Кʹьтеба Пироз дьбежә кӧ ԛәԝата Йаһоԝа һәйә, ԝәки пешда бежә кӧ ахьрийеда ԝе чь бьԛәԝьмә (Ишайа 45:21). Ле Кʹьтеба Пироз набежә кӧ әԝ ве ԛәԝате кʹәнге, чаԝа у чьԛаси дьдә хәбате. Ләма жи әм дәрһәԛа ве ԛәԝате һәр тьшти ньзаньн. Диса жи, ԝәрә дина хԝә бьдьнә ван чәнд фькьра кӧ әм жь Кʹьтеба Пироз педьһʹәсьн.

Хенщи синоред кӧ Йаһоԝа хԝәрʹа датинә, синоред ԛәԝата ԝи тʹӧнә нә. Һәмьки бь сайа биланийа ԝийә беһʹәсаб, ԛәԝата ԝи һәйә кӧ һәр тьшти пешда бежә (Рʹомайи 11:33). Ле чьмки Йаһоԝа жь алийе хԝәгьртьнеда беԛьсур ә, әԝ дькарә хԝә бьгьрә у сафи кә кӧ ньзаньбә ахьрийеда чь ԝе бьԛәԝьмә (Бәрамбәр кә Ишайа 42:14).

Йаһоԝа ӧса дькә, ԝәки ԛьрара ԝи бе сери. Гәло әв йәк чаԝа ви фәрәсәте ԝива гьредайи йә, кӧ әԝ дькарә ахьрийе пешда бьзаньбә? Ишайа 46:10 ӧса дьбежә: «Әз сәре-серида дьбежьм ве йәке, чь кӧ ве хьлазийеда бьбә, у жь бәреда ве йәке, чь кӧ һе нәбуйә. Әз дьбежьм: ‹Ԛьрара мьн ԝе бе сери у чь кӧ мьн сафи кьрийә, әзе бькьм, ДТʹ›».

Жь бо ве йәке кӧ ԛәԝата Йаһоԝа һәйә хԝәстьна хԝә бинә сери, әԝ дькарә бьзаньбә кӧ чь ԝе бьԛәԝьмә. Мәрьв щарна пешийе хьлазийа филме дьньһерʹьн, ԝәки пешда бьвиньн кӧ хьлазийеда чь ԝе бьԛәԝьмә. Ле Йаһоԝарʹа нәлазьм ә ӧса бькә, ԝәки бьзаньбә һәла ахьрийеда чь ԝе бьԛәԝьмә. Йаһоԝа дькарә сафи кә кӧ тьштәк ԝәхтәкә кʹьфшкьрида бьԛәԝьмә, у гава ԝәхт те, әԝ дькарә ӧса бькә ԝәки әԝ тьшт бе сери (Дәркʹәтьн 9:5, 6; Мәтта 24:36; Кʹаред Шандийа 17:31).

Ләма, Кʹьтеба Пироз бь готьнед «һазьр кьр», «чекьр» у «ԛьрар кьр» нишан дькә, ԝәки Йаһоԝа чаԝа сәр һьнә ԛәԝьмандьнед ахьрийе һʹӧкӧм дькә (2 Пʹадшати 19:25, ДТʹ; Ишайа 46:11, ДТʹ). Әв готьн хәбәрәкә Ибранива гьредайи нә, йа кӧ те һʹәсабе «щерʹкәр» (Йерәмйа 18:4). Чаԝа кӧ щерʹкәрәки һостә дькарә форме бьдә һʹәрʹийе, ԝәки дәрданәкә бәдәԝ чекә, Йаһоԝа жи дькарә ча бежи форме бьдә ԛәԝьмандьна, йане ӧса бькә, ԝәки ԛьрара ԝи бе сери (Әфәси 1:11).

Йаһоԝа ԛәдьре азайа бьжартьна мәрьва дьгьрә. Әԝи бәхте һәр кәси сәр әʹнийа ԝан нәньвисийә. Ӧса жи, әԝ набә сәбәб кӧ мәрьвед дьлсах гӧнә бькьн у бенә кʹӧтакьрьне. Әԝ изьне дьдә кӧ һәр кәс рʹийа хԝә бьжберә, ле ԝана һелан дькә, ԝәки әԝана рʹийа рʹаст бьжберьн.

Ԝәрә әм дина хԝә бьдьнә ван дӧ мәсәла: Мәсәла йәке дәрһәԛа щьмәʹта Нинәԝайе йә. Йаһоԝа пешда готьбу кӧ жь бо хьрабийа ԝан, әԝе ви бажари ԝеран кә. Ле гава щьмәʹта Нинәԝайе тʹобә кьр, Йаһоԝа «бона ԝе хәзәба кӧ готьбу ԝе банийа ль сәре ԝан, готьна хԝә гӧһаст у әԝ йәк нә ани ль сәре ԝан» (Уньс 3:1-10). Бәле, чахе щьмәʹта Нинәԝайе азайа хԝәйә бьжартьне данә хәбате, кӧ гӧһ данә хәбәра Йаһоԝа у тʹобә кьрьн, Йаһоԝа фькьра хԝә гӧһаст у фәрмана хԝә бәтал кьр.

Мәсәла дӧда дәрһәԛа пʹадшаки Фарьса йә, наве кʹижани Корәш бу. Кʹьтеба Пироз пʹехәмбәрти кьрьбу, кӧ әԝе Щьһуйед аксоркьри аза кә у фәрмане бьдә, ԝәки пʹарьстгәһа Йаһоԝа тʹәзәда ава кьн (Ишайа 44:26–45:4). Готьнед Йаһоԝа бь сайа Корәш Пʹадша һатьн сери (Әзра 1:1-4). Ле диса жи, Корәш Йаһоԝа нәдьһʹәбанд. Рʹаст ә Йаһоԝа готьнед хԝә пе Корәш ани сери, йәкә әԝи сәр азайа ԝийә бьжартьне һʹӧкӧм нәкьр, ле изьн да ԝи, ԝәки әԝ хԝәха сафи кә кʹе бьһʹәбинә (Мәтʹәлок 21:1).

Һәмьки тʹәне әв тьшт ниньн чь жи мә шеԝьр кьр, кӧ Йаһоԝа һьлдьдә һʹәсаб, гава әԝ пешда дьбежә кӧ чь ԝе бьԛәԝьмә. Ле бәле, чьмки әм мәри нә, әм нькарьн фькьр у кьред Йаһоԝа бь тʹәмами фәʹм бькьн (Ишайа 55:8, 9). Диса жи, тьштед кӧ Йаһоԝа Кʹьтеба Пирозда нишани мә кьрийә, баԝәрийа мә дьһа ԛәԝи дькьн ве йәкеда, кӧ әԝе һәр тʹьм ве йәке бькә чь кӧ рʹаст ә!