Ibayibolo likunena pabuzelu ukuti u Yehova akumanya ivyamuntazi. (Yesa. 45.21) Loli litakulongosola ivyinji ivya kabalilo na mo akumanyila pamo ubwinji ubwa vintu vyo akusala ukuti avimanye. Po tutangamanya vyosi ivyakukwafannya na maka agha Yehova aghakumanya ivya muntazi. Loli pali vintu vinandi bulo vyo tuvimenye.

U Yehova angabomba chilichosi cho akulonda, loli akabalilo kamo akusala ukuti atakabombe ivintu vimo. U Yehova angabombezya amaka ghache aghambula impaka ukuti anene chilichosi cho asala ukuti inti chibombiwe. (Loma 11.33) Loli ichifukwa chakuti wakwilema, angasala sona ukuti atakamanyile zila vyo inti vyize vibombiwe.

U Yehova akupangisya ukuti ubwighane bwache bubombiwe. Ka ifundo iyi yikutwavwa buli-buli ukwivwiska amaka gho ali nagho aghakumanyila zila ivyamuntazi? Pa Yesaya 46.10 pakulongosola ukuti: ‘Nkunenela zila vyo inti vyize vibombiwe, ukwanda pabwandilo sona ukwanda kale nkani nkunenela zila ivintu vyo vichili vitabombiwe. Nkunena ukuti, ‘Ichintu cho nasala chikwiza pakubombiwa sona inkwiza pakubomba chilichose cho nkuhoboka nacho.’’

Ichifukwa choka cho u Yehova anganenela zila ivyamuntazi, chakuti ali na maka aghakupagisya ukuti ivintu vibombiwe. U Yehova atakulonda ukuti amanyile zila vyo vikwiza pakubombiwa muntazi ngati mo tungabombela pakwenelezya ifilimu kubumalilo ukuti tumanye mo inkani yosi yikamalila. Mumalo mwache u Yehova angasala akabalilo ko akulonda ukuti ichintu chimo chize chibombiwe sona angapangisya ukuti ichintu icho chibombiwe nanti akakabalilo ko akasala kakwana.—Kuso. 9.5, 6; Mata. 24.36; Imbo. 17.31.

Cho chifukwa Ibayibolo likubombezya amazyu ghamo ngati aghakuti “ukwisengannya,” “ukupangisya,” sona “ubwighane” ukuti lilongosole vyo u Yehova akubomba ivyakukwafannya ni vintu vyo vikwiza pakubombiwa muntazi. (2 Nyafya. 19.25; Yesa. 46:11) Amazyu agha ghamasuliliwe ukufuma ku mazyu aghachinenelo ichenecho gho ghayanite na mazyu gho ghakung’anamula ‘ukumata.’ (Yere. 18.4) Ngati mo umuntu yo ali nu luso pakumata ivintu angamatila itope ukuti libe isonta iyakuhobosya, umwakuyana bulo u Yehova wepe angapanga nu kubombezya chilichosi ukuti akwanilisye ubwighane bwache.—Efe. 1.11.

U Yehova akwitikizya ukuti abantu basalaghe bene ivintu vyo bakulonda. U Yehova atasimbiye zila ivintu vyo vikwiza pakubombiwa pa bumi ubwa muntu aliwesi, pamo ukupangisya ukuti abantu bo bali nu moyo uwiza babombe ichintu chimo cho chingapangisya ukuti bakomane ni ntamyo. Akwitikizya umuntu aliwesi ukusala weka mo angikalila loli akumumanyisya mo angabombela ukuti ikalaghe akiza.

Inong’onela ivifwanikizyo vibili ivi. Ichabwandilo chikunena ivya bantu aba ku Ninive. U Yehova akanenela zila ukuti itayuni yabo yikwiza pakumongoliwa ichifukwa cha vintu ivibibi vyo bakabombagha. Loli abantu bakati basinta, u Yehova ‘akinong’onelapo pa vyo akalondagha ukubomba, po akasinta inyinong’ono umwakuti atakabomba vyo akinong’onogha.’ (Yona 3.1-10) U Yehova akasinta inyinong’ono zyache pa vyo akanenela zila ukuti inti ababombele, ichifukwa chakuti abantu aba ku Ninive bakabombezya akiza ubwabuke bwabo ubwakusala umwakulapa imbibi zyabo bakati bivwa ukusoka.

Ichabubili bulaghuzi bo bukunena ivya uwakupota pa nkondo yumo izina lyache u Sayilasi, yo akabasatula Abayuda kubuzya sona akalamula ukuti itempeli ilya Yehova lizengiwe sona. (Yesa. 44.26–45.4) Umwene u Sayilasi uwa ku Pelesiya akakwanilisya ubulaghuzi ubu. (Ezra 1.1-4) Loli u Sayilasi atakiputagha u Chala uwabwanaloli. U Yehova akamubombezya u Sayilasi ukuti akwanilisye ubulaghuzi ubu, loli akamwitikizya ukuti asale weka u Chala yo angamwiputagha.—Mbupi. 21.1.

Ivi vintu vidono bulo vyo twennya vyo u Yehova akabombezya pakunenela zila ivyamuntazi. Ubwanaloli bwakuti patalipo nayumo umuntu yo angazivwisya izila zyosi izya Yehova. Loli vyo tukumanya vikughomya ulusubilo lwitu ulwakuti akabalilo kosi u Yehova akubomba ivintu umwabugholosu ukongelezyapo nanti akunenela zila ivya muntazi.