Bayibolu yahosha hatooka nawu Yehova nateli kushimuna yuma yikamwekana kumbidi. (Isa. 45:21) Hiyashimuna jiika chelañayi hela mpinji yelañayi mwenimu indi kwiji yuma yafuukulañayi kwilukaku. Dichi hitukutwesha kwiluka yuma yejima haniyi nsañuku. Hela chochu, talenu iyi yuma yantesha yinateli kutukwasha.

Kwosi yuma yinateli kukañanya kwilayi Yehova, chiña hohu neyi natondihu kubula kuyila. Nateli kuzatisha maana indi abadika kushimwina chadimu yuma yejima yinakeñiyi. (Rom. 11:33) Chineli wadiyuulaña chikupu, nateli cheñi kutondahu kubula kwiluka yuma yikamwekana kumbidi.​—Esekejenu Isaya 42:⁠14.

Yehova wakojejaña nkeñelu yindi kushikijewa. Chumichi chatukwashaña ñahi kwiluka wuswa wukwetiyi wakushimuna yuma yikamwekana kumbidi? Isaya 46:10 yalumbulula nawu: “Kufuma tuhu kutachi nashimunaña yuma yikamwekana kumbidi, nawa kufuma kumashiita nashimunaña yuma yichidi kanda ayili. Nahoshaña nami, ‘Yuma yinnafuukuli yakashikijewa, nawa nukwila chejima chinnakeñi.’”

Dichi chuma chimu chinateli kuletesha Yehova ashimuni yuma yikamwekana kumbidi chidi chakwila nawu wukweti ñovu yakukojeja yuma kumwekana. Yehova wakeñekaña wanyi kwilukila chadimu yuma yikamwekana kumbidi neyi chitwelaña mpinji jikwawu neyi tunakukeña kutala filimu. Twayaña ntahi nakutala kunakumini filimu kulonda twilukili chadimu yuma yikumwekana. Ilaña, Yehova nateli kufuukula nindi chuma chimwekani hampinji yinatoñoliyi nikuchikojeja kumwekana hayoyenoyu mpinji.​—Kwid. 9:​5, 6; Mat. 24:36; Yilw. 17:⁠31.

Muloña wachumichi, Bayibolu yazatisha mazu adi neyi ‘kuloñesha,’ “kukasa,” ‘nikufuukula’ hakulumbulula chuma chelañayi Yehova kutalisha hayuma yimu yakumbidi yichidi kanda yimwekani. (2 Anya. 19:25; tth.; Isa. 46:11) Awa mazu ayibalumuna kufuma kwizu dadeni dadifwanaku nezu datalisha mukwila nawu “kañemi.” (Yere. 18:⁠4) Neyi chochinateli kañemi wakulukila kuzatishayi ndambu kuwumbamu chuma chalubanji, Yehova niyena nateli kwilisha hela kubalumuna yuma kulonda ashikiji nkeñelu yindi.​—Efwe. 1:​11.

Yehova walemesha wuswa wukwetiwu antu wakudifuukwila. Hafuukwilaña chadimu chuma chikamumwekena muntu-himuntuku, nawa hakojejaña antu ashinshika nyichima kwila chuma chatama chakayijahishaku. Wayiteja antu ejima kufuukula munakeñiwu aweni, ilaña wayikonkomwenaña nindi afuukuleña kwila yuma yaloña.

Talenu iyi yakutalilahu yiyedi. Chakutalilahu chatachi chinakuhosha hadi antu ashakamineña muNiniva. Yehova washimwineñahu dehi nindi iwu musumba akawujilumuna muloña wayilwilu yatama yenzelimu. Ilaña chelili enimbu amuniwu musumba abalumuki munyichima, Yehova “wahimpili yitoñojoka nakuleka kuleta yihuñu yashimwiniyi nindi wakayiletela, nawa hayileteliku.” (Yona 3:​1-​10) Yehova wahimpili yitoñojoka yindi kutalisha hachuma chashimwineñahu dehi nindi wakachiila muloña aNiniva azatishili wuswa wawu wakudifuukwila kuhitila mukubalumuka munyichima nakwovwahila mazu akusoñamisha ayitemesheleliwu kudi Yehova.

Chakutalilahu chamuchiyedi chinakuhosha hadi mukakushinda wejina daKirusi, enkeliwu mudimu wakuyisubula aYudeya muwunkoli nikuhana lushimbi lwakutuñulula tembeli yaYehova. (Isa. 44:⁠26–​45:⁠4) Mwanta Kirusi wakuPeresi washikijili iwu wuprofwetu. (Ezera 1:​1-4) Hela chochu, Kirusi hadifukwileña kudi Nzambi walalaku. Yehova wamuzatishili Kirusi kushikijilamu wuprofwetu windi chakadi kumukanjikija Kirusi nindi adifukuleña kudi yena.​—Yish. 21:⁠1.

Hela chochu, iyi hiyuma yantesha hohu hayuma yashinshikañahu Yehova neyi nakushimuna yuma yikamwekana kumbidi. Kuhosha hohu chalala, kwosi muntu wunateli kwiluka chikupu yitoñojoka yaYehova yejima niyuma yelañayi. (Isa. 55:​8, 9) Ilaña, yuma yatulejayi Yehova yatukwashaña kukuhwelela chikupu netu mpinji yejima welaña yuma yaloña, munabombeli niyuma yashimunañayi yikamwekana kumbidi.