Yaˬhoˉvaˬ awˬ gʼuˇ suhˍ hpawˇ ve htaꞈ shiˍ gʼa ve tehꞈ Liꞈ hpu hkʼaw hkʼa tawˍ lehˆ kʼoˆ laˇ taˍ ve yoˬ. (Iˉsaˍyaˆ 45:21) Yaꞈ hkʼaˇ, yawˇ hkʼaˬ hkʼe te ve, hkʼaˬ htaˆ te ve, leh awˬ gʼuˇ suhˍ hpawˇ ve htaꞈ hkʼaˬ hkʼe taw shiˍ gʼa ve, Liꞈ hpu hkʼaw hkʼa tawˍ lehˆ maˇ gʼa kʼoˆ laˇ taˍ. Chi htaꞈ pa taw, awˬ lawn chi ve htaꞈ ngaˬ hui hkʼa peu˗eˬ maˇ shiˍ gʼa. Yaꞈ hkʼaˇ, Liꞈ hpu hkʼaw ngaˬ hui shiˍ gʼa tuˬ teˇ ceuˬ ceuˬ kʼoˆ maˍ laˇ taˍ ve yoˬ.

Yaˬhoˉvaˬ yawˇ loˍ ve htaꞈ teˇ ceuˬ le le te gʼa ve. Yaꞈ hkʼaˇ, teˇ pawˆ pawˆ kʼo teˇ ceuˬ ceuˬ htaꞈ maˇ te tuˬ yawˇ leuˆ yuˬ ve yoˬ. Yaˬhoˉvaˬ cuˇ yiˍ cawˬ jaˇ ve pa taw, yawˇ te gaˇ ve kʼo awˬ gʼuˇ suhˍ hpawˇ ve teˇ ceuˬ le le htaꞈ kaꞈ shiˍ gʼa ve yoˬ. (Roˉmaꞈ 11:33) Yaꞈ hkʼaˇ, Yaˬhoˉvaˬ yawˇ awˬ to htaꞈ hkʼa dehꞈ yuˬ tiˍ gʼa ve pa taw, awˬ gʼuˇ suhˍ hpawˇ ve teˇ ceuˬ ceuˬ maˇ shiˍ tuˬ leuˆ yuˬ ve yoˬ.—Iˉsaˍyaˆ liꞈ 42:14 htaꞈ tehˆ daꞈ sheˍ.

Yaˬhoˉvaˬ yawˇ loˍ ve awˬ ceuˬ htaꞈ awˬ tehˬ te gʼa ve. Awˬ lawn chi ve Yaˬhoˉvaˬ awˬ gʼuˇ suhˍ hpawˇ ve htaꞈ shiˍ gʼa ve hkʼaˬ hkʼe te caˉ daꞈ ve le? Iˉsaˍyaˆ liꞈ 46:10 hkʼaw kʼoˆ ve, “awˬ hkuiˉ puiˍ htaˇ kaꞈ hkʼaˬ hkʼe hpehꞈ la tuˬ ve awˬ lawn teˇ hpaˍ, ngaˬ kʼoˆ taˍ peuˬ ve yoˬ. Ngaˬ gu taˍ ve kanˉ hkʼaˇ teˇ hpaˍ lehˬ, luˬ kʼai tuˬ ve maˇ heˆ. Ngaˬ te tuˬ dawˇ taˍ ve kanˉ teˇ hpaˍ htaꞈ ngaˬ te tuˬ yoˬ.”

