Bible ulombola patōka’mba Yehova ubwanya kulaya bintu bya kumeso. (Isa. 45:21) Bible kalombolapo kanda ne kanda pa muswelo nansha kitatyi kyaingidijanga buno bukomo bwandi, nansha buvule bwa myanda yatoñanga kuyuka pa bintu bya kumeso. Nanshi ketuyukilepo myanda yonso pa bukomo bwa Leza bwa kulaya bintu bya kumeso. Nansha nankyo, tubandaulei’ko myanda mityetye yotuyukile.

Yehova kadipo na mikalo, poso yoya yatonga kwitūdila aye mwine. Byadi na tunangu twampikwa mfulo, ubwanya kulaya kintu kyo-kyonso kyasaka kulaya. (Loma 11:33) Inoko byadi na kwīfula kubwaninine, ubwanya ne kutonga kuleka kuyuka bintu bikalongeka.—Dingakanya na Isaya 42:14.

Yehova ulengejanga kiswa-mutyima kyandi kilongeke. Le kino kikwatañene namani na bukomo bwandi bwa kulaya bintu bya kumeso? Isaya 46:10 ushintulula’mba: “Tamba ku ngalwilo, ndayanga bintu bikafika, ne tamba kala, bintu kebyalongekele. Nenanga’mba, ‘Butyibi bwami bukafikidila, kadi nkalonga kyonso kyonsaka.’”

Nanshi bubinga bumo bulengeja Yehova abwanye kulaya bintu bya kumeso i mwanda udi na bukomo bwa kulengeja bintu bilongeke. Kasakilwapo kwipangila kukimba kuyuka bya kumeso, ko kunena’mba, kutala bikalongeka mu mafuku a kumeso—pamo bwa binkumenkume byonso bya kumeso ke bilongeke kala mu muswelo kampanda, ebiya Yehova kaebitale’tu kumeso kwa kitatyi. Inoko, Yehova ubwanya kukwata butyibi amba kintu kampanda kilongeke pa kitayi kabidye, kupwa wekilengeja kilongeke shi kitatyi’kya kibabwana.—Div. 9:​5, 6; Mat. 24:36; Bil. 17:31.

O mwanda Bible wingidija bishima pamo bwa “nateakenye’kyo,” “nalongele’kyo,” ne “natunga’kyo” mwanda wa kulombola bintu bilonga Yehova pa binkumenkume bimo bya mu mafuku a kumeso. (2 Ba. 19:25; kunshi kwa dyani; Isa. 46:11) Bino bishima i byalamunwe ku kishima kya mu ludimi lubajinjibajinji kikwatañene na kishima kishintulula “umbumbi.” (Yel. 18:4) Pamo’nka bwa umbumbi wa bwino mwabwaninya kulupula ku dilongo kipungwa kilumbuluke, ye mubwaninya ne Yehova nandi kupunga nansha kulengeja bintu bifikidije kiswa-mutyima kyandi.—Ef. 1:11.

Yehova ulēmekele kyabuntu kya kwitongela. Katungīlepo muntu ne muntu bintu bikamufikila mu būmi; kadi kalengejangapo bantu ba mityima miyampe balonge bintu bikebafikija ku konakanibwa. I muleke bantu bonso betongele mwiendelejo obasaka, inoko wibakankamika batonge mwiendelejo muyampe.

Tubandaulei’ko bimfwa bibidi. Kibajinji i kya bekadi ba mu Nineva. Yehova wālaile amba kino kibundi kikonakanibwa pa mwanda wa bubi bwabo. Inoko pēsāshile bekadi ba mu kino kibundi, Yehova “washinta milangwe pa kyamalwa kyawanenene kwibaletela, waleka kwikileta.” (Yona 3:​1-10) Yehova wāshintyile milangwe yandi pa bintu byaālaile mwanda bene Nineva bāingidije bwanapabo bwabo bwa kwitongela, na kwisāsa pobāivwene musapu wa kidyumu wēbatumīne Yehova.

Kimfwa kya bubidi, i bupolofeto butala mushindañani witwa bu Kilusa, wādi wa kulekelela Bayuda mu bumisungi ne kwibasoñanya bakōbakulule tempelo ya Yehova. (Isa. 44:26–45:4) Mulopwe Kilusa wa Peleshia wāfikidije buno bupolofeto. (Eza. 1:​1-4) Inoko Kilusa kādipo utōta Leza wa bine. Yehova wāingidije Kilusa afikidije bupolofeto pampikwa kumutwelela mu bwanapabo bwandi bwa kwitongela, na kumuningila amutōte.—Nki. 21:1.

Shako, bino i bintu’tu bityetye kete bitanga’ko Yehova mutyima kitatyi kyalaya bintu bya kumeso. Ino na bubine, i kutupu muntu nansha umo ubwanya kwivwanija ne pa mfulo milangwe ya Yehova. (Isa. 55:​8, 9) Inoko byobya bitusokwedile Yehova biningijanga lwitabijo lwetu lwa amba, aye uloñanga nyeke byobya byoloke—enka ne palaya bintu bya mu mafuku a kumeso