Baibo ilaamba cakuteenda mweela ayi Yehova inga washiba sheshi shikacitike kunembo. (Isa. 45:21) Tayaambi makani oonse mbwaacita boobo na ciindi ndyaacita boobo. Alimwi tayaambi akufula kwa shintu nsheenga wasuna kushibila limwi. Aboobo tatucishi shoonse pankusu Yehova nshaacite shakushiba sheshi shikacitike kunembo. Sombi kuli shintu shimwi shiniini nshotucishi.

Yehova inga wacita cintu cili coonse ncaasuni, sombi cimwi ciindi alasalawo kutacita shintu shimwi. Yehova alicite busongo bwiinditeewo, aboobo inga wasalawo kushiba cili coonse ceshi cikacitike kunembo. (Loma. 11:33) Sombi ceebo cakwaamba ayi aliinditeewo kutondesha mubo wa kulikasha, inga wasalawo kutashibila limwi sheshi shikacitike.—Amweelanye a Isaya 42:14.

Yehova alapa kwaamba ayi kuyanda kwakwe kukumanishikwe. Ino ici cilatucafwa buyani kunyumfwishisha nkusu nshaacite shakushibila limwi sheshi shikacitike kunembo? Isaya 46:10 ilaamba ayi: “Kuswa kumatalikilo ndakaambila limwi sheshi shikacitike. Ee, ndakashaambila limwi kashitana kucitika. Nebo ndakaamba ayi miyeeyo yangu teshi ikeelewo munshila alimwi ayi ndaakucita shintu shoonse nshendapinga kucita.”

Aboobo ceebo comwi cipa kwaamba ayi Yehova ashibile limwi sheshi shikacite kunembo ncakwaamba ayi alicite nkusu shakulengesha ayi shintu shicitike. Yehova tayandiki kushiba sheshi shikacitike kunembo mbuli mbotucita na tutokweebela filimu kwiinda mukwiisotosha kwaamba ayi tushibe shakacitika mukweelaako. Muciindi cakucita boobo, Yehova inga wasalawo ayi cintu cimwi cikacitike paciindi cimwi lyalo akupa kwaamba ayi cicitike na ciindi ico cashika.—Kulo. 9:​5, 6; Mate. 24:36; Milimo 17:31.

Nceceeco Baibo ilasebensesha maswi mbuli “ndakacibamba” alimwi a “ndakapanga,” kusansulula Yehova nshaacita pashintu shimwi sheshi shikacitike kunembo. (2 Baam. 19:25; Isa. 46:11) Maswi aya alasansululwa kuswa kuliswi lyamu ciEbulu likoshenye aliswi lisansulula ayi “mubumbi.” (Jele. 18:4) Bweenka mubumbi ucishi kabotu mbweenga wabumba cintu cimwi cibotu, Yehova alakwe inga wabumba na kwaalula shintu kwaamba ayi akumanishe kuyanda kwakwe.—Efe. 1:11.

Yehova alasuminisha bantu kulisalila shakucita. Taashibili limwi sheshi shikacitike mubuumi bwa muntu womwi awomwi. Alimwi taapi kwaamba ayi bantu bali kabotu bacite cintu ceenga capa kwaamba ayi bakanyonyoolwe. Alasuminisha bantu boonse kulisalila nshobasuni kucita, alimwi alabayuminisha kusalawo kucita shintu shili kabotu.

Amuyeeye pashakubonenaako shobilo ishi. Cakubonenaako cakutaanguna cilaamba pabantu bakalinga kukala mu Ninife. Yehova wakaamba ayi ndabala iyi yakalinga kusa mukunyonyoolwa ceebo ca shibiibi bantu nshobakalinga kucita. Sombi bantu bamundabala iyi ndyebakaana, Yehova ‘taakwe kubanyonyoola kweelana ambwaakalinga waamba.’ (Jona 3:​1-10) Yehova wakacita boobo mukwiinga bene Ninife bakasalawo kwaaluka ndyebakanyumfwa kucenjesha kwakwe.

Cakubonenaako cabili mbushinshimi bwaamba pali Sailasi uyo wakalinga kusa mukukoma ndabala ya Babiloni, kwaangulula baJuda kuswa mubusha akupa mulawo wakwaamba ayi tempele yakwe Yehova iyakwe cipya. (Isa. 44:26–45:4) Mwaami Sailasi waku Pesha wakakumanisha bushinshimi ubu. (Esila 1:​1-4) Nacibi boobo, Sailasi taakalinga kulambila Lesa wancine. Yehova wakasebensesha Sailasi kukumanisha bushinshimi ubu, sombi taakwe kumukakatisha kwaamba ayi anoomulambila.—Tus. 21:1.

Kwalo ishi nshintu shiniinibo Yehova nshayeeyawo ndyatosalawo sheshi shikacitike kunembo. Cancine ncakwaamba ayi taakuwo muntu weenga wanyumfwishisha kabotu Yehova mbwayeeya ambwaacita shintu. (Isa. 55:​8, 9) Sombi nshotucishi pali Yehova shilayumya lushomo lwesu lwakwaamba ayi lyoonse alacita shintu shiluleme—kwiilikaawo a na wasalawo kushiba sheshi shikacitike kunembo.