Yaˬhoˉvaˬ awˬ gʼuˇ suhˍ hpawˇ ve htaꞈ caˉ daꞈ ve kʼoˆ gʼa ve teˇ ceuˬ lehˬ, yawˇ kanˇ paˆ cawˬ jaˇ leh teˇ ceuˬ le le htaꞈ awˬ tehˬ te gʼa ve yoˬ. Awˬ gʼuˇ suhˍ hpawˇ aˬ htoꞈ ma hpehꞈ la tuˬ ve htaꞈ yawˇ chaˬ nyi tuˬ maˇ loˍ. Chi ve hkʼa shuˍ shuˍ, awˬ gʼuˇ suhˍ hpawˇ hpehꞈ la tuˬ ve awˬ ceuˬ cawˬ˗oˬ leh aˬ htoꞈ ma hpehꞈ la tuˬ ve htaꞈ ceh yawˇ law nyi taˍ ve yoˬ. Yaꞈ hkʼaˇ, awˬ tehˬ kʼo Yaˬhoˉvaˬ yawˇ tinˍ taˍ ve awˬ yanˇ gaˬ kʼo teˇ ceuˬ ceuˬ htaꞈ te tuˬ dawˇ cheˆ gʼa ve yoˬ. Awˬ yanˇ oˇ ve gaˬ kʼo, yawˇ awˬ ceuˬ chi hpaˍ htaꞈ awˬ tehˬ te tuˬ yoˬ.—Tawˆ kʼai ve 9:5, 6; Maꞈhtehˍ 24:36; Tcuh yaˇ 17:31.

Chi htaꞈ pa taw Liꞈ hpu hkʼaw kʼoˆ ve, “awˬ hkʼaˇ gu taˍ ve” leh “kʼoˆ taˍ ve hkʼe te biˇ tuˬ yoˬ.” Chi Yaˬhoˉvaˬ awˬ gʼuˇ suhˍ hpawˇ te tuˬ ve awˬ ceuˬ htaꞈ kʼoˆ gaˇ ve yoˬ. (2 Jawˇmawˇ 19:25; Iˉsaˍyaˆ 46:11) Heˍbrehˇ tawˇ hkawˇ chi ve htaꞈ caˉ daꞈ ve tcuhˉ kuiˬ lehˬ, “muꞈ hkʼu te paˍ” htaꞈ kʼoˆ gaˇ ve yoˬ. (Yeˍraˍmiˆ 18:4) Jeꞈ muꞈ hkʼu te paˍ cheuˬ jaˇ leh jeꞈ neˉ ve htaꞈ yehˇ leh daꞈ jaˇ ve suhˉ veˆ kawˆ te gʼa ve hkʼa shuˍ, Yaˬhoˉvaˬ kaꞈ yawˇ loˍ ve hkʼe teˇ ceuˬ le le htaꞈ te gʼa ve yoˬ.—Eˇfeˇsuꞈ 1:11.

Yaˬhoˉvaˬ lehˬ chaw yaˇ a shu yawˇ hkʼaˇ yawˇ dawˇ cheˆ tcuh laˇ ve. Yaˬhoˉvaˬ lehˬ chaw yaˇ teˇ gʼaˇ leh teˇ gʼaˇ hkʼaˬ hkʼe hpehꞈ tuˬ maˇ gʼa dawˇ cheˆ laˇ taˍ. Leh daꞈ ve chaw teˇ ceuˬ ceuˬ htaꞈ te leh haiˬ ve awˬ ceuˬ gʼa hpuˇ tuˬ kaꞈ yawˇ maˇ dawˇ cheˆ piˇ taˍ. Gʼuiˬ sha lehˬ a shu yawˇ hkʼaˇ yawˇ a shaꞈ teꞈ kuiˬ hkʼaw hkʼaˬ hkʼe te tuˬ leuˆ yuˬ tcuh laˇ ve yoˬ. Chaw yaˇ chi hkʼe te tuˬ Yaˬhoˉvaˬ leuˆ yuˬ tcuh laˇ ve htawˇ, yawˇ yawˇ hui htaꞈ cawˇ ve awˬ ceuˬ te tuˬ maˍ piˇ ve yoˬ.

