လံာ်စီဆှံ ပာ်ဖျါထီၣ်ဝဲ လီၤတံၢ်လီၤဆဲးလၢ ယဟိဝၤယွၤ တဲဆိပာ်စၢၤ တၢ်လၢကဟဲကဲထီၣ်သး လၢခါဆူညါသ့. (ၡါ ၄၅:၂၁) ယဟိဝၤယွၤ တဲဆိပာ်စၢၤတၢ်ဒ်လဲၣ်, အတဲဝဲအခါဖဲလဲၣ် ဒီးအဃုထၢလၢ အကသ့ၣ်ညါ တၢ်ဂ့ၢ်ထဲလဲၣ်န့ၣ် လံာ်စီဆှံ တပာ်ဖျါထီၣ်န့ၢ်ပှၤခဲလၢာ်ဘၣ်. အဃိ ယဟိဝၤယွၤ အတၢ်သ့တၢ်ဘၣ်လၢ အတဲဆိပာ်စၢၤတၢ်န့ၣ် ပတသ့ၣ်ညါ အဂ့ၢ်ခဲလၢာ်ဘၣ်. ဘၣ်ဆၣ် တၢ်လၢပသ့ၣ်ညါန့ၣ် အိၣ်ဝဲတနီၤ.

ယဟိဝၤယွၤ မၤတၢ်သ့ကိးမံၤဒဲး ဘၣ်ဆၣ် တဘျီတခီၣ်န့ၣ် အဃုထၢဝဲလၢ အတမၤဝဲဘၣ်. ယဟိဝၤယွၤ အတၢ်ကူၣ်သ့န့ၣ် ပဂံၢ်ထီၣ်ဒွးထီၣ်မၣ် တလၢာ်ဘၣ် ဒီးအမ့ၢ်ဘၣ်သး တဲဆိပာ်စၢၤ တၢ်တမံၤမံၤန့ၣ် အတဲဆိပာ်စၢၤဝဲသ့. (ရိ ၁၁:၃၃) သနာ်က့ ခီဖျိလၢ ယဟိဝၤယွၤအိၣ်ဒီး တၢ်ပၢၤသူၣ်ပၢၤသး လၢလၢပှဲၤပှဲၤအဃိ ဘၣ်ဃးဒီး တၢ်လၢကဟဲကဲထီၣ်သး လၢခါဆူညါန့ၣ် အဃုထၢလၢ အတသ့ၣ်ညါဆိဝဲဘၣ် သ့စ့ၢ်ကီး.—ထိၣ်သတြီၤဒီး ယၡါယၤ ၄၂:၁၄.

ယဟိဝၤယွၤ မၤလၢပှဲၤထီၣ် အတၢ်ဘၣ်သး. တၢ်မ့ၢ်တၢ်တီအံၤ မၤစၢၤပှၤဒ်သိး ပကနၢ်ပၢၢ်ထီၣ် ယဟိဝၤယွၤ အတၢ်သ့တၢ်ဘၣ် ဘၣ်ဃးဒီး အတဲဆိပာ်စၢၤတၢ်လၢ ခါဆူညါအဂ့ၢ်ဒ်လဲၣ်. ယၡါယၤ ၄၆:၁၀ တဲဝဲ “လၢအခီၣ်ထံးန့ၣ် ယတဲဆိပာ်စၢၤ တၢ်လၢအကကဲထီၣ်အသး ဒီးလၢပျၢၤန့ၣ် ယတဲဆိတၢ်လၢ အတမၤအသးဒံးဘၣ်တဖၣ်လီၤ. ယတဲလၢ ‘ဒ်ယဆၢတဲာ် အသိး တၢ်ကကဲထီၣ်အသးဒ်န့ၣ် သပှၢ်တၢၢ် ဒီးတၢ်တမံၤဂ့ၤတမံၤဂ့ၤလၢ ယအဲၣ်ဒိးမၤန့ၣ် ယကမၤအီၤ.’”

