Bibl uleeleej hatook neey Yehow udy ni bukash bwa kuleeb myand yiiyiiy kulongek. (Ye. 45:21) Kiishoh bend mumvwiij myand yoos habitaatal mushind eecy diib didyey ulong naak eecy buuny bwa myand yidyey mukat bwindiy kumanyik. Nook, katwiishoh bend bamanyik myand yoos habitaatal bukash budy naabw Yehow bwa kuleeb myand yiiyiiy. Ki kudy myand yikeeh yitudy bamanyik.

Yehow kiishoh bend ni mikal hakufulok yidyey mwiiteekel yiiy kaayend. Yehow udy mwa kukal mudimw ni meej mindiy maakiish ni mikal bwa kuleeb myand yoos yidyey mukat bwa yilongek. (Rom 11:33) Ki bu mudyey wiikand mu mushind muwaakan, udy mwa kulek kumanyik myand yiikal mwa kulongek.—Fwanyikij ni Yeshaay 42:14, NWT.

Yehow uloolong bwa lukat lwindiy lulongek. I mushind kaay udy kulong kwindiy kwa nook kuhetangan ni bukash budyey naabw bwa kuleeb myand yiiyiiy kulongek? Yeshaay 46:10 umvumvwiij neey: “Naakady muman kuleej kihacil ka mim teng ku butambwiil. Koos ni koosook, naakady muleeb myand yaakady kayiy yanj kulongek. Naleeleeb neey: ‘Myand yinakaakaam kulong i yiyeey, yiiyiiy kulongek. Ni niiyiiy kulong myand yoos yinady mukat.’”

Kabingil kaloolong bwa Yehow kuleeb myand yiiyiiy kulongek, i bwaal udy ni bukash bwa kulong bwa yilongek. Yehow kiish ukaam kumanyik myand yiikal mwa kulongek mu mafuk miiyiiy—bu mutudyaakal tutal misang yikwaabw may ma bulekel ma mu mukand bwa kumanyik ciiyiiy kulongek ku bulekel. Ki Yehow udy mwa kwangat dihangadik dya neey bwaal kaahand bwiiyiiy bulongek ha ciisang kaahand, ni udy mwa kulong bwa neey bwaal aabw bulongek teng hady ciisang aacy cikumban.—Cim. 9:5, 6; Mat. 24:36; Yil 17:31.

Bwa kabingil aak, Bibl ukaakal mudimw ni myaak bu yiineey: ‘ulongolweel,’ “Meej manady mulang bwa kulong” bwa kumvwiij cidy Yehow ulong habitaatal yimw myand yiiyiiy kulongek. (2 Bak. 19:25; Ye. 46:11) Myaak eey, i biiyaalabul bilondeshel mwaak wa mu cileebel cifundilobw Bibl uheehetangan ni mwaak ‘mubumb a manying.’ (Jer. 18:4) Teng mudy mubumb’a manying mushimat mwa kwangat cimot cya diim bwa kubumb nying mulengel weeh, ki mudy Yehow mwa kulong myand mu mushind kaahand bwa kukumbaj lukat lwindiy.—Ef. 1:11.

Yehow uneeneemek cya bukish cidyey muh baat cya kwiisungwiil myand. Kiish mulongolweeloh bend muut woos myand yiikal mwa kumufikil mu shikacil indiy, eecy kiish usakoh bend baat ba micim yilengel bwa kulongobw bwaal kaahand budy mwa kwiibafikish ku kubutuk. I mwiitabil baat boos bwa kusungul njil udyobw bakat kulond, ki wiibambambil bwa kusungul njil mulengel.

Tutalaay bileejel bibidy. Cya kuuhal i cya biin Niniiv. Yehow uleebel kal neey: baakady mwa kwiiy kubutul cibunj eecy bwa myand yibiih yaakady yilongekomw. Ki haakady biin Niniiv biikunying ni balek myand yaababw yibiih, Yehow “ushiitulwiil meej umb waalek bwa kwiibamweesh mal bu mwaakadyey muman kulongolol.” (Jonas 3:1-10) Yehow ushiitulwiil meej mindiy habitaatal cyaakadyey muman kuleeb, bwaal biin Niniiv bakadil mudimw ni kwiisungwiil kwaababw kwa myand bwa kwiifwiij naay ni kulond musah waakadyobw biibadimwiij nend wa kudy Yehow.

Cileejel ciibiidy i cya diiy dya buprofet ditaatal cilobw cya diivit kaahand dindiy Kirus waakady mwa kuhatul biin Yuud mu buhik ni kutum diiy bwa kwiibakululobw tempel a Yehow. (Ye. 44:26–45:4) Mukaleng Kirus wa biin peres ukumbajil diiy dya buprofet aady. (Esdras 1:1-4) Ki Kirus kaakadyoh bend uhambidil Mawej a biin-biin. Yehow ukadil mudimw ni Kirus bwa kukumbaj diiy dya buprofet eedy, ki kaakadyoh bend mulongesh Kirus ku makand bwa kumuhambidiley.—Tus. 21:1.

Cya biin, yiineey i myand yikeeh bituh yidy Yehow ukal naay mudimw hadyey uleeb bwa myand yiiyiiy kulongek. Biin-biin, kakwiish muut ning waakaabumw udy mumanyik myand yoos yidy Yehow ulang ni yidyey ulong. (Ye. 55:8, 9) Nook, myand yidy Yehow muleej yikaakashish diitabij diitut mu mushind wa neey uloolong teng myand yilengel—ni hadyey uleeb cikwaabw bwa myand yiiyiiy kulongek.