Di Baybul mek wi no klia wan se Jiova ebul fɔ no wetin go apin tumara bambay. (Ayz. 45:21) Di Baybul nɔ ɛksplen ɔltin bɔt aw ɔ ustɛm i kin du dat ɔ ivin wetin i de disayd fɔ no. So wi nɔ no ɔltin bɔt di pawa we Jiova gɛt fɔ no wetin go apin tumara bambay. Bɔt lɛ wi tɔk bɔt sɔm tin dɛn we wi no.

Jiova ebul fɔ du ɛnitin we i want, bɔt sɔntɛnde i kin disayd nɔ fɔ du dɛn. Bikɔs Jiova in sɛns nɔ de dɔn, i ebul fɔ no bɔt ɛnitin we i want fɔ no bɔt tumara bambay. (Rom. 11:33) Bɔt bikɔs i ebul fɔ kɔntrol insɛf pafɛkt wan, i ebul disayd bak nɔ fɔ no wetin go apin.—Luk bak Ayzaya 42:14.

Jiova ebul mek wetin i want bi. Aw dis ɛp wi fɔ ɔndastand di pawa we i gɛt fɔ no wetin go apin tumara bambay? Ayzaya 46:10 tɔk se: “Frɔm di biginin a go tɔk wetin gɛt fɔ apin, ɛn frɔm trade di tin dɛn we nɔ apin yet. A se, ‘Na wetin a de disayd na in go bi, ɛn a go du ɛnitin we a want fɔ du.’”

So wan rizin we mek Jiova ebul no bɔt tumara bambay na bikɔs i gɛt di pawa fɔ mek tin dɛn apin. Jiova nɔ de tray fɔ no wetin go apin tumara bambay jɔs lɛk aw sɔntɛnde wi kin fɔwɔd fim fɔ no aw i go ɛnd. Bɔt, Jiova ebul fɔ disayd se sɔntin go apin patikyula tɛm ɛn mek da tin de apin we di tɛm rich.—Ɛks. 9:​5, 6; Mat. 24:36; Akt 17:31.

Bikɔs ɔf dis, di Baybul yuz wɔd dɛn lɛk “rɛdi,” “mek,” ɛn “dɔn disayd” fɔ tɔk bɔt wetin Jiova kin du bɔt sɔm tin dɛn we go apin tumara bambay. (2 Kiŋ 19:25; futnot; Ayz. 46:11) Dɛn translet dɛn wɔd dɛn ya frɔm wan orijinal langwej we gɛt fɔ du wit di wɔd dɛn we min “pɔsin we de wok wit kle.” (Jɛr. 18:4) Jɔs lɛk aw pɔsin we sabi wok wit kle go ebul yuz kle fɔ mek fayn tin, na so Jiova ebul fɔ mek wetin i want bi.—Ɛfi. 1:11.

Jiova de alaw pipul dɛn fɔ disayd wetin dɛn want. I nɔ de mak wetin go apin to ɛniwan pan wi; ɛn nɔto in de mek gud pipul dɛn du sɔntin we go mek bad tin apin to dɛn. I de alaw ɔlman fɔ disayd aw dɛn want fɔ liv dɛn layf, bɔt i de tich dɛn aw fɔ liv di rayt we.

Lɛ wi tɔk bɔt tu ɛgzampul dɛn. Di fɔs wan gɛt fɔ du wit di pipul dɛn we bin de na Ninivɛ. Jiova bin dɔn tɔk se dɛn go dɔnawe wit da siti de bikɔs di pipul dɛn bin de du bad bad tin dɛn. Bɔt we di pipul dɛn na Ninivɛ bin ripɛnt, Jiova bin “chenj in maynd ɛn nɔ dɔnawe wit dɛn lɛk aw i bin dɔn se i go du.” (Jona 3:​1-10) Jiova bin chenj in manyd bɔt wetin i bin se go apin bikɔs di pipul dɛn na Ninivɛ bin disayd fɔ chenj afta dɛn yɛri Jiova in wɔnin.

Di sɛkɔn ɛgzampul na bɔt di prɔfɛsi bɔt wan fɛtman we nem Sayrɔs, we go fri di Ju dɛn na Babilɔn ɛn mek dɛn bil Jiova in tɛmpul bak. (Ayz. 44:26–45:4) Kiŋ Sayrɔs na Pashia bin mek da prɔfɛsi de kam tru. (Ɛzra 1:​1-4) Bɔt, Sayrɔs nɔ bin de wɔship di tru Gɔd. Jiova bin yuz Sayrɔs fɔ mek dis prɔfɛsi kam tru, bɔt i bin alaw Sayrɔs fɔ disayd fɔ insɛf udat i want fɔ wɔship.—Prɔv. 21:1.

As wi ɔl no, dis na jɔs sɔm pan di tin dɛn we Jiova kin tink bɔt we i de yuz in pawa fɔ wetin gɛt fɔ apin tumara bambay. Fɔ tru, no mɔtalman nɔ ebul ɔndastand ɔl wetin Jiova de tink ɛn du. (Ayz. 55:​8, 9) Bɔt di tin dɛn we wi no bɔt Jiova de ɛp wi fɔ gɛt mɔ fet se i go du wetin rayt ɔltɛm, ivin we i de tɔk bɔt wetin gɛt fɔ apin tumara bambay.