Baibolo umwesha patoka’mba Yehoba uji na bulume bwa kwambila jimo bikamweka kulutwe. (Isa. 45:21) Bino kechi walumbulula kimye nangwa jishinda jo obilamo bino nangwa byo afuukula pa kuyuka bikamweka kulutwe ne. Onkao mambo, kechi twayuka bishinka byonse byaamba pa bulume bwa Yehoba bwa kwambila jimo bintu bikamweka kulutwe ne. Pano bino kuji bintu bimo byo twayuka.

Yehoba uji na bulume bwa kuba kiji kyonse kyo akeba, bino pa bimye bimo ufuukulapo kubula kuba bintu bimo. Byo aji na maana abula kupela, Yehoba wakonsha kwambila jimo kikamweka kulutwe kiji kyonse inge wafuukulapo kuba bino. (Loma 11:33) Bino na mambo a kuba’mba wikanya mu jishinda jaoloka, wakonsha ne kufuukulapo kubula kukeba kuyuka bikamweka kulutwe.​—Esakanyaiko Isaya 42:14.

Yehoba ulengela kyaswa muchima wanji kubiwa. Kino kyakwatankana byepi na bulume bwanji bwa kwambila jimo bikamweka kulutwe? Isaya 46:10 walumbulula’mba: “Kufumatu ku ntendekelo amiwa ñambila jimo bintu bikamweka kulutwe, kabiji kufumatu ne kala kene amiwa ñamba bintu bikyangye kumweka. Naamba namba, ‘Bintu byo nafuukula bikafika, kabiji nkoba kintu kyonse kyo nkeba.’”

Onkao mambo, kishinka kimo kilengela Yehoba kwambila jimo bikamweka kulutwe ke na mambo a kuba’mba uji na bulume bwa kulengela bintu kumweka. Aye kechi wendesha kimye bukiji pa kuba’mba ayuke bikamweka kulutwe, apa bino waamba’mba bino byo bintu bikamweka kulutwe ne. Pakuba Yehoba wakonsha kufuukula kuba’mba kintu kikamweke pa kimye kyo atongola aye mwine ne kwikilengela kumweka inge akyo kimye kyafika.​—Lupu. 9:5, 6; Mat. 24:36; Byu. 17:31.

O ene mambo Baibolo o engijisha byambo nabiji bya kuba’mba “nekinengezhezhe,” “nekilengele,” ne “nafuukula” pa kulumbulula Yehoba byo oba na bintu bimo bikamweka kulutwe. (2 Mfu. 19:25; tubyambo twa munshi.; Isa. 46:11) Bino byambo bebituntulula kufuma ku kyambo kya mu mulaka mwine mutanshi kipasha na kyambo kilumbulula amba “mbumbi.” (Yele. 18:4) Byonkatu mbumbi byo akonsha kwingijisha buchimba kulenga kintu kyawama bingi, Yehoba naye wakonsha kulenga nangwa’mba kwalula bintu pa kuba’mba afikizhe kyaswa muchima wanji.​—Efi. 1:11.

Yehoba wanemeka bupe bwa kwifuukwila bintu bo etupa. Yehoba kechi utongwela jimo bintu bikamwekela muntu ne. Kabiji kechi ulengela bantu bawama kuba bintu byakonsha kwibalengela kumanama ne. Waswisha bantu bonse kwisajilapo abo bene bwikalo bo bakeba kwikala kabiji wibafunjisha ne byo bafwainwa kuba pa kuba’mba bekalenga bwikalo bwawama.

Twayai twisambeko pa bintu bibiji. Tusakutendekelapo kwisamba pa bangikazhi ba mu Ninevwa. Yehoba waambijile jimo kuba’mba uno muzhi bakamonauna na mambo a bubi bwajingamo. Nangwa byonkabyo, bangikazhi ba mu uno muzhi byo balapijile, Yehoba “walangulukilepo pa malwa o akebelenga kwibaletela, kabiji kechi wialetele ne.” (Yona 3:1-10) Yehoba wapimpwile byo akebelenga kuba mambo bena Ninevwa baingijishe bulongo bupe bwa kwifuukwilapo bintu byo balapijile ku byambo bya lujimuno byafumine kwi Yehoba.

Kintu kikwabo kyo tusakwisambapo ke bungauzhi bwaamba pe Kilusa washindañene ne kupokolola Bayudea bajinga mu buzha ne kupana mukambizho wa kushimukulula nzubo ya Yehoba. (Isa. 44:26–45:4) Mfumu Kilusa mwina Pelisha ye wafikizhe buno bungauzhi. (Eze. 1:1-4) Nangwa byonkabyo, Kilusa kechi wapopwelanga Lesa ne. Yehoba waingijishe Kilusa kufikizha bungauzhi bwanji. Pano bino Yehoba waswishishe Kilusa kwisajilapo aye mwine kumupopwela nangwa ne.​—Maana 21:1.

Abino ke bintutu bicheche Yehoba byo alangulukapo inge ubena kwambila jimo pa bikamweka kulutwe. Kabiji kafwako muntu nangwa umo wakonsha kumvwisha biji milanguluko ya Yehoba ne bintu byo oba ne. (Isa. 55:8, 9) Bintu bitusolwela Yehoba bikosesha bingi luketekelo lwetu mambo twayuka’mba Yehoba kimye kyonse uba byaoloka nangwatu inge waamba pa bikamweka kulutwe.