E Bibila kitoma songanga vo Yave olenda sakula mambu mebwa kuna sentu. (Yes. 45:21) Bibila ke kisasilanga mawonso ko, nze mpila ye ntangwa kalenda sakula mambu. Muna kuma kiaki, ke tulendi zaya mawonso ko muna lendo kia Yave kia sakula mambu ma kusentu ye mpila kekangilanga o ntima kimana kalembi zaya mambu mebwa. Tala yaka e nona.

Yave olenda vanga mawonso kazolele, kansi ezak’e ntangwa, oyambulanga vanga mana kazolele. Muna ngangu zandi zakondwa tezo, Yave olenda sakula mambu mana kazolele vo mabwa kuna sentu. (Roma 11:33) Kansi, wau vo Yave osonganga volo mu mpila yalunga, olenda mpe kanga o ntima kimana kalembi zaya mambu mebwa.—Tezanesa dio yo Yesaya 42:14.

Yave oyambulanga vo luzolo lwandi lwavangama. Nga ediadi ngwizani dina ye lendo kiandi kia sakula mambu ma kusentu? E sono kia Yesaya 46:10 kisasilanga vo: “Tuka kuna lubantiku isamunanga e mbaninu, tuka kuna nz’ankulu isamunanga o mambu ke mavangamene ko. Mpovele vo: ‘E nzengo zame zisikila, ivanga konso dina nzolele.’”

Kimosi muna kuma ifilanga Yave mu sakula mambu ma kusentu i nkum’andi wa vanga mambu. Kuna kwa Yave ke dina mfunu ko mu vava zaya mambu mebwa kuna sentu, nze una oyeto tutangilanga o nkanda yakuna mfoko mu vava zaya mambu masoma mo. Kansi, Yave olenda baka e nzengo vo e diambu diavangama muna ntangwa yasikidiswa yo yambula vo diavangama avo e ntangwa yoyo ifwene.—Luv. 9:5, 6; Mat. 24:36; Mav. 17:31.

Muna kuma kiaki, e Bibila kisadilanga e mvovo emi, “yakubika dio,” “mvanga dio” ye “nkanini dio” muna yika maka mambu Yave kevanga kuna sentu. (2 Nti. 19:25; mvovo vana yand’a lukaya; Yes. 46:11) E mvovo miami mu mvovo umosi kaka miasekolwelwa muna nding’a sina. E mvovo wau una ye nsasa vo “nwumbi.” (Yer. 18:4) Nze una nwumbi ambote kalenda sadila ndambu a tûma muna wumba kinzu kiambote, Yave mpe olenda wumba yovo olenda soba mambu muna vanga o luzolo lwandi.—Efe. 1:11.

Yave ozitisanga o lukau lwa nswa wa kuyisolela. Yave kateka sikidisa ko mambu malenda bwila konso muntu muna zingu, ngatu fila akwa ntima miansongi mu vanga mambu malenda kubatwasila lufwasu. Yave oyambulanga vo wantu awonso basola nzila zau. Kansi okubalukisanga mpe kimana basola e nzila ina vo yambote.

Badika nona yole. E nona kiantete kia nkangu a Ninive. Yave wasakula vo e mbanz’a Ninive ifwaswa mu kuma kia bi wau. Kansi, vava nkangu a Ninive waviluka o ntima, Yave ‘wasoba ngindu zandi muna mbi ina kakana kubavanga, kavanga yo ko.’ (Yona 3:1-10) Wau vo esi Ninive basadila o nsw’au wa kuyisolela mu mpila yambote, isia vo, baviluka o ntima mu kuma kia nsangu za lufwasu zina Yave kabatwikila, o Yave wasoba e ngindu zandi muna mbi ina kakana kubavanga.

E nona kianzole i ungunza wavovela Kurese ona wavaikisa Ayuda muna kinkole yo kubavana nswa wa tungulula tempelo a Yave. (Yes. 44:26–45:4) Kurese wa ntinu a Parasa walungisa ungunza wau. (Eze. 1:1-4) Kansi, Kurese kakituka nsambidi a Nzambi aludi ko. Kana una vo Yave wasadila Kurese mu lungisa ungunza wau, kamfila ko mu soba nsw’andi wa sola o nzambi ona kafwana sambila.—Nga. 21:1.

Kieleka, eyayi i nona yakete kaka isonganga e lendo kia Yave kia sakula mambu ma kusentu. Dialudi vo, ke vena muntu ko olenda bakula emvimba e nzila za Yave. (Yes. 55:8, 9) Kansi, mana Yave kesengomonanga mekumikanga lukwikilu lweto vo ntangwa zawonso mambu mansongi kaka kevanganga, kumosi ye mambu ma kusentu kesakulanga.