ယဟိဝၤယွၤ အိၣ်ဒီးတၢ်စိတၢ်ကမီၤလၢ အကမၤကဲထီၣ်တၢ်အဃိ အတဲဆိပာ်စၢၤတၢ်လၢ ခါဆူညါအဂီၢ်သ့. အဒိ ဖဲပကွၢ်တၢ်ဂီၤမူ ဒီးဖဲပဖးလံာ်အခါ ဒ်သိး ပကသ့ၣ်ညါ တၢ်ကဲထီၣ်သး လၢအလီၢ်ခံကတၢၢ်အဂီၢ် ပကွၢ်ဆိ မ့တမ့ၢ် ပဖးဆိတၢ်ဂ့ၢ် လၢအလီၢ်ခံကတၢၢ်. သနာ်က့ မ့မ့ၢ်ယဟိဝၤယွၤန့ၣ် အတလိၣ်မၤဝဲဒ်န့ၣ်ဘၣ်. ယဟိဝၤယွၤ မ့ၢ်ဆၢတဲာ်ဝဲလၢ တၢ်တမံၤမံၤ ကကဲထီၣ်သးဖဲ တၢ်ဆၢကတီၢ်လၢ အပာ်ပနီၣ်ဝဲန့ၣ် ဖဲဆၢကတီၢ်ဘၣ်အခါ အမၤလၢပှဲၤထီၣ်ဝဲသ့.—၂ မိၤ ၉:၅, ၆; မး ၂၄:၃၆; မၤတၢ် ၁၇:၃၁.

လၢတၢ်ဂ့ၢ်အံၤအဃိ လံာ်စီဆှံသူဝဲ တၢ်ကတိၤ ဒ်သိးဒီး “ရဲၣ်ကျဲၤပာ်စၢၤ” ဒီး “တၢ်တိာ်ပာ်” ဒ်သိး ကပာ်ဖျါထီၣ် တၢ်လၢယဟိဝၤယွၤမၤဝဲ ဘၣ်ဃးဒီး တၢ်လၢကကဲထီၣ်သး လၢခါဆူညါ. (၂ စီၤပၤ ၁၉:၂၅; ၡါ ၄၆:၁၁) တၢ်ကတိၤတဖၣ်အံၤ ပှၤကွဲးကျိာ်ထံက့ၤဝဲလၢ တၢ်ကွဲးအသး လၢအခီၣ်ထံး လၢအဘၣ်ထွဲလိာ်သးဒီး တၢ်ကတိၤ လၢအခီပညီမ့ၢ်ဝဲ “ပှၤတ့သပၢၤဖိ.” (ယံး ၁၈:၄) ဒ်ပှၤတ့သပၢၤဖိ လၢအဖၠဲးတဂၤ ဟံးန့ၢ်ဝဲကပံာ်တလိၣ် ဒီးတ့ဝဲဖီကိဃံဃံလၤလၤ သ့ဝဲအသိး ယဟိဝၤယွၤ မၤလၢပှဲၤထီၣ် အတၢ်ဘၣ်သး သ့စ့ၢ်ကီး.—အ့း ၁:၁၁.

ယဟိဝၤယွၤ ဟ့ၣ်ပှၤဟီၣ်ခိၣ်ဖိ တၢ်သဘျ့လၢ ကဃုထၢတၢ်လၢ အနီၢ်ကစၢ်အဂီၢ်. ပှၤတဂၤအတၢ်အိၣ်မူ ကကဲထီၣ်သးဒ်လဲၣ်န့ၣ် ယဟိဝၤယွၤ တပာ်ပနီၣ်ဆိဝဲဘၣ်. ဒီးယဟိဝၤယွၤ တမၤဝဲဒ်သိး ပှၤလၢအဂ့ၤတဖၣ် ကမၤတၢ်တမံၤမံၤလၢ ကကဲထီၣ် တၢ်ကီတၢ်ခဲလၢ အနီၢ်ကစၢ်အဂီၢ်ဘၣ်. ယဟိဝၤယွၤ ပျဲဝဲလၢ ပှၤကိးဂၤဒဲး ကဃုထၢတၢ်လၢ တၢ်သဘျ့ ဒီးသိၣ်လိစ့ၢ်ကီး အဝဲသ့ၣ်လၢ ကအိၣ်မူကျဲလၢအဘၣ်.

ပကကွၢ်သကိး တၢ်အဒိခံခါ. တၢတခါန့ၣ် ဘၣ်ဃးဒီး ပှၤလၢအအိၣ်လၢ ဝ့ၢ်နံၤနဝ့. ယဟိဝၤယွၤ တဲဆိပာ်စၢၤဝဲလၢ ခီဖျိလၢ ဝ့ၢ်နံၤနဝ့န့ၣ် အိၣ်ထဲပှၤအၢပှၤသီအဃိ ယဟိဝၤယွၤ ကမၤဟးဂီၤကွံာ်ဝ့ၢ်. သနာ်က့ ဖဲပှၤဝ့ၢ်ဖိ ပီၢ်ယၢ်လီၤက့ၤသးအခါ ယဟိဝၤယွၤ “က့ၤဆိကမိၣ်ထံက့ၤ အတၢ်ဆၢတဲာ် ဒီးတစံၣ်ညီၣ် အဝဲသ့ၣ် ဒ်အတဲပာ်စၢၤဝဲအသိးလၢၤဘၣ်.” (နါ ၃:၁-၁၀) ပှၤနံၤနဝ့ဖိ နၢ်ဟူဝဲ တၢ်ဟ့ၣ်ပလီၢ် ဝံၤအလီၢ်ခံ ခီဖျိလၢ အဝဲသ့ၣ် ပီၢ်ယၢ်လီၤက့ၤသးအဃိ ယဟိဝၤယွၤ ဆီတလဲက့ၤ အတၢ်ဆၢတဲာ် ဘၣ်ဃးဒီး တၢ်လၢအတဲဆိပာ်စၢၤဝဲ.

တၢ်အဒိ ခံခါတခါန့ၣ် မ့ၢ်ဝဲဝံအတၢ်စံးပာ် ဘၣ်ဃးဒီး ပှၤလၢအမၤနၢၤတၢ်တဂၤ လၢအမံၤမ့ၢ် စီၤကိရ့ၣ်အဂ့ၢ်. ပှၤတဂၤအံၤ ကမၤစၢၤပှၤယူဒၤဖိ ဒ်သိးအဝဲသ့ၣ် ကပူၤဖျဲးထီၣ်လၢ ကုၢ်အလီၢ် ဒီးအကဟ့ၣ်လီၤ တၢ်ကလုၢ်လၢ ပှၤကတ့ထီၣ်က့ၤ ယဟိဝၤယွၤ အတၢ်လုၢ်ဟံၣ်. (ၡါ ၄၄:၂၆–၄၅:၄) လၢခံ ပထံၣ်ဘၣ်လၢ ဖၢၡၢၣ်အစီၤပၤကိရ့ၣ် မၤလၢပှဲၤထီၣ်ဝဲ ဝံအတၢ်စံးပာ် တခါအံၤ. (ဧ့ ၁:၁-၄) သနာ်က့ စီၤကိရ့ၣ်န့ၣ် အတကဲပှၤလၢ အဘူၣ်ထီၣ်ဘါထီၣ် ယဟိဝၤယွၤဘၣ်. ယဟိဝၤယွၤ သူစီၤကိရ့ၣ်လၢ ကမၤလၢပှဲၤထီၣ် ဝံအတၢ်စံးပာ် သနာ်က့ အဝဲတမၢဆူၣ် စီၤကိရ့ၣ်လၢ ကဘူၣ်ထီၣ်ဘါထီၣ်အီၤဘၣ်. ဒီးအဟ့ၣ်စီၤကိရ့ၣ်တၢ်သဘျ့ လၢအကဃုထၢဝဲလၢ အကဘူၣ်ထီၣ်ဘါထီၣ် မတဂၤလဲၣ်.—ကတိၤ ၂၁:၁.

ဖဲယဟိဝၤယွၤ တဲဆိပာ်စၢၤ တၢ်လၢကမၤအသးလၢ ခါဆူညါအခါ တၢ်ဂ့ၢ်လၢ အဆိကမိၣ်ဃုာ်ဝဲန့ၣ် အိၣ်အါန့ၢ်ဒံး တၢ်ဂ့ၢ်လၢ ပသ့ၣ်ညါဘၣ်ခဲအံၤဒံး. နီၢ်ကီၢ်န့ၣ် ပှၤဟီၣ်ခိၣ်ဖိ တဂၤမၣ် တသ့ၣ်ညါနၢ်ပၢၢ် တၢ်လၢယဟိဝၤယွၤ ဆိကမိၣ်ဝဲဒီးမၤဝဲ ခဲလၢာ်ဘၣ်. (ၡါ ၅၅:၈, ၉) သနာ်က့ တၢ်လၢယဟိဝၤယွၤ ဒုးသ့ၣ်ညါပှၤန့ၣ် အမၤဂၢၢ်ကျၢၤဒိၣ်ထီၣ် ပတၢ်နာ်လၢ တၢ်လၢ ယဟိဝၤယွၤမၤဝဲ ဒီးတဲဆိပာ်စၢၤဝဲန့ၣ် အဘၣ်ထီဘိ.