi. O ya dyanga, yalungu ni athu akwa mbanza ya Ninive. Jihova wa kanene kwila o mbanza eji ibwika mukonda dya ima yayibha yexile mubhanga-mu. Maji kyoso athu mu mbanza kya dyela o ituxi ya, Jihova “walungulula o kibanzelu kyê kya kubheka o kibwikilu, kakibheka dingi.” (Jona 3:​1-10) Jihova walungulula kibanzelu kye kyalungu ni kima kya kanene o kubhanga, mukonda akwa Ninive kyoso kyevu o njimbu ya a tumikisa Jihova, asolo kulungulula o wendelu wa.

O phangu ya kayadi, o kikanenu kyalungu ni mutolodi amwixanene Silu, weji bhulula o Jijudé ku ubhika, ni kutumina kutungulula o tembulu ya Jihova. (Iza. 44:26–45:4) O Sobha Silu, mukwa Pelesa, wa kumbidila o kikanenu kiki. (Eji. 1:​1-4) Maji, Silu kexile mubheza o Nzambi ya kidi. Jihova wabhangesa kwila Silu ukumbidila o kikanenu kye, maji kamujijidika phala kumubheza. Jihova waxila o ufolo wexile-nawu Silu wakusola se Nzambi yebhi yeji bheza.—Jisa. 21:1.

Kidi kwila yiyi ki yene ngo o ima ixinganeka Jihova kyoso kya sola kumona o ima yanda bhita ku pholo. Mu kidi kana-ku muthu utena kutendela yoso ixinganeka ni ibhanga Jihova. (Iza. 55:​8, 9) Maji ne kiki, yoso ya tujimbulwila Jihova, iswinisa o kixikanu kyetu kya kwila ithangana yoso mwene ubhanga ngo ima yambote—kate mwene kyoso kyatanga o ima yanda bhita ku pholo.