Nyiˇ lawn htaꞈ teˇ geh nyi sheˍ. Awˉ lawˉ teˇ lawn lehˬ, Niˇnaˍveˍ chaw hpehꞈ ve yoˬ. Yaˬhoˉvaˬ awˬ gʼuˇ suhˍ htaˇ kaꞈ kʼoˆ piˇ taˍ ve, venˇ chi ve hkʼaw chaw yaˇ haiˬ jaˇ ve pa taw te luˬ tuˬ yoˬ. Yaꞈ hkʼaˇ, yawˇ hui venˇ baˆ dawˇ hpfuhˆ ve kʼo, Yaˬhoˉvaˬ ve “nyi ma kʼawꞈ pa leh yawˇ kʼoˆ taˍ ve hkʼe yawˇ hui htaꞈ maˇ kʼawꞈ ciˍ yanˍ piˇ ve yoˬ.” (Yoˇnaˆ 3:1-10) Yaˬhoˉvaˬ awˬ gʼuˇ suhˍ htaˇ kʼoˆ taˍ ve hkʼe, Niˇnaˍveˍ chaw htaꞈ yawˇ nyi ma pa leh maˇ kʼawꞈ ciˍ yanˍ piˇ. Yaˬhoˉvaˬ geh laˬ ve shaˍ tiꞈ piˇ ve htaꞈ yawˇ hui na yuˬ ve pa taw, venˇ baˆ dawˇ hpfuhˆ ve yoˬ.

Nyiˇ lawn teˇ lawn lehˬ, jawˇ mawˇ Kuˇruˆ htaꞈ caˉ daꞈ ve tcuh kaˍ paˍ tawˇ hkawˇ kʼoˆ taˍ ve yoˬ. Yuˇdaꞈ chaw Baˍbuˍlonˍ mvuhˇ miˬ lo shu ceˬ te chehˇ ve htaꞈ yawˇ hpehˇ piˇ leh yawˇ hui Yaˬhoˉvaˬ ve bon yehˬ awˬ suhˉ kʼawꞈ te tuˬ tawˇ piˇ ve yoˬ. (Iˉsaˍyaˆ 44:26–45:4) Paˇshaˇ ve jawˇ mawˇ Kuˇruˆ chi tcuh kaˍ paˍ ve tawˇ hkawˇ awˬ tehˬ hpehꞈ la tuˬ te ve yoˬ. (Eˇzaˍraˆ 1:1-4) Yaꞈ hkʼaˇ, chi hkʼe hpehꞈ ve htawˇ, Kuˇruˆ awˬ tehˬ ve Gʼuiˬ sha htaꞈ oˉ kʼoˍ maˇ pui. Yaˬhoˉvaˬ jawˇ mawˇ Kuˇruˆ htaꞈ cuˇ leh tcuh kaˍ paˍ ve tawˇ hkawˇ awˬ tehˬ hpehꞈ la tuˬ te ve yoˬ. Yaꞈ hkʼaˇ, Yaˬhoˉvaˬ lehˬ Kuˇruˆ htaꞈ gʼuiˬ sha hkʼaˬ ve teˇ gʼaˇ htaꞈ oˉ kʼoˍ pui tuˬ leuˆ yuˬ tcuh ve yoˬ.—Tawˇ naˉ ve 21:1.

Yaˬhoˉvaˬ awˬ gʼuˇ suhˍ hpawˇ ve htaꞈ shiˍ gʼa ve puiˉ ve hpehꞈ ve htaꞈ caˉ daꞈ ve, chi ve lehˬ Liꞈ hpu hkʼaw kʼoˆ laˇ taˍ ve teˇ ceuˬ ceuˬ ceh hpehꞈ sheˍ ve yoˬ. Awˬ tehˬ kʼo, chaw yaˇ lehˬ Yaˬhoˉvaˬ ve te hkʼaˇ dawˇ hkʼaˇ hkʼa peu˗eˬ htaꞈ shiˍ maˇ gʼa. (Iˉsaˍyaˆ 55:8, 9) Yaꞈ hkʼaˇ, Yaˬhoˉvaˬ teˇ ceuˬ le le htaꞈ cawˇ ve hkʼaw te gʼa ve tehꞈ, Liꞈ hpu hkʼaw hpeuꞈ maw laˇ ve ngaˬ hui yonˍ gʼa tuˬ te laˇ ve yoˬ. Chi ve lehˬ awˬ gʼuˇ suhˍ hpawˇ ve awˬ lawn htaꞈ kaꞈ caˉ daꞈ ve yoˬ.