Baibulo linofotokoza movweya pama ira Yehova unowanda ongelaatu vyausogolo. (Yes. 45:21) Komave kalinafotokoza vyongo vyetene vyokuza mwemo unapangela liye vyevi, thawi ineyo unasakula liye ira aiziwe vyongovyo kapena teto injiva wa vyongo vyevyo unasakulecha liye ira aviiziwe. Eno kaninaiziwa vyongo vyetene vyokuza liye vakhani inela. Komave, vikala vyongo vyoyeva vyevyo ninaiziwa iyo.

Yehova unokoza panga iliyetene ineyo unafuna liye koma thawi dimo-i unosakulecha ira kapange vyongo vimo-i. Voi ukaana zelu dookaana malile, unokoza ongelaatu iliyetene ineyo unafuna liye. (Arom. 11:33) Koma teto voi ngoviruni-a, unokoza sakula ira kaiziwe vyongo vyevyo vinaireye. — Erekezelani na Yesaya 42:14.

Yehova unopangi-a ira chifuniro yae iireye. Ndiye kodi vyevi vinanitandiza vwechecha n’ni vakhani yoi liye unowanda iziwelaatu vyongo vyausogolo? Lemba la Yesaya 46:10 linafotokoza ira: “Unga-alile thawi yolapa ndinoongelaatu vyongo vyevyo vinaze viireye, ndipo wale vinjinji ndoowongelaatu vyongo vyevyo vinaze viireye usogolo. ‘Miyo ndinaonga ira vyolinga vyanga vinoza viireye ndithu, ndipo ndinoza ndipange iliyetene ineyo ndinafuna miyo.’”

Eno chifukwa imo-i ineyo inamupangi-e Yehova ongelaatu vyausogolo choi ukaana kopolo yopangi-a ira vyongo vimo-iviwa viireye. Liye kali ngati muthu unoyo unaonela vidiyo, unoyo unaitamangi-a, ira aoneleetu vyongo vyevyo vili umapeto wa vidiyweyo, kalanga ngati vyongo vyevyo vinaze viireye usogolo vyooireya wale ndipo unakeda funa iziwelaatu vyevyo vinaireyevyo. M’malomwiwa, Yehova unokoza sakula ira yongo imo-iwene iireye vathawi imo-iwene era eno unokoza ipangi-a ira iireye thawiwa yafiya. — Ekis. 9:5, 6; Mat. 24:36; Vyo. 17:31.

Vachifukwa inela, Baibulo lino-indi-eda chito mawu oyi ‘koza’ vofotokoza vyevyo Yehova unapangecha liye vakhani yokuza vyongo vimo-i viwa vyausogolo. (2 Mam. 19:25; Yes. 46:11) Mawu anala kamasuleliwe kumela wu mawu aiongelo yowambeela anayo kanagwilizana na tantauzo la mawu oyi ‘oomba yombwe.’ (Yer. 18:4) Mofwanafwana na muthu oomba yombwe waluso unoyo una-indi-eda chito ulongo ira aombe yombwe yoriya, naliyene teto Yehova unokoza panga, kapena chenja vyongo, ira akwakwaneli-ede chifuniro yae. — Aife. 1:11.

Yehova unololecha ira athu kasakulenga ekiwa vyevyo kanafunaathu. Liye kanakozelaatu vyongo vyevyo vinaze viireye vamoyo wa muthu uliwetene, koma teto kanapangi-a ira athu apama kapangenga vyongo vyoi vamapeto viwa vinoza viaonongi-e. Liye unolola ira muthu uliwetene asakulenga eka vyevyo unafuna liye panga, koma unolimbikisa athu ira kasakulenga vyongo vyofwanelela.

Tiyemoni nikambirane visazo viin’li. Isazo yowambeela chokuza athu awu Nineve. Yehova ali angaongile wale ira mzindoyo unoza uonongiwe chifukwa athu koopanga vyongo vyotakala. Koma athu a mu mzindoyo kangalapile, Yehova ‘oochenja maganizwae ndipo kaazi-ede, soka lelo aongile liye ira unoazi-eda.’ (Yona 3:1-10) Yehova oochenja maganizwae va vyevyo aongile liye wale chifukwa athu awu Nineve koo-indi-eda chito ufulwiwa osakula volapa kangavwile uthenga ochenjeza okumela wa Yehova.

Isazo yanambili nguulosi okuza Koresi unoyo amasulile Ayuda uukapolo, nowalamula ira kadowe kamange nawili kachisi wa Yehova. (Yes. 44:26-45:4) Mwene Koresi wau Perisiya ookwakwaneli-eda ulosi unola. (Ezara 1:1-4) Koma Koresi, kaalambela Mulungu oona. Yehova oomu-indi-eda chito Koresi vokwakwaneli-eda ulosi unola koma oomulola indi-eda chito ufulwae osakula unoyo unafuna liye mulambela. — Miya. 21:1.

Anala mba makundo oyeva oka, anayo Yehova unaaganizelecha liye afuna ongelaatu vyongo vyevyo vinaze viireye usogolo. Komave onga vyoona, kavali muthu unoyo unavwecheche vyongo vyetene vyokuza mwemo Yehova unairela liye vyongo. (Yes. 55:8, 9) Komave, vyevyo ninaiziwa iyo vyokuza Yehova vinonitandiza ira niroromelenga vinjinji ira liye thawi detene unopanga vyofwanelela, patikizavo khani yoongelaatu vyevyo vinaze viireye usogolo.