Biblia ridho pʉlʉpʉlʉ nari kʉ, Yova dho ri ka ndi kaka ndi d’ra gosi njini ná lo. (Isa. 45:21) Føri na mana nga kʉ ke ka ndi tu rere kʉ ná lo nga ma krʉ ngbaribbai ma inga ngbá saa na ma ndi adi rinji fø inga ngbá ngatsi ma ndi vʉri ndi churi nari djo ri. Føri dho ko nzá ka ko chu krʉ kʉ ná lo ro Yova kʉ uwezo na ndi d’ra gosi ná saa djo ná lo krʉ djo ri. Ro, ko chu ná lo ro i kʉ thé.

Yova ka ndi njí ndi ji ná lo krʉ, ro nja saa na ke ka ndi vʉri nzɨ ndi njí nja kʉ ná lo. Kedhó nzá tso ka ndi d’ø ná nyodyu na, ke ka ndi d’ra ndi vʉ ndi njí ná lo krʉ nzá ri d’e njini nari njí. (Ro. 11:33) Ndirigoti ke adi ndi ronga tso cho kaka nari bbai nari dho, ke ka ndi vʉri nzɨ ndi chu gosi ná saa na si nji ná nja lo.​—Anja Isaya 42:14.

Yova adi rili ndi ji ná lo njini njí. Føri ká ko tsotso kó ngbaribbai ko famu Yova kʉ uwezo na ndi d’ra gosi ná saa djo si njini ná lo nari? Isaya 46:10 rid’ra: “Lo tso ngani ná nga djó ro, ma d’ra ri nǎ ro sisi ná lo, drrdrr nga djó ro, ma d’ra nzá d’e njini ná ritsi. Ma pori, ‘Ma vʉ nanga ná lo si tøni kprɨ, ndirigoti ma nyǒ tho ná lo krʉ ma si njinji.’”

Føri dho, Yova ka ndi d’ra gosi ná saa na si njini ná lo dho ná ddikpa lo kʉ ke kʉ kpakpanga na ndi liri ritsi njini njí. Ke nga kʉ lazima na ndi di gosi ná saa na ká ngbá lo ma si njini nari ne ndi chu, ko adi rine ko nja filme dzá ya mwisho sehemu ndiro ko chu ri nǎ lo tso ká dyani ngbaribbai ma nari bbai ri. Føri rɨngana, Yova ka ndi vʉri nja ritsi njini pekee kʉ ná saa na ndirigoti ndi liri ri njini ndidhi saa nganga na.​—Kut. 9:5, 6; Mt. 24:36; Mdo. 17:31.

Føri dzá lo dho, Biblia njinjí i lo na “kpengʉeni,” “thɨngʉeni,” ndirigoti “pɨngʉeni” ndiri na le dhǒ Yova adi ndi thí li gosi ná saa na si njini ná nja lo djo nì nari d’e. (2 Fa. 19:25; maelezo ya chini; Isa. 46:11) Fø lo nanga le tu Biblia le ndingʉe nǎ ná ya kwanza ná luga nǎ nari na mana kʉ, “cha rø ná ke.” (Yer. 18:4) Ddiddi bblo chu cha rødha ná ke ka ndi njínji nz’ na ndiro ndi thɨ bblo d’ani ná no nari bbai, Yova ka ndi le njinjini ná ritsi thika ndiri na ndi njí ndi ji ná lo d’e.​—Efe. 1:11.

Yova adi ribba ndrŭ vʉ lonanga ndima dho ndima ro. Ke nzɨ adi lo ro kpekpe ndrŭ krʉ nji ri inga ke nzɨ adi bblo kʉ ná ndrŭ cho ndima njí sadha ndima ka ndima ba dho ná lo ri. Ke adi ribba ndrŭ krʉ vʉ lonanga ndima dho ndima ro, ndirigoti ke riji ndrŭ krʉ vʉ lonanga bblo ndima dho.

Anja aro kʉ ná loroji. Ddikpa ri kʉ Ninawi nǎ ndrŭ dhó loroji. Yova pongʉeri fø bba si sadha ba dhonalo ri nǎ chelo ngʉe bbo. Fø bbagʉ ndrŭ lengʉeni ná saa na, Yova “lengʉe kpa djo ndi ngʉ pɨ ná kpakpalo thika le ndirigoti kpa nzá bangʉe sadha ri.” (Yoh. 3:1-10) Yova lengʉe ndidhó ngaddidha thika le Ninawi nǎ ndrŭ djo dhonalo ndrŭ vʉngʉeri ndima leni le b’lo ndima rr Yova d’rangʉe ná lo nari goti.

Ya pili loroji kʉ Koreshi djo le d’rangʉe ndirigoti hekalu ki le si chi vi nari djo le d’rangʉe ná unabi. (Isa. 44:26–45:4) Perse nǎ Pi Koreshi chulu fø unabi njingʉeni nji. (Ezr. 1:1-4) Nì mai ri kʉ fø ro, Koreshi nzɨ ngʉ adi bbʉbbʉ Mungu má ri. Yova njingʉe nji Koreshi na ndi njí fø unabi d’e, ro ke nzá chongʉe Koreshi ro kpakpanga na ndi bbʉ madha ndi dho d’e ri.​—Mez. 21:1.

Bbʉbbʉ dhé, føri kʉ Yova adi njínji na ná sese loroji ro dhé gosi ná saa djo ndi lod’ra nari kana. Føri dho ddikpa le ma nzá ddi ka ndi famu Yova lo nji ná chu ro krʉ ri. (Isa. 55:8, 9) Føri dzá Yova djo ko chu ná lo adi kodhó udha li kpakpa nari kʉ, ke adi lo nji bblo kʉ ná chulu dhé, rie gosi ná saa djo si njini ná lo ma ke d’ra ri